Isolas Baleares

de Vikipedya, la ansiklopedya líbera
Saltar a: navigación, buxcar
Este artikolo uza la grafiya de Aki Yerushalayim para la lingua judeo-espanyola. Mersi muncho por mantener el artikolo uzando este estil.

Illes Balears

Komunidad Otonoma de las Isolas Baleares

הקהילה האוטונומית של האיים הבלאריים
BanderaBaleares.JPG EscudoBaleares.JPG
Bandeira Eskudo

Situasión de Baleares

Kapitala: Palma de Mayorka
·Povlasion: 777.821
Mayor sivdad: Palma de Mayorka
Linguas ofisialas: Kastilyano, Katalan
Forma de governo: Komunidad Otonoma Espanyola
Moneda:
Shefe de estado: n/d
Shefe de governo: Francesc Antich y Oliver, PSOE
Ekstension: Lugar 17en
·Total: 4 992 km2
·% agua: N/D%
·Frontieras: N/D km
·Kostas: N/D km
Povlasion: Lugar 14en
·Total: 1.001.062
·Densidad: 195,55/km² ab/km2
Dominasion de internet: .es


Las Isolas Baleares o Baleares (en kastilyano Islas Baleares o Baleares, en katalan, Illes Balears o Balears) son una komunidad otonoma de Espanya i una provinsia kompuesta por las isolas del archipielago Balear, ke se topa en la Mar Mediterraneo, junto de la kosta de levante de la Peninsula Iberika. Las isolas ke komponen el archipielago son: Mayorka, Menorka, Ibisa, ansi komo las isolas pichonas de Formentera, Cabrera, Dragonera, Conejera, Isola del Aire, Espardell, Espalmador, Es Vedra, Sa Conillera i Tagomago. El archipielago se divide en dos grupos:

  • Himnesias: Grupo kompuesto por Mayorka i Menorka.
  • Pitiusas: Grupo kompuesto por Ibisa i Formentera.

La sivdad kapitala de la Komunidad Otonoma i de la provinsia es Palma de Mayorka, en la isola del mesmo nombre.


Estoria[trocar | editar código]

Estoria Antigua[trocar | editar código]

Akestas isolas estavan povladas ya desde tiempos muy leshanos. Las primera aparisiones de povladores se remontan al III milenyo a.K. Anke ay vestijios de una presensia umana en Ibisa i Formentera durante la Edad de Kovre, durante munchos siekolos despues las isolas aparesieron kaje despovladas, mientras ke en Mayora i Menorka avian desde siempre, moradores de un puevlo ke agora se konose kon el nombre de talayotiko.

En siglos posteriores, las isolas aresivieron buen karar de gregos, fenisios i kartajinenses. Ibisa i Formentera no tuvieron povlasion estable fista las kolonisasiones fenisias del siekolo VII a.K. i su mueva povlasion seria kon sertesa, de orijenes semitikos (fenisios y punikos). Los romanos konkistaron el grupo de isolas por el anyo de 123 a.K., ajuntando por primera vez tudo el archipielago en basho de una administrasion i de una mesma kultura, anke la kolonisasion fue poka. Arejuntadas primero a la Hispania Citerior i despues a la Tarraconensis, las isolas se fizieron provinsia endependiente fista el siekolo VI, pertenesiendo a la provinsia Cartajinense del Basho Emperio.

Alta Aedad Media[trocar | editar código]

En el anyo de 455, los vandalos envadieron las Isolas Baleares. Poko tiempo despues, en el anyo de 534, fueron konkistadas por los askeres gregos del Emperador Justiniano i se ajuntaron al Emperio Bisantino fista prinsipios del siekolo VIII. La krisis ekonomika i demografika del archipielago, desde el siekolo VII fista el siekolo IX, buen karar ke las aboko a los atakes eksteriores. En el anyo de 903, el imarat de Kordoba fizo okupasion de las mesmas, konvirtiendose en provinsias del Emperio Almoravide (1120 - 1203) i despues de los Arabos Almuhades, fista la konkista kristiyana del reino de Aragon.

