Kaminar ensima de la agua

de Vikipedya, la ansiklopedya líbera
Saltar a: navigación, buxcar

Kaminar ensima de la agua (títolo orijinal en ivrit: ללכת על המים, Lalehet al hamayim) es un filmo Yisraeli del anyo 2004. Los prinsipales roles son interpretados por los aktores Lior Ashkenazi, Knut Berger i Caroline Peters. El filmo es dirijido por el direktor yisraeli nasido en Mueva York Eytan Fox. La istorya fue eskrita por Gal Uchovsky. La mayor parte de los diálogos son en inglez, afilú ay munchas konversasiyones en ivrit i en almán. El nombre del filmo se deriva de la istorya kristyana de kuando Yeshu kaminó sovre las aguas en el Kinneret.

Istorya[trocar | editar código]

Eyal es un adjente en el Mossad, el servisio sekreto yisraeli. El es un adjente enkargado de kobrar la vida de los inimigos del paez i de los djudios. La su esposa se amortó resientemente, i la adjensiya va desidir ke el presisa de una tarea má kolay: Ankontrar a un viejo kriminal Nazi i amortarlo "Antes ke el Dio lo ankontre primero".

Para konsigir el ombre, Eyal pasa por un gia turístiko i se troka en amigo de los nietos del Nazi, Axel i Pia. Pia bive en un kibbutz. El su ermano Axel viaja a Israel para tentar konvenserla de aboltar a Almania para el aniversário numero 70 del su papú. Má adelántre en el filmo se revela ke la relasiyon de Pia kon la su famiya empiesó kuando eya iva deskobrir ke los sus padres eskondian al su papú en vez de entregarlo a la djustisia almana. Eya komparte toda esta informasiyon kon Axel.

Anke el tiene un echo ke komplir, Eyal se troka en amigo de vedra de Axel i Pia. Eyos son djente buena ke demostran ke la mayoria de los almanes desharon en el pasado el aborresimyénto ke jeneró el Olokósto. Eyos se azen pasar muncho tiempo djuntos i Eyal tambien goza deste, afilú el no dize nada. La su amistad kon Axel lo aze amostrar algo de umanitá, deshando un póko de lado su imajen de ombre rudo i huérte. Eyal i Axel inkluzo toman un banyo de barro en la Mar Amortado, tomándose un dush djuntos desnudos dempués de este.

Kuando los tres van a senar una noche en un restoran de Tel Aviv, Axel avla en privado kon el garsón palestiniano, Rafik, i le kestiona kual danseteria es la amijor de la sivdad. Má tadre esa noche, Axel, Pia i Eyal arrivan al sitio. Eyal esta sorprendido al diskovrir ke es una danseteria gay. El ve a Axel baylando kon Rafik.

Al empesijo, Eyal esta molesto i defraudado de diskovrir ke Axel es gay. El torna al buró i pide ser removido de la tarea, má no dize ke la su omofobia es la razón. El su shefe, Menahem, insiste ke Eyal deve kulminar la misión. Eyal vijita Almania i se da kuenta ke la orientasiyon seksual de Axel no es emportante. Durante la vijita, Eyal defiende a un grupo de amigos transeksuales de Axel de unos skinheads (Neo-Nazis) ke los atakan i al azer este, desha konoser ke avla bien la lingua alemana. El antonses le kuenta a Axel ke los sus padres eran yekkes (djudios almanes) i le eksplika ke la mayoria de los djudios en la rejion de Almania ande bivia la su madre fueron amortados por el papú de Axel. Poko tyempo dempués durante la vijita, Eyal avla kon Menahem, el kualo pedrio la su famiya a manos de los Nazis, por ordenes del papú de Axel i Pia.

Axel kumbita a Eyal a la fiesta de aniversário del su padre. Los musafires no se sienten muy trankilos kon la nasionalidad i la relijion de Eyal, ma son afilu amables kon el. Dempues de ke el pastel es trayido, los padres de Axel sorprenden a los musafires trayindo al papú de Axel. Axel esta fishugado por esto y konfronta los sus padres i se va a la kamareta de Eyal, ande ankontra un binder yeno de informasiyon sovre la famiya de Axel. Mientres tanto, Eyal se ankontra kon Menahem i le dize ke es posivle tomar al papú y yevarlo pishín a Yisrael para poder djuzgarlo en un Bet-Amishpat por los sus amortamientos i krímenes de gerra. Menahem le dize ke sólu eyos dos estan en esta misiyon, i ke la tarea es amortar al papú. Eyal se siente konfundido i no sabe ke azer, pero a la fin toma la kasha kon los venenos ke Menahem le da.

Dempués, Eyal yega a la kaza de Axel i entra a la kamareta del papú, sin ke dinguna persona lo vea, eksepto Axel. Axel lo mira kuando el yena una djeringa kon veneno, aziendo nada para detenerlo. A la fin, Eyal no es kapaz de komplir la tarea. Eyal se va de la kamareta i Axel akarisia kon karinyo la kara del su papú, antes de deskonektar el su tanke de oksíjeno, lo ke amorta al papú. El va a la kamareta de Eyal, ande eya le dize ke la nota ke deshó la su esposa antes de matarse dizía ke el amorta a todu lo ke esta serka de el i ke dempues de eya, el no iva poder amortar a mas dingún.

La istorya dempués salta dos anyos. Eyal i Pia estan enkazados i tienen una kriatura yamada Tom, i endemás Eyal i Axel sigen siendo dobros amigos.

Personajes prinsipales[trocar | editar código]

Musika del filmo[trocar | editar código]

La musika del filmo inklui una versiyon del klásiko yisraeli "Cinderella Rockefella" de Esther i Avi Ofarim, kantada por Rita Kleinstein i Ivri Lider, ansina komo endemas un remiks de la kantika Mary La'Netzah ("Mary por siempre") de Ivri Lider.


Premieres[trocar | editar código]

El filmo tuvo la su premiére el 5 de Fevrero de 2004, en el Festival de Sinema Internasional de Berlin. La su premiére en salas de sinema yisraelis fue el 18 de Marso de 2004. La Premiére del filmo en los Estatos Unitos d'Amerika fue el 24 de Oktobre de 2004, durante el Festival Internasional de Sinema de Milwaukee. Dempués fue espartido limitadamente en las salas de sinema de Amérika del Nord el 4 de Marso de 2005.


Premios i nominasiyones[trocar | editar código]

Premios de la Akademia del Sinema Yisraelí (2004)[trocar | editar código]

Ganados

  • Amijor Musika - Ivri Lider
  • Amijor Kantika Orijinal - Ivri Lider por "Mary LaNetzah"
  • Amijor Sonete - Gil Toren

Nominasiyones

  • Amijor Filmo
  • Amijor Aktor - Lior Ashkenazi
  • Amijor Direktor - Eytan Fox
  • Amijor Gión - Gal Uchovsky
  • Amijor Sinematografiya - Tobias Hochstein
  • Amijor Edisiyon - Yosef Grunfeld

Premios César (2006)[trocar | editar código]

Nominasiyon'

  • Amijor filmo ekstranjero

Kuriozitá[trocar | editar código]

  • Caroline Peters, la aktrisa ke interpreta a Pia, reveló en la televizión yisraeli ke el su papú en la vida real fue un Nazi.


Enlasos Eksternos[trocar | editar código]