Treno de alto prestor

de Vikipedya, la ansiklopedya líbera
Saltar a: navigación, buxcar
Japon: Shinkansen Series E5
Fransia: AGV
Almania: ICE-3
Espanya: AVE

Se yama Treno de alto prestor al medio de transporto ke viaja por una via disenyada para el (linea de alto prestor) i ke alkansa, de manera regular, un prestor má alto ke un tréno konvensional. Oy endia se uzan trenos kon un prestor superior a 250 km/o, i kon prestor promedio (o prestor komersial) tambien alto, ke les permite kompetir kon el transporto aereo para distansias medias, de entre 300 i 700 kilometros. En todos los kasos se trata de trenos i vias dezvelopadas en forma unitaria, déke las velosidades alkansadas presisan teknikas espesifikas.

Trenos de alto prestor aktuales[trocar | editar código]

Espanya[trocar | editar código]

En los anyos 60 en Espanya se empieso a aser provas de alto prestor, superando los 200 km/o kon un Talgo propulsado por una lokomotora de la Serie 352 de RENFE i anyos dempues kon el prototipo de la Serie 443 de RENFE, no se empieso a estudiar komo una propuesta real asta el anyo 1986 kuando el Ministerio de Transporto iva preparer el Plano de Transporto Ferroviario (PTF). Para el anyo 1992 se aperturo la prima linea de alto prestor en Espanya con una anchura de via de 1435mm. Endemas empiesaron a yegar las primas unidades de la Serie 100 de RENFE, treno derivado del TGV franses i ke puede alkansar un prestor maksimo de 300 km/o. Oy endia, Espanya tiene con una red de alto prestor en kresimiento i una grande kantidad de modelos de trenos de alto prestor, kon diferentes teknolojiyas i solusiones de dezvelopamiento propio (Talgo, CAF). Para el anyo 2010 el Governo de Espanya espera tener la má grande red de alto prestor del mundo, kon 2.230 km, má grande ke la de payises komo Japon o Fransia. Kon data 22 i 23 de Disiembro del anyo 2007 la linea Madrid-Valladolid y Kordoba-Malaga, fueron aperturadas al publiko. En Marso de 2008 kon retraso i salvando alkunos problemas estrukturales en la linea, tambien a sido inaugurada ofisialmente la linea Madrid-Barselona (ke ya unia Madrid con Saragosa, Tarragona i Lerida)

Korea del Sud[trocar | editar código]

En Korea tienen un treno derivado del TGV franses yamado KTX-I. Los primos 281 km de la linea de los 412 planifikados, a sido abierta a prinsipio de Abril del anyo 2004, entre Seul i Daegu. El KTX va alkansar un prestor de 300 km/o en esta prima seksyon. Los 131 km sigintes, ke van enlasar kon Busan, van ser aperturados enel anyo 2008. Asta oy endia, el KTX va fonksionar entre estas dos sivdades por la linea regular egzistente, ya ke a sido resientemente elektrifikada. Doze de estos trenos ivan ser konstruyidos en Fransia por Alstom i los otros treinta i katro restantes deben ser konstruyidos en Korea del Sud asigun los termos de un akódro de transferensia de teknolojiya.

Eslovenia[trocar | editar código]

En Eslovenia se uza el InterCity Slovenija, una versiyon del Pendolino ETR 480, kon tre lineas, Ljubljana-Zidani Most-Celje-Maribor, Ljubljana-Pivka-Divaca-Koper i una treséra ke une las sivdades de Divaca i Sezana kon la sivdad italiana de Venesia, serka de la frontiera entre los dos payises. La desision de uzar el Pendolino se debe a la nesesidad de augmentar el prestor sin tener ke fraguar muevas lineas en un paez ke esta yeno de montanyas, lo kualo muchigua el kosto i el tiempo de fraguamiento de muevas lineas de alto prestor. Los trenos viajan a prestores de asta 200 km/o.