Konkista Kristiyana[trocar | editar código]

La korona de Aragon tuvo una fuerte ekspansion en la Mar Mediterraneo, ke la areyevo fista las Isolas Baleares. El rei katalan, Yaume I el Konkistador, dirijio una ekspedision ke yego a Mayorka a fines del enverano de 1229. Despues de munchas batayas ke duraron mezes, el rei entro viktorioso a la sivdad de Palma el dia 31 de disiembre de ese mesmo anyo. La viktoria de los aragoneses se konvirtio en un dor muy grande para la sivdad, porke se fizo una gran matansa, ke kaje akabo kon la povlasion de la sivdad por entero. Avia tal karar de muertos en la isola, ke se abastaron pishin los bedahaims, empidiendo ke munchos de los cadavres aresivieran enteramiento; akesto kavso ansi una gran hazinura entre los konkistadores, ke diminuyeron grandemente. En konsekvensia, la noblesa katalana kijo kedarse kon todo el trezor en lugar de arepartirlo entre los askeres. Akesto fizo una gran sanya de entre los konkistadores i se akabo en una rebuelta fista ke se akodro la repartision del trezor de la konkista, el 30 de abril de 1230.

En tanto ke la isola de Menorka, kedava komo una provinsia pechera de la Korona Aragonesa, ande la relijion musulmana i la kultura de los arabos duraron kaje un siekolo endemas. Ma en jenero de 1287, las naves de Alfonso II el Franko ayegaron al puerto de Maon. Se fizo un pakto de kapitulasion de la isola, asigurando la libertad de la nobleza a kambio de un sierto numero de esklavos. La isola de Ibisa, ya avia sido kontrolada por los askeres de Yaume I, ma desde el agosto de 1236. Los sus povladores fueron tambien esklavizados i sus aziendas repartidas de entre los konkistadores.

Yaume I de Aragon dio a las isolas una disposision administrativa kon buen karar de otonomia, ariento de la korona de Aragon, faziendo akestas el Reino de Mayorka ke tuvo endependensia por algunos anyos. Kon el kazamiento de los Reyes Katolikos, las isolas tambien se arejuntaron kon las demas provinsias i reinos de la peninsula iberika. Munchos siekolos mas tadre, se fizo un dekreto defendiendo a la djente de favlar en katalan ansina espanyolizando las isolas (1718).

Aedad Moderna i Kontemporanya[trocar | editar código]

Vizyon Panoramika de la Sivdad de Palma.

La isola de Menorka fue okupada entre 1708 i 1802 por soldados anglezes, a kavsa de la Gerra de Susesion.

En durante la II Republika (1931-1939) se kizo fazer, anke sin sukseso, un Estatuto de Otonomia para las Isolas Baleares.

En 1936, con el empesijo de la Gerra Sivil Espanyola, el archipielago keda dividido en dos zonas: la parte sentral y la del vueste. Formentera, Ibisa i Mayorka kedan ariento del aria komandada por los askeres alzados verso la Sigunda Republika Espanyola. Por kontrario, en Menorka el alzamiento nada ke suksedio. En la primera parte del konflikto, desde Katalunya se va dezvelopar una operasion para kapturar Mayorka, el yamado Desembarko de Mayorka, ke akontesio entre agosto y setiembre de 1936 i ke al kabo seria empedido por la armada frankista. La isola de Menorka ke no se okupa fista el final de la gerra.

Tras el troko de governo atornan las ideas otonomistas i en 1983 alkavo se aprueva un Estatuto de Otonomia de las Isolas Baleares. Agora las isolas gozan de un sistema otonomiko ke lis deşa eskojer el su hasbon ekonomiko para tuda la anyada, la eleksion de la lingua katalana komo lingua ofisiala de ensenyansa y de governo, y un karakter insular ke li eksenta de kualkas obligasiones fiskalas en verso la Espanya y el su governo sentral.


