Muzeo Soumaya

Un artíkolo de la Vikipedya, la ansiklopedya líbera
(Redirijado de Muzeyo Soumaya)
Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

El Muzeyo Soumaya, mirado desde el ayre.

El Muzeyo Soumaya (en kastilyano "Museo Soumaya") es una institusion kulturala sin buto de benefisio, la kuala tiene dos fraguas muzeyolojikas en la Sivdad de Meksiko, una se topa en Plasa Loreto i la sigunda en Plasa Carso. El muzeyo esta dedikado al kudio, amostramiento, abediguasion i publikasion de la koleksiyon de arte de la Fondasion Carlos Slim, i aze es.huersos no solo a la publikasion de las sus propias ovras de arte, ma endemas amostras internasyonalas de otros muzeyos. El muzeyo es yamado ansina en onor de Soumaya Domit, la primera espoza del fondador del muzeyo, Carlos Slim, la kuala murio enel anyo 1999.[1]

Enel muzeyo se topan mas de 66.000 ovras de 30 syeklos de arte, las kualas van desde eskulturas de la kultura Mesoamerikana alkavo ala arivada de los espanyoles, pintura meksikana de los syeklos XIX y XX, i ovras de antikos maestros evropeos, espanyoles i amerikanos del arte moderno, komo por enshemplo Auguste Rodin, Salvador Dalí, Bartolomé Esteban Murillo i Tintoretto, entre munchos otros, por lo kualo esta konsiderado uno de los muzeyos de arte mas kompletos.

Fraguas[trocar | trocar el manadero]

Plasa Loreto[trocar | trocar el manadero]

El Muzeyo Soumaya de Plasa Loreto fue fondado enel anyo 1994. El lugar ande se topa oy endiya era enel syeklo XVI propiete de Hernán Cortés i diskues yego a ser un molino de trigo instalado por el su ijo, Martín Cortés. Al pasar las anyadas troko la su aktivitad, fina el syeklo XIX, kuando fue konformada una fabrika de papel. Enel anyo 1905 la fabrika fue kemada, por lo kualo el 13 de Oktobre de 1905, los sus duenyos, José Sordo i Agustín Rueda la vendieron a Alberto Lenz, de orijin alman. En 1906 le fue trokado el su nombre a Fábrica de Papel de Loreto y Peña Pobre; en esta fragua, en los anyos '40, Lenz instalo la primera planta para kriar papel uzando selulosa al sulfato de Amerika Latina.

Para las anyadas de los '80, la fragua tuvo otro insendio ke amato kaji toda la fabrika, por lo kualo las sus operasiones se yevaron al estado de Tlaxcala. Esto izo ke, a empesijos de los anyos '90, el Grupo de entreprisas Carso desinyara un prodjekto de amijoramiento en las ruinas de la fabrika, para trokarla en lo ke es oy endiya. Por modre de los lavoros de trokamientos de fabrika verso un muzeyo de arte, el muzeyo aresivio en 1996 un rekonosimyento de ICOMOS.

En 2014, al kumplir sus primeras 19 anyadas, el muzeyo aprerturo la amostra Paisaje Evropeo, ande se amostraron 50 ovras de Pierre-Antoine Demachy, Klaes Molenaer i Joost Carhelisz. De estas ovras, 24 eran muevas merkadas por el muzeyo.

Plasa Carso[trocar | trocar el manadero]

El Muzeo Soumaya de Plasa Carso se topa en la maale de Nuevo Polanco. Era aperturado el 29 de Marso del anyo 2011 por el presidente Felipe Calderón, kon la presensia del eskritor kolombiano Gabriel García Márquez i munchos otros personajes del mundo de las artes.

La fragua[trocar | trocar el manadero]

La fragua tiene un desen de vanguarda, el kualo es una estruktura brilyante kon forma asimetrika enplatada kon formas suaves, ke azen akordar de la ovra de Rodin. La fragua tiene una altesa de 46 metros i esta kuvijada por mas de 16.000 plakas de aluminio eksagonalas i kon una unika apertura, la puerta de entrada al muzeyo. El desen aze pareser ke las plakas estan flotando al deredor de la fragua. El tejado es semi transparente i aze entrar la luz del sol. Fue desenyado por el artkitekto meksikano Fernando Romero, kon el konsejo de Ove Arup i Frank Gehry. La fragua kosto unos 47 milyones de evros. El desen azer ke seya komparado con el de la fragua Selfridges en Birmingham, i kon el muzeyo Guggenheim de Bilbao.

El interior del muzeyo esta partajado en 6 plantas, las kualas estan atadas entre eyas por modre de asansores i una bajada eksterna en espiral. Djeneralmente, los vijitadores son kunvidados a suvir por el asansor i abajar por la espiral, ya ke el muzeyo no esta ordenado por tiempo ma por kateggoria

Entrada[trocar | trocar el manadero]

La primera parte de la fragua es la entrada, ande se topan —endemas de un primer espasio ande se topa El pensador de Auguste Rodin— la livreria, la Aula Digital Telmex, una butika de rekodros, un aron, espasios de pensamiento i kriasion, una biblioteka para mansevos i un auditorio kon 320 fotolyos.[2]

Esta primera parte es un espasio de kolor blanka, ansina komo todas las paredes del muzeyo. Aki endemas son organizados amostramientos temporales i evenementos, ansi komo alkunas ovras en grande formato:

Entrada del muzeyo.
Imej panoramika del Museo Soumaya.

Referensias[trocar | trocar el manadero]

  1. Biografía Carlos Slim Helú. (en lingua kastilyana)
  2. Museo Soumaya in Mexico City gets asymmetrical new building (en lingua inglesa)