Noruega[trocar | editar código]

En Noruega tambien se iva tomar la decision de uzar trenos kon teknolojiya pendular, má en este paez los trenos ivan ser dezvelopados por Adtranz-Bombardier, i la entreprisa noruega Strommens; el treno Signatur, de la Klasa 73 de los Trenos Noruegos, ke prestan servisio en las lineas OsloKristiansand-Stavanger i Oslo-Trondheim, a un prestor de 210 km/o. Del mismo modo ke en Eslovenia, la Repuvlika Sheka, Suesia, Portugal, Suisa, Finlandia y Ostralya, la desision de uzar un treno pendular se debe a la nesesidad de muchiguar el prestor sin tener ke fraguar muevas lineas, lo kualo va redusir el kosto i de aperturamiento de un servisio de alto prestor.

Japon[trocar | editar código]

Los japonezos fueron los pioneros del alto prestor ferroviario en el mundo kon el su treno bala o Shinkansen en la dekada de 1960. Todo empieso a mediados de los anyos sinkenta, kuando pensaron en konstruyir una mueva linea de trenos entre Tokyo i Osaka, las dos prinsipales sivdades del paez, para resolver el problema de la kapasita de la linea egzistente kon un amijoramiento grande de los tyempos de rekorrido. Mitsubishi, Kawasaki, Hitachi i Sumitomo se ivan asosiar para ke los trenos de alto prestor japonezos unieran desde 1964 las prinsipales sivdades japonezas a 300 kilómetros por hora. Oy el paez, kon 2.100 kilometros enkubiertos, tiene la má grande red de alto prestor del mundo.

Las lineas de alto prestor ke egzisten oy endia en Japon son:

  1. La linea Tokaido. Une Tokyo kon Osaka. Egziste desde 1964. El treno Kodama viaja a 250 km/o. El treno Hikari viaja a 270 km/o. El treno Nozomi viaja a 300 km/o
  2. La linea Sanyo. Une Osaka i Hakata. Egziste desde 1975. El treno Kodama viaja a 250km/o. El treno Hikari Railstar viaja a 300 km/o.
  3. La linea Tohoku. Une Tokyo i Hachinoe. Egziste desde el anyo 1982. El treno viaja a 275 km/o
  4. La linea Joetsu. Une Tokyo i Niigata. Egziste desde el anyo 1982. El treno viaja a 270 km/o
  5. La linea Nagano. Une Tokyo i Nagano kon trenos yamados Asama
  6. La linea Yamagata. Une Tokyo i Shinjo kon trenos llamados Tsubasa
  7. La linea Akita. Une Tokyo i Akita kon trenos yamados Komachi
  8. La linea Kyushu, k presta servisio en la adá del mismo nombre. Une Yatsushiro kon Kagoshima, kon trenos yamados Tsubame
  9. La linea Narita Express. Une a las sivdades de Takao i Ofuna kon el Aeroporto Internasional de Narita

Kina[trocar | editar código]

La Kina esta asiendo emportantes inversiones en trenos de levitasyon magnetika de alto prestor. Konosido komo Maglev Transrapid, el primo treno khino de alto prestor realisa el su viajio desde el Ayroporto Internasional Shanghai-Pudong a la sivdad de Shanghai a un prestor maksimo de 430 km/o en un viaje de 30 km en unos 8 minutos. El treno ofrese servisios desde el 24 de Marso de 2004.

Fransia[trocar | editar código]

Los franzeses ivan ser entre los pioneros en la investigasyon I dezvelopamiento de los trenos de alto prestor; de fákto, El TGV es uno de los trenos má prestos del mundo, prestando servisio en alkunos tramos a prestores de 320 km/h, teniendo el enrejistro de mayor prestor medio en un servisio de pasajeros i el de mayor prestor en kondiciones espesiales de próva, alkansando el prestor de 574,8 km/o enel anyo 2007. El 13 de Fevrero de 2006, el TGV franzes konsigio superar el su enrejistro de prestor en el tramo de Paris-Estrasburgo, alkansando 553 km/o. La su anterior marka es del anyo 1990, kuando alkanso los 515,3 km/o. El 3 de Abril del anyo 2007, un treno Alstom V-150 iva romper el enrejistro mondial de prestor de trenos al alkansar 574,8 kilometros por ora en uno de los tramos de la mueva linea de alto prestor de Paris a Estrasburgo. Esto fue realisada por la empresa ferroviaria franzesa (SNCF), la Red de lineas ferreas, propietaria de las vias, i el konstruktor del treno, Alstom. La potensia del treno iva ser augmentada, varios motores adisionales fueron kolokados enel treno i las ruedas eran má grandes ke las de un TGV normal, para ke se alkanzara un gran prestor sin kalentar má de lo normal la makina. Al mismo tiempo, sobro de la linea, la potensia elektrika iva ser augmentada I la estruktura ke alimentaba el treno iva ser reforsada, ansina komo el balasto, la kapa de grava ke se ekstiende sobro de la via delos trenos para asentar I asigurar sobro de eya las travesas. Todo este kon el fin de soportar las intensas vibrasiones.

