Istorya de los djudios en Tunesia

de Vikipedya, la ansiklopedya líbera
Saltar a: navigación, buxcar

Tunesia a tenido una komunita djudia desde los tyempos Romanos. Enel anyo 1948, la povlasion djudia era de unos 105.000 abitantes, pero para el anyo 1967 la mayoria de la komunita iva dejar el paez para emigrar a Fransia o Yisrael, i la povlasion se iva redusir a unos 20.000. Para el anyo 2004, se estima ke unos 1500 djudios ainda biven en el paez, espesialmente en la adá de Djerba (konosida por las sus esnogas), siendo los djudios la menoria relijiosa nasional má chika.

Istorya Antika[trocar | editar código]

Dize la tradision ke los primeros djudios ke yegaron a Tunesia mucho antes de la destruksiyon del Primér Templo en el syéklo VI AEK. Dempues dela desaparision del estado djudio, un gran numero de djudios ivan ser enviados por Tito a Mauritania i munshos se establesieron en Tunesia. Estos djudios ivan lavorar en agrikultura, gaderia i komersio. Ivan estar divididos en klanes, governados por los sus shefes própios, i ivan tener ke pagar a los Roma un empuesto de 2 shekels. Basho el dominio de los Romanos, ke iva durar asta el anyo 429 i de los vandalos (ke eran munsho má tolerantes), los djudios de Tunesia kresieron, amijoraron i prosperaron a tal grado ke los Konsilyos de la Eglesia Katolika ivan desidir ke era nesesario fishar leyes para limitar las aktivitas de los djudios. Dempues de la derrota de los vandalos por Belisario enel anyo 534, Djustiniano I iva publikar el su dekreto de persekusyon. En el syéklo VII, la povlasion djudia iva kreser munsho grasias a djudios ke ivan venir de Espanya, kenes, fuyendo de las persekusiones del rey Visigodo Sisebut i los sus susesores, ivan eskapar a Mauritania i se ivan asentar en las sivdades Bizantinas. Estos djudios espanyoles, asigun los istoryadores arabos, se ivan mesklar kon la povlasion Bereber i ivan konvertir munshas tribus poderosas, las ke sigieron profesando el djudaismo asta el arrivo de la dinastia Idrisida. Kuando Tunesia ivba kaer basho el kontrolo de los arabos, del Kalifato de Bagdad, otra ola de djudios de paezes arabos yego a Tunesia. Komo en otros paezes islamikos, los de Tunesia ivan estar sujetos al kontrolo de Omar ibn al-Khattab.

Basho el Islam[trocar | editar código]

Enel anyo 788, kuando el Iman Idris iva anunsiar la independensia de Mauritania del kalifato de Bagdad, los djudios de Tunesia se ivan unir a la su armada basho el komando de el su shefe, Benjamin ben Joshaphat ben Abiezer. Eyos se retiraron pronto; prinsipalmente déke no kerian gerrear kon otros djudios ke ivan estar establesidos en otras partes de Mauritania, kenes permanesieron fiyeles al Kalifato de Bagdad, i endemas déke Idris iva aser munchas indignitas en kontro de las mujeres djudias.

Idris se avengo de este abandono kon un atako en kontro de los djudios en las sus sivdades. Dempues de una resistansia sin egzito, se iva konstruyir la paz, basho un akodro en el ke los djudios ivan tener ke pagar un empuesto i endemas dedikar un numero de mansevas parael harem de Idris. La tribu 'Ubaid Allah prefirio emigrar al Oryente en ves de abashar la kabesa ante Idris. Asigun una tradisyon, los djudios de la adá de Djerba son los desendientes de esa tribu. Enel anyo 793 al Imam Idris le ivan dar un enveneno, komandado por Harun Al-Rashid (se dize ke por el doktor del Imam, Shamma, un djudio) i serka del anyo 800 iva ser establesida la dinastiya Aghlabita. Basho el mando de esta dinastiya, ke iva egzistir asta el anyo 909, la situasion de los djudios en Tunesia iva ser muy favorable, kon la sivdad de Bizerta ke iva tener un governador djudio, i la enfluensia de los djudios era konosida en la administrasyon del paez. Sobre todo la komunita ma prospera del paez era la de la sivdad de Kairuan, ke iva ser establesida poko tiempo dempues de la fondasion de la sivdad por Ukba ibn Nafi enel anyo 670. Dempues de la subida al poder de Al-Mu'izz (1016-62), la poblasyon djudia iva sufrir deke persekusyones, sobre todo la komunita de Kariuan, ke empesaron a trokar la su residensia por la sivdad de Tunis, ke iva poko a poko ganando emportansia komersial i tamanyo.