Demografya[trocar | editar código]

Vizyon Averia de las Isolas Baleares.

Povlasion por Sivdades (2005):

  • Palma de Mayorka - 375.773 pov.
  • Ibisa - 42.797 pov.
  • Maon - 27.669 pov.
  • Siudadela - 26.972 pov.
  • Formentera - 7.506 pov.

La povlasion del archipielago a pujado grandemente a kavsa del "boom" turistiko de los anyos 60: en el peryodo 1970 - 2005, akeste fue de +76,10%, verso el +29,90% de la medya espanyola. En el anyo 2005, la povlasion total de las isolas pujaba mas de las 983.131 presonas.

Sigun el senso INE 2005, un 15,75% de la povlasion balear era de nasionalidad ekstranjera, ansina ke es la primera Komunidad Otonoma i la sigunda provinsia (tras Alikante) de Espanya kon mayor numero de residentes de huera. Un 39,66% de la Komunidad Otonoma viene de la Union Evropea, de ande prinsipalmente son tudescos (14,59% del total), anglezes (9,56%), italianos (5,46%) i franseses (3,60%). Un 34,34% viene de Amerika Latina, prinsipalmente ekvatorianos (10,32%), arjantinos (7,62%), kolombyanos (5,95%) i uruguayos (2,39%). Un 11,02% viene de Afrika del Nord, prinsipalmente del Fas i el restante viene de la Evropa del levante, kaje tudos de Romanya o de Bulgarya.

Las Isolas Baleares son de agora de dos linguas, en katalan (ya ke se povlaron buen karar de djentes del Roseyon, Djirona i Barselona en durante la Rekonkista) y kastiyano (favlado en tudo el teritorio nasionalo). Endemas, en las zonas turistikas se favla el Angles y el Tudesco.

Estoria Natural[trocar | editar código]

Palyografya[trocar | editar código]

Perro Podenko Ibisenko, raza orijinal de la isola de Ibisa.

Las Himnesias y Pitiusas an tenido una estoria jeografika diferente. En durante las glasiasiones del Kuaternario, a kavsa de la pujada de la agua y del buz en los kasketes polares i en las grandes muntanyas, las mares abasharon de mizura. Akesto fizo ke se ajuntaran Menorka y Mayorka por una parte, e Ibisa i Formentera por el otro. Tudas las faunas i las floras se ajuntaron, ma entre la Gran Himnesia i la Gran Pitiusa no hue ansi, porke kedo un kanal de mar de mas de 70 km, en el kualo dinguna bestia andava. La menor mizura de la Gran Himnesia (2.000 km²) i un tiempo mas kaliente fizo ke las bestias de tierra aki mankaran.

Flora[trocar | editar código]

Faze muncho tiempo, Himnesias i Pitiusas tevieron ekosistemas diferentes. Las Himnesias tevian boskes de ensinas ariento de las isolas i en los yanos de la kosta grandes boskes de boh balear (buxus balearica), planta ke ainda topa en Mayorka. Las Pitiusas estavan kaje desnudas de vejetasion de arvoles, teviendo buen karar de yebras nitrofilas, produkto del efekto de las deyeksiones del kara de pasharos que moravan en las isolas.

Fauna[trocar | editar código]

En el pazado, la fauna de las Himnesias i de las Pitiusas era arto distinta. En diferensia de las espesies voladoras (pasharos prinsipalmente), las isolas no kompartian dinguna otra espesie de tierra. Avia diferentes komunidades de plantas, bestias erbivoras i bestias karnivoras.