Trenos ICE i Thalys en Bruselas

Italia[trocar | editar código]

Los trenos de alto prestor italianos son los ETR 500. En Italia los pasajeros disfrutan de los 250 kilometros por ora del Pendolino (ETR-460) desde el anyo 1976. Resientemente se iva aperturar la linea Torino-Milano. El primo tramo ke se aperturo enel anyo 1976 fue Roma-Florensia.

Estatos Unitos[trocar | editar código]

En Estatos Unitos tienen un treno pendular derivado del TGV franses yamado Acela Express, konstruyido por las entreprisas Alstom i Bombardier i ke presta servisio en el ‘’Korriedor Nordeste’’, entre las sivdades de Boston, Providence, Mueva York, Philadeplhia, Baltimore i Washington. Uno de los problemas ankontrados es ke las lineas uzadas son muy viejas i alkunas ivan ser fraguadas a finales de los anyos 1800s, por lo ke en alkunos tramos el prestor no es mayor de 140 km/o, afilu en otros se dezvelopa un prestor de 200 km/o.


Almania[trocar | editar código]

Los trenos de alto prestor almanes son los Inter City Express (ICE). El treno elektriko alman Inter City Experimental o Inter City Express (ICE), dezvelopado prinsipalmente por Siemens i Krauss-Maffei, iva alkansar enel anyo 1988 los 407 kilometros por ora. Aktualmente los trenos ICE prestan servisio por todo el paez, kon las versiyones ICE 1, ICE 2, ICE 3 i endemas las versiyones pendulante ICE-T i la versiyon de exportasion ICE 3 Velaro, del kualo Khina, Olanda i Espanya uzan oy endia, i ke Rusia va empiesar uzar en la su ruta en dezvelopamiento de Mosku a San Petersburgo.

Taiwan (Repuvlika de Kina)[trocar | editar código]

En Taiwan tienen un tréno derivado del Shinkansen 700 Series japonezo (Shinkansen 700T) yamado THSR, ke presta servisio entre las sivdades de Taipei, Hsinchu, Taichung, Chiayi, Tainan i Kaohsiung. Los trenos son fabrikados por las entreprisas japonezas Kawasaki i Nippon Sharyo. Los trenos viajan a un prestor de 300 km/o i empiesaron a prestar servis enel anyo 2008.

Portugal[trocar | editar código]

Los trenos de alto prestor portugezes son la versiyon del Pendolino ETR 460, yamados Alfa Pendular. En Portugal los pasajeros disfrutan asta 220 kilometros por ora entre las sivdades de Faro, Albufeira, Lisboa, Santarem, Pombal, Coimbra, Aveiro, Porto i Braga.


Otros trenos de alto prestor[trocar | editar código]