El kontrolo de las provensiyas del Magreb por la dinastiya Almohade enel anyo 1146 fue muy desatrozo para los djudios de Tunesia. En prokura de una relijion moderna i má atraktiva, de lo ke no egziste erejistro en la tradisyon islamika, el primer Almohade, Abd al-Mu'min, disho ke el profeta Mohammed iva permitir la libera praktika de la su relijion a los djudios por sólu kinientos anyos, i endemas disho ke, si dempues de ese tyempo el Mashiah no iva yegar, los djudios ivan tener ke trokar su relijion por el Islam. Del mesmo modo, a los djudios i a los kristyanos se les estimulaba a konvertirse al Islam o a trokarse de paez. Los susesores de Abd al-Mu'min sigiron la misma linea, i las sus aksyones ivan resultar en emigrasyon o el konversyones por la huersa. Los Almohades no tinian bitahon en los muevos konversos, i demandaron ke eyos uzaran una ropa espesial, kon un panyo amariyo en la kabesa.

Los djudios de Tunesia en ese tyempo kumplian todos los hagim, pero no el dosen dia komo se ase en la Galut; ignoraban por kompleto la fyesta de Purim, afilu si iban selebrar Hanukka. De akódro kon las sus normas, si una mujer perdia dos esposos, eya iva ser yamada "mata-esposos" i no iba ser mas permitida de kazar. Esto tambien iba ser aplikado a una mujer ke se iba divorsiar dos vezes. Los meyisos varones siempre iban ser yamados Perez i Zera; las mujeres meyisas, Sara i Ribka.

Basho los Hafshitas i los Espanyoles (1236-1857)[trocar | editar código]

Basho la dinastya Hasfshita, ke iva ser establesida enel anyo 1236, las kondisyones de los djudios en Tunesia amijoraron munsho. Endemas de Kariuan, tambien egzistian komunitas emportantes en Mehdia, Kalaa, la adá de Djerba i la sivdad de Tunis. Konsiderados al empiese komo ekstanjeros, los djudios no tenian lisensia para residir en Tunis, ma tenian ke bivir en una frágua yamada "Funduḳ"; má dempues un musulman riko i bueno, yamado Sidi Mahrez, ken enel anyo 1159 iva servir al primérAlmohade, Abd al-Mu'min, prokuro para eyos el dirito de abitar en una máale de la sivdad. Esta máale, yamada "Hira", iva ser asta el anyo 1859, el Geto de la sivdad de Tunis; las puertas del Geto eran serradas en la noche. Enel anyo 1270, en konsekuensia de la derrota de San Luis de Fransia, ken iva lansar una krusada kontro de las sivdades de Kariuan i Hammat, los Almohades deklararon estas sivdades santas, i antonses los djudios ivan ser huersados a konvertirse al Islam o morar en otra sivdad. Desde 1270 asta la konkista de Tunesia por Fransia en 1857, los djudios i los kristyanos no podian pasar una noche en estas sivdades i sólu ivan poder entrar en eyas durante el dia kon lisensia del visir.

El fákto de ke los djudios de Tunesia ivan ser tratados mas duro ke en los otros estados de Berberia se puede entender déke, mientras los arifujiados de Espanya i Portugal yegaron a Arjelia i Marroko fuyendo de la Enkisizion, sólu alkunos yegaron a Tunesia. De fákto, los djudios de Tunesia no ivan tener hahamim grandes i konosidos i ivan tener ke konsultar a los de Arjelia i sobre todu, Marroko, por asta las demandas má ordinarias. Los sus asuntos de la komunita ivan ser adirijidos por un konseho, nominado por el governo, ke iva tener komo fonksiones la administrasyon de djustisia entre los djudios, i sobre todo, los empuestos para los Djudios de Tunesia,ke ivan ser má ke para los musulmanos. A pesar de todos estos empuestos, el komersio del paez estaba kontrolado por los merkaderes djudios, i munshas vezes el governo iva pedir rekursos a los djudios. Dempues del syéklo XIII, el governo adopto la kostumbre de tener a un djudio komo el reseptor de los empuestos de todo el paez. Este fonksionario, endemas iva servir de medio entre el governo i la komunita djudia, i el su poder en la komunita del paez era el ma grande. Los myembros del konseho, ansina komo del de los hahamim ivan ser anombrados por la su rekomendasyon, i ninguna desisyon de los Batei Din iva tener valides si el no daba la su aprobasyon.

