Djudios de Buhara

de Vikipedya, la ansiklopedya líbera
Saltar a: navigación, buxcar
Este artikolo uza la grafiya de Aki Yerushalayim para la lingua judeo-espanyola. Mersi muncho por mantener el artikolo uzando este estil.

Los Djudios de Buhara (lingua farsi: یهودی بخارایی, Yahūde-ye Bukhārāī ; lingua rusa: Бухарские евреи, Buharskie evrei ; ivrit: בוכרים, Bukharim ; lingua tadjika i Buhori: яҳудиёни бухороӣ, Yahūdieni buhoroj (djudios buharianos) o яҳудиёни Бухоро, Yahūdieni Buhoro (djudios de Buhara), Buhori en alefbet ivrit : יהודיאני בוכאראי i יהודיאני בוכארי, endemas yamados Binai Israel,[1] son akeyos desendientes de las komunitades djudias espandidas en munchas partes de Asia Sentrala. Una grande parte de esta rejion se topa en Uzbekistan i kaye arientro las sivdades de Buhara, Samarkanda, Tashkent i Shachribez, endemas de la sivdad de Dushanbe, la kapitala de Tadjikistan i Bishkek; la kapitala de Kirgizstan.

Orijin[trocar | editar código]

Se dize ke estas komunitades arivaron atras del primer Bet Amikdash. Sancheriv, el Rey de Ashur, tomo a las 10 tribus de Israel i las yevo al otro lado del rio Gozen. No se puede saber si es justo o no, ma los djudios bivieron en esta rejion antes de la primera Gola i del Segundo Bet Amikdash. Mismo diskues ke el Rey de Persia, [Koresh]], dio la lesensia de tornar a Israel a los djudios i fraguar de muevo el Templo, munchos se kedaron en Persia. Mas tadre, kuando fueron perseguidos, munchos emigraron al norte de Asia Sentrala. Es possible ke son eyos los ansestros de los djudios de Buhara.

Elevos djudios kon el su maestro en la sivdad de Samarkanda, 1910.

Istorya[trocar | editar código]

En un tiempo eskuro en la Era Mediana, enel syeklo VII, el islam empezo a konkistar el kontinente Asiatiko i los musulmanos tomaron Buhara. Los djudios ke refuzaron a ser konvertidos, resivieron un status inferior ke era el dhimmi, kon un respekto limitado i una sierta proteksion. Ansi, los djudios bivieron en paz en estos lugares. Se les egzijava solamente ke pagasen impuestos muy grandes komo el "djiziya" i la soma se espartia entre los dirijentes del payis. Era obligatorio ke kada djudio lo pagase, sino, eran kondanados a la muerte.

Kuando Genghis Khan yego a la Asia Sentrala, konkisto la rejion del Kavkaz i endemas Irak, Iran i partes de la Rusia de oy. Eran kruelos i destruyeron todas las sivdades ke topavan en sus kaminos. Kemaron todo. Los djudios de Buhara sufriyeron muncho i fue diskues de 80 anyos ke todo se rekonstruiyo kon Timur Lenk, el ansestro del pueblo uzbeko. Del otro lado era uno ke konstruiya i destruiya sivdades i enkorajava los djudios a tornar atras. Munchos djudios yegaron de Persia i trusheron kon eyos su abilitad de tisar ropas, lo ke les ayudo a bivir bueno de su ofisio.

Akeyos djudios ke tornaron a Buhara, no eran konsiderados igual a los otros. Deviyan de vistirsen de preto i amariyo o un chapeyo para ke la djente veya ke son djudios. Deviyan bivir en un lugar separado i no puedian salir ahuera de ayi. Las kazas eran fraguadas para tener negosios tambien. Eran mas bashas i el komersio apartenia a eyos.

Durante 1000 anios los Judios tuvieron tiempos kalmos i tiempos de sufrimiento, ma djeneralmente la komunitad enfloresio. Tenian una grande esnoga ke servio 500 anyos.

La fin vino kon la proselytizasion musulmana ke forzo a los djudios de konvertirsen. Los matavan si los topavan praktikando el djudaismo en sekreto. A los anusim los yamavan chale, ke en la lingua tadjika sinyifika "ni de aki ni de aya", ma la vedra es ke no los keriyan, ni los djudios keriyan asimilarsen. Ala fin se avriyo una keila de anusim separada.

Un shaliah de Israel vino a Bukhara de Tiveria. Era el Rabbino Yosef Maman Mugrabi, un haham sefaradi. Vino para arekojer paras para los povres de Israel, ma lo ke topo ayi lo shoko! Se dio a rejuvenar el Estado Espiritual de los djudios ayi. Eyos ambezaron la Alaha kon el i los ato ala Mesora Sefardi. El haham se kedo ayi i dirijio la komunita por unas kuantas dekadas. Trusho elevos para edukar las kriaturas. Ademas los enkorajo a irsen a Israel i munchos se fueron a Yerushalayim, kriando una maale buhariana, la maale buhariana de Yerushalayim.

Durante este tiempo un otro Rabbino de Yemen, Zeharia Matsliah, vino a ayudarlos. Este ombre no pensava ke era djusto para eyos de ambezar el djudaismo de los sefardis; kijo ke seyan readaptados al minhag i la mesora de la komunita persa, por lo kualo avrio una yeshiva i un bet midrash en Buhara.

Enel syeklo XIX la komunita se espandio kuando la autoridad musulmana desho a los djudios ke bivan afuera de la maale djudia; kon esto, mas i mas djudios se fueron a Buhara. A la fin del syeklo XIX, la Rusia konkisto grandes territorios de Asia Sentrala. Esto fue kontra los djudios ke akuzavan de ayudar a los rusos. Munchos se fueron antonses verso Tashkent, Samarkanda i otros lugares. Poko tiempo diskues los rusos esta vez introduzieron dekretos antisemitos en una kompetision kon los kommerzantes rusos i djudios. Ala fin, echaron afuera a los djudios de Buhara.

Al empesijo del syeklo XX, kon la konstruksion de la linia del treno Trans-Kaspiano, todas las difikultades jeografikas disminuyeron. Se puedia viajar al Medio Oryente i a Israel. La Revolusion Bolshevika reusho a tomar a los paises de esta rejion i se anunsyo la kreasion de la Union Sovyetika. Kon los komunistos al pueder, munchos djudios se emigraron a Israel.

La komunita oy en diya[trocar | editar código]

Oy no ay mas ke unos kuantas dezenas de miles en Uzbekistan, unos 1000 djudios biven en Tadjikistan, ma shukur al ayudo de organisasiones komo Habad, tienen hinuh.

Referensias[trocar | editar código]

  1. Marks, Gil. The world of Jewish cooking, Simon & Schuster, 1999, ISBN 978-0-684-83559-4, p. 97.