Istorya de los djudios en Selanik

Un artíkolo de la Vikipedya, la ansiklopedya líbera
Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

Famiya djudia de Selanik en 1917.

La istorya de los djudios de Selanik aze referensia a la istorya de una komunita, en la su gran majorita sefardi, ke se topava en la sivdad grega de Selanik, desde los diyas de su arivada, enel syeklo XV, fina el su amatamiento kaji kompleto en la Sigunda Gerra Mondiala. La komunita djudia de Selanik por munchos anyos era la majorita de la sivdad, kavzo ke aze de eya uniko en toda la Gola de una sivdad djudia; por eso, era yamada "La Yerushalayim de Oksidente".

La enfluensia de la komunita de Selanik yego a todo el Imperio Otomano i ainda a las otras komunitas sefardis. Los djudios arivaron ala sivdad desde Espanya enel anyo 1492, por kavza del Edikto de Granada, el kualo mando a los djudios ser arrondjados de Espanya. Durante el syeklo XVI i basho el kontrolo del Imperio Otomano, la komunita de Selanik bivio una Edad endiamantada fina el syeklo XVIII la ekonomiya menguo un poko; enel syeklo XIX, kon la arivada de la Revolusion Industriala, la sivdad i la komunita kresieron muncho ekonomika i kulturalmente.

La istorya de los djudios de Selanik fue aharvada kon huersa enel syeklo XX; kuando la armada Nazi amato a kaji el 80% de la komunita.

Todos los kaminos de la Gola se topavan en Selanik.

El dezvelopamyento del antisemitizmo en Selanik[trocar | trocar el manadero]

La cantiga del fuego
Día de sabat, mi madre,
la horica dando dos,
fuego salió al Agua Mueva,
a la Torre blanca quedó.
Tanto probes como ricos,
todos semos un igual.
Ya quedimos arrastrando
por campos y por kislás.
Mos dieron unos tsadires,
que del aire se volan.
Mos dieron un pan amargo,
ni con agua no se va.
Las palombas van volando
haciendo estruición.
Ya quedimos arrastrando
sin tener abrigación.[1]

Referensias[trocar | trocar el manadero]

  1. La cantiga del fuego es una kantika tradisionala sefardi la kuala aze referensia al huego ke kaji amata la sivdad enel anyo 1917. Alkunos biervos son de orijin turko: kislás sinyifika "kampos", i tsadires, "tiendas de kampanya". "Agua Mueva" i "Torre Blanca" son nombres de maales de Salonika. (Tomado del livriko del CD Spring in Salonika, de Savina Yannatou, ML 4765).


 
Istorya de los djudios

Chile | Espanya | Estonia | Harbin | Libya | Makedonia | Malasia | Meksiko | Rumania | Selanik | Shanghai | Tunesia | Venezuela