Durante la okupasyon Espanyola de las kostas de Tunesia entre 1535 i 1574, las komunitas de Bizerta, Susa, Safakis i otros puertos ivan sufrir munsho basho el kontrolo de los Espanyoles; ma dempues, basho el kontrolo Ottomano, los djudios ivan tener munshas libertas, komo el respekto a la su relijion i avtonomia para administrar los sus asuntos, anke siempre ivan estar ekspuestos a los desejos del Bey de turno i a eksplosyones lokales de fanatikos islamikos. Desde el syeklo XVIII, el status politiko de los djudios en Tunesia amijoro munsho. Esto deke la enfluensia de las potensias Evropeas, kenes, para amijorar la situasyon de los Kristyanos, ivan tener ke pedir endemas por la de los djudios. Joseph Azoulay, ken iva vijitar Tunesia enel anyo 1772, iva deskrivir kon termos de grandesa la enfluensia de los djudios en la korte, sobre todo de Solomon Nataf, el kolektor de emnpuestos (caid). Kuarenta i dos anyos dempues, el konsul de los Estados Unidos en Tunesia, Moredehai M. Noah, iva deskrivir la situasyon de los djudios en Tunesia de la siginte manera:("Travels in Europe and Africa," p. 308, New York, 1819).

"Kon toda la aparente opresyon, los djudios son los ke lideran el paez; son en Barbaria los prinsipales mekanikos, estan a la kabesa delas aduanas, son los ke kolektan los empuestos; la eksportasyion de munshos produktos, i el monopolio de la merkansiya estan basho el su kontrolo, endemas ke eyos kontrolan la empresyon i regulasyon de las monedas i los bilietos, guadran las joyas del Bey i los artikolos de valor, i son los sus sekretarios, tesoreros i endemas los traduktores; lo poko ke se sabe de Arte, Siensia i Milizina es dominio de los djudios...si un djudio ase un krimen i el kastigo ase danyo a la su vida, esta jente, tan rasional, siempre puede komprar el su perdon; la desgrasia de uno afekta a la komunita entera; eyos estan siempre en la presensia del Bey, kada visir tiene dos o tres asistentes djudios, i kuando eyos se unen para lograr alkuna koza, no puede ser evitada. Esta jente, antonses, afilu se favke munsho de la su opresion, la su amistad es guadrada, tienen una enfluensia grande sobre todo en los foksionarios publikos, i la jente teme la su enemistad"

Basho Mohammed Bey (1855-1881)[trocar | editar código]

Basho el lungo governo de Ahmad Bey, los djudios ivan tener una grande prosperidad. El su susesor, Mohammed Bey, empeso el su reinado enel anyo 1855 kon la abolisiyon de los dekretos en kontro de los djudios, El caid Joseph Scemama, ke era el su amigo, possiblemente uzo la su enfluensia. Mohammed Bey, un ombre muy relijioso, provoko el amortamiento de un djudio yamado Batto Sfoz, akusado de blasfemar en kontro del Bey. La su muerte provoko ke se enviara un grupo a favlar kon Napoleon III, para pedirle ke interviniera en el su favor. Dempues de dos anyos de negosiasion, el governo Franses iva mandar un ombre de la armada para aser kumplir las demandas del su governo en Tunesia. Mohammed Bey aksepto, i se eskrivio una konstitusion, asigun la ke todos los abitantes de Tunesia, sin emportar la relijion, ivan tener los mismos diritos. Los sigintes artikolos ivan ser emportantes para los djudios:

(§ 4) "No se puede imponer ninguna medida para trokar la su relijion de los muestros abitantes djudios por la huérsa, i no se les debe impedir de sigir los sus ritos relijiosos. Las sus esnogas deben ser respektadas i protejidas de insultos".