Administrasyon[trocar | editar código]

El Govierno de las Isolas Baleares (ofisialmente Govern Balear fista 1999) es la entida que tiene el poder ejekutivo en la komunidad otonoma espanyola de las Isolas Baleares. Fue kreado por la lei organika 2/1983, de 25 de fevrero, trokado despues por la lei organika 3/1999, de 8 de jenero, i de antes por la lei organika 9/1994 del 24 de marzo. Se deve de tever en hasbon, la lei 27/1997, del 4 de agosto, en la ke se seden pechos a la komunidad otonoma.

Komposisyon[trocar | editar código]

El govierno de las Isolas Baleares esta kompuesto por el presidente de la komunidad otonoma i sus konseiyeros.

El presidente de la Komunidad Otonoma es eskojido por el Parlamento de las Isolas Baleares de entre los sus diputados por un tempo de kuatro anyos a rinovarse. Es nombrado por el rei de la Espanya verso la lei organica ke se publika tanto en el BOE komo en el BOIB. Es la maksima representasion institusional de la Komunidad Otonoma i es ansina responsavle de su aksion de govierno verso el Parlamento Balear, junto a sus konseiyeros, al ke devera rendir hasbon en las sesiones de kontrol. En el kaso de hazinura, muerte o kualunke otro empedimento sera trokado por el visepresidente, el presidente del parlamento, o el konseiyero mas aedado. El presidente entonses ke aresive el titulo vitalisio de Muy Onrozo Senyor.

Los konseiyeros son eskojidos i nombrados por el Presidente, kien fista 1999 solo podia nombrar a lo muncho, diez. Su nombramiento se publica en el BOIB verso la lei organika. Non kale ke sean miembros del Parlamento Balear. Kada konseyero es responsavle del aria de govierno ke el presidente le amostra, ma tambien se puede nombrar algun konseiyero sin kartera. Los konseiyeros dejan de ejerser sus kargos kuando el presidente piensa ke ansina lo kale, o kuando el presidente akaba el su lavoro. Los konseiyeros pueden de igual aresivir el titulo de Onrozo Senyor para tuda la vida.

Presidentes[trocar | editar código]

  • Gabriel Cañellas i Fons (PP, 1983-1995)
  • Cristòfol Soler Cladera (PP, 1995-1996)
  • Jaume Matas Palou (PP, 1996-1999)
  • Francesc Antich Oliver (PSOE, 1999-2003)
  • Jaume Matas Palou (PP, 2003 - 2007)
  • Francesc Antich Oliver (PSOE 2007 - 2011)
  • José Ramón Bauzà Díaz (PP 2011 - )

Aktividades Ekonomikas[trocar | editar código]

Turizmo[trocar | editar código]

Vizyon del Limani de Maon.

En las Isolas Baleares, endagora el turizmo es una de las industrias mas emportantes ke se tienen en el archipielago, esto dado prinsipalmente por la buena lokalisasion en la Mar Mediterraneo, ke les prodiga de buen tiempo y de karar de dias kon sol. Achakes de esta lokalisasion, Palma de Mayorka e Ibisa son sivdades kon una ancha dependensia de la endustria del turismo, kon grandes katenas de servisios, komo los restorant, otels, linyas averias, de entre algunas otras. De igual ke las tres isolas mayores estan bien ajuntadas kon el kontinente, i se pueden travar munchos vuelos asia Barselona o Madrid kon regularida. De entre las atraksions turistikas ajuntadas, estan karar de edifisios, plasas y cazales de orijen medieval, ansi komo nombrozos sitios de playa.

Referensias[trocar | editar código]


Komunidades Otonomas de Espanya Bandeira de Espanya
Komunidades Otonomas: Andaluziya | Aragon | Asturias | Isolas Baleares | Estremadura | Galizia | Kanarias | Kantabria | Kastiya-La Mancha |
Kastiya i Leon | Katalunya | Komunidad de Madrid | Komunidad Valensiana | La Rioja | Navarra | Pais Vasko | Region de Mursia
Sivdades Otonomas: Meliya | Seuta