Der Judenstaat

Un artíkolo de la Vikipedya, la ansiklopedya líbera
Der Judenstaat

Der Judenstaat ("El Estato Djudio", en lingua djudeo-espanyola) es un livro ke se konsidera el ponkto de empesijo del movimento zionista. El livro deklara ke el problema del antisemitismo sólu va ser solusionado kuando los djudios dispersos por el mundo se puedan reunir a bivir en el su propio estato independyénte.

Este livro fue eshkrito por el djurnalista ostriako Theodor Herzl, editor literário del djurnal vienezo Neue Freie Presse, enel anyo 1896. Dempués del Primér Kongreso Zionista, el kualo fue echo en la sivdad suisa de Basilea el 29 de Ogusto de 1897, fue kreida la Organizasion Zionista Mondial, kon Herzl komo el su primér presidente.[1]

Este livro kavzó un impakto inesperado enel mundo djudio de fines del syéklo XIX. Asta esos diyas, los djudios sólu avlavan del antisemitismo en alkunos enkontros privados i afilu alkunos azían komo ignorarlo para no yamas la atensión de inimigos. Herzl, entremientes, denunsió el antisemitismo komo dinguna persona avía echo antes, i le dio un tratamiento personal, al yevarlo a enkontros ande se avlava a altos levelos de govierno de las potensias de la epoka. Antes de el, sólu el djudio ruso Leon Pinsker, avló del problema enel su livro Otoemansipasion. El propio Herzl admitió ke de no aver meldado este livro, ulai el no kalía eskrivir "Der Judenstaat", el kualo fue traduzido poko dempues de publikarlo al ingles,ruso, idish, ivrit, fransez i espanyol. Enel su komentario editorial, el djurnal inglez Jewish Chronicle publikó: "Un Moshé Rabenu akaba de apareser. El se yama Theodor Herzl".[2]


Referensias[trocar | trocar el manadero]

  1. Histórico em português - formato PDF
  2. Theodor Herzl, sien anyos del esfuenyo a la realitá (en portugez)