(§ 6) "Kuando una korte va a dizir la pena a pagar por un djudio, se debe prokurar asesores djudios para esa korte".

Esta konstitusion iva ser kitada enel anyo 1864 déke una revolusion ke iva fazer munsho sufrimento a las komunitas djudias, espesialmente a la de la sivdad de Safakis; ma el miedo konstante de la enfluensia ekstranjera iva fazer ke el governo respektara a los djudios.

De 1881 a oy endia[trocar | editar código]

Tunisia iva ser el uniko paez arabo okupado por los Nazis durante la Dosen Gerra Mundial; Marroko i Arjelia ivan ser governados por la Fransia de Vichy. Kuando los Nazis yegaron a Tunesia, en el paez abitaban unos 100.000 djudios. Asigun Yad Vashem, los Nazis emplantaron politikas antisemitas, komo ke los djudios uzaran Magen David de kolor amariyo i multas, endemas del konfiske de la su propiedad. Má de 5.000 djudios ivan ser enviados a los kampos de trabasho huersado, donde 46 ivan ser amortados, i otros 160 Djudios Tunesinos en Fransia ivan ser enviados a kampos de amortamiento. Afilu ke en Tunesia iva naser Khaled Abdelwahhab, el primér arabo "Rekto entre las Nasiones". Dempues de la independensia en los anyos 50, el konseho de la Komunita Djudia de Tunesia iva ser eliminado por el governo, i munshas máales djudias i fraguas ivan ser destruyidos para "renovar la sivdad" . Para el anyo 1967, la komunita djudia empeso a salir del paez; unos 40.000 salieron para Yisrael, i kedaron unos 20.000 en el paez. Durante la Gerra de los Sesh Dias, los djudios ivan ser atakados publikamente, i afilu el governo se diskulpo, 7.000 djudios se fueron a Fransia. Enel anyo 1985, el buro de Yasser Arafat en la sivdad de Tunis iva ser destruyido por la Huersa Aerea de Yisrael en vengansa por el amortamiento de tres israelis en Kipre, un atako ke amorto 70 personas y destruyo toda la fragua.

Enel anyo 2004, la komunita djudia de la sivdad de Tunis tiene tres skolas primarias, dos skolas sekundarias, una yeshiva i un Rabino Shefe. La Komunita de la adá de Djerba tiene un gan de elevos, dos skolas primarias, dos skolas sekundarias, una yeshiva i un Rabino. Endemas, egziste una eskola primaria i una esnoga en la sivdad de Zarzis. La komunita endemas mantiene dos kazas para los viejos, varios restaurants de kumida kasher i otros katro rabinos. Kaji todos los Djudios de Tunesia kumplen las leyes de Kashrut.

La prosesyon de Lag Ba'Omer retornando a la Esnoga El Ghriba en Er-Riadh (Hara Sghira), Djerba, 2007

La esnoga ma konosida de Tunesia es la Esnoga El Ghriba, en la viya de Hara Sghira, en la adá de Djerba. La fragua aktual de la esnoga iva ser fraguada a finales del syeklo XIX. afilu se dize ke en el lugar iva tener esnoga desde má de 1.900 anyos. Los djudios del paez vijitan la esnoga kada anyo en la fiesta de Lag B'Omer. El 11 de Abril del anyo 2002, un oto yeno de eksplosivos iva eksplotar serka de la esnoga, amortando 21 personas, de los ke 14 eran turistas almanes y 2 franseses, endemas de fazer feridas a má de 30; este insidente es konosido komo el Atako a la Esnoga El Ghriba; Al Qaida iva reklamar la su responsabilita por el atako.

El Rabino Shefe Hayim Madar iva ser el lider espiritual de la komunita, una komunita ke egziste desde el anyo 586 antes de la Era Komun, asta la su muerte el 3 de Diziembre de 2004. Los servisios funerales ivan ser en la esnoga Bet Mordehai en La Goulette,Tunis, i en la esnoga El Ghriba en la adá de Djerba.