Korno de Oro

Un artíkolo de la Vikipedya, la ansiklopedya líbera
Korno de Oro

El Korno de Oro (en turkano, Haliç; en grégo, Χρυσοκερας, Krisokeras) es un estuario kon forma de kuchiyo a la entrada del Bosfor, el kualo partaja la sivdad de Estambol. Este lugar dio kudio a las naves de la Gresia Antika, del Imperio Romano, de Bizans i del Imperio Otomano por miles de anyos.

Es un estuario ke yega al Bosfor kuando entra a la mar de Marmara, konformando una peninsola ke tiene a la vieja sivdad de Estambol (la antika sivdad de Bizans).

En el tiempo de los Otomanos en este lugar aviya munchas maales. En el tiempo de los bizantes uvo populasion en este lugar, en mezmo tiempo era sentro de navigantes. En el bodre de la mar fraguaron murayas para protejer el lugar de marineros ajenos.

En la entrada del Haliç ay una ancha kavena de una parte ala otra ke se topa en el norte de La Kula de Galata para defender la entrada de los vapores inimingos. Esta kula fue derokada en el anyo 1204 pero los Genovezos fraguadon una kula mueva alado de la vieja. Esta kula se yama La Kula de Galata i la Kula de Jezu Kristo. Ay tres vezes ke esta kavena fue pasada kon enganyo. La primera ves era en el 10 sieklo. En el anyo 1204 en el tiempo del 4 Cruzada, los vapores de Venedik pudieron romper las kavenas kon karnero (Ram). En el anyo 1453 el sultan de los Otomanso Mehmet II suvyo los vapores en unas tavlas mojadas de azete, paso los vapores por Galata al Haliç.

Dospues ke se entrego la sivdad a Fatih Sultan Mehmet, los gregos, la iglisiya grega ortodoxa, los gurdjis, los djudios, los merkantes italianos i otros non muslumanos enpesaron a bivir en el bodre del Haliç en lugares komo Fener i Balat.

En el bodre de la mar del Haliç ay parkes. I por su ermozura i su estoria vienen munchos turistos aya. En el tiempo de los Otomanos el Haliç era yeno de puevlo djudio, grego, ermeni i gurdjis.

El ponte de Galata auna Galata kon Eminonu. Enriva del Haliç ay otros doz pontes ke se yaman "El ponte de Ataturk" i "El ponte de Haliç".

Fina el anyo 1980 el Haliç se estava ensuzyando kon lo ke saliya de las fabrikas. En akel tiempo Bedrettin Dalan, el grande de la munisipalidad, prometio ke el Haliç lo va azer blu komo suz ojos. I en su tiempo lo alimpyo, i en el anyo 2000 parvinyeron a alimpyarlo por entero.

Vizyón del Korno de Oro desde la Kulá de Gálata
Enel sentro de la imaj, el ponte de Galata; a la siedra, el Sarayburnu, ande se topa el palasio de Topkapi, i diskues, de siedra verso la dirita de la imaj: Kilisia de Ayasofya, la Mishkita Blu, la Mishkita Mueva, la Kula de Beyazıt i la mishkita de Süleymaniye. La mar de Marmara i las isolas Princhipe se ven al fondo de la imaj; ala siedra se topan Kadıköy (la antika Kalsedonya) enel lado de Asya de la sivdad i la Kula de Konstantino