  • El governo de Arjentina, empieso la negosiasyon para el su primo Treno de Alto Prestor (TAVe en espanyol), del kualo el su fraguamyento va empesar a fines de Avril del anyo 2008, para akabar la prima etapa en el dosen semestre del anyo 2009, yegando a la sivdad de Rosario i en el 2011 a Kordova. El proyekto va unir las sivdades de Buenos Aires i Rosario en una distansia de 286 km. Endemas inkluye un dosen tramo ke va unir la sivdad de Rosario i Kordova, tambien de alto prestor. De esta manera, Arjentina va tener el primo treno de alto prestor de Amerika Latina.[1] El konsorsio Veloxia liderado por la franzesa Alstom (endemas integrado por la espanyola Isolux y las arjentinas Iecsa i Emepa ), se tomo las obras de la linea de alto prestor , sin tener ainda la aprobasyon teknika i ekonomika del governo Arjentino.
  • Sudafrika va tener tréno de Alto Prestor enel anyo 2010, la prima LAP afrikana. Se trata de un proyekto ke va tener un kosto de 2.100 milyones de euros. La mueva linea va ir desde Hatfield, Midrand, Marlboro i Sandton hasta Park Station, en Johannesburgo, I va tener un ramal asta el ayroporto de esta sivdad. La linea va operar desde el anyo 2010, asigun se el akódro firmado kon el konsorsio Bombiela. La mueva linea va tener 80 kilometros i diez garas, tres de las ke van estar debasho de la tierra. Una vez ke empiese a fonksionar, va permitir viajar en 57 minutos los 57 kilometros ke separan a Pretoria de Johannesburgo, mientras ke desde la kapital finansiera I el su ayroporto, el kualo se ankontra a 23 kilometros, los viajeros sólu van tener ke tadrar 23 minutos.
  • El Governo de Arjelia aperture el proseso de lisitasyon internasionala para el fraguamiento de la prima Linea de Alto Prestor de este paez. Se trata de un proyekto de fraguamyénto de una linea de dupla via ke va diskorrer entre las sivdades de Djemis Miliana i Borch Bu Arrerich, kon una distansia total de 320 kilometros. Endemas, va komunikar a las sivdades de Arjel, Buira i Beni Mansur.

El futuro[trocar | editar código]

Desde 1970 se favla de ke la proksima revolusyon en los trenos ivan ser los de levitasion magnetika. Pero hasta oy endia no era nada má ke eso: el treno del futuro. Má desde la medianoche del 31 de Diziembro de 2002 -el muevo anyo-, ora de Shanghai, este ya no es el treno del futuro I endagora es el treno del presente.

El treno Maglev, flota sobro de un motor magnetiko. Podemos dizir ke el treno es un grande iman. Debasho de el, en los "rieles", va un motor linear ke ase ke un flujo magnetiko vaya asia delantre. Este flujo magnetiko empuja al treno, lo levanta unos milimetros i dempues lo ase avansar. A diferensia de los trenos konvensionales, el motor no va en el treno, el motor va en los "rieles". Esto aporta ventajas:

  • Menor peso (el motor no va en el treno), menos barulyo (el motor no va en el treno i no egzisten rodas ke rozen kon el suelo, sólu un silensioso kampo magnetiko)
  • Komo no egziste rozamiento, se konsume menos energjiya. Por egzemplo, a 300 km/o, el treno de alto prestor ICE va konsumir 51 Wh por asiento. El Transrapid (Maglev de Shanghai) konsume 34 Wh/asiento
  • Komo los motores estan en las vias pueden aserse má o menos potentes de akódro kon la pendiente. El tren regular no puede aser este ya ke el motor lo yeva el i siempre es el mismo. Por eso el treno de alto prestor (TAP) no puede subir pendientes de má de 4% i el Transrapid puede subir hasta de 10%. I todu esto no es trivial. Uno de los kostos mayores de un TAP es la via, pues tiene ke ser muy rekta I kon chika pendiente, lo ke en munshos kasos emplika aser grandes tuneles o grandes viaduktos.
  • El ke el motor este en el suelo tiene la advantaja de ke el treno tiene menor peso, lo que as eke la su inersia es menor. De fákto, empiesa i para en munsho menos tiempo ke un treno regular TAP.
  • Deskarrilamiento. Kuando uno monta en un treno ke va a esos enormes prestores siempre piensa en ke va pasara si el treno deskarrila. En el Maglev el deskarrilamiento es kaji emposible, por la forma en la ke van los elektroimanes i los motores lineales.
  • El barulyo es poko déke no egziste rozamiento kon el riel. Má a alto prestor lo ke emporta es el barulyo aerodinamiko. El menor peso al no tener ke yevar el motor en el treno, permiten una amijor aerodinamika


Ya para el anyo 1994 otros payises konsigiron dezvelopar los proprios trenos Maglev, entre eyos Estatos Unitos, Kina, Fransia, Italia, Espanya i Korea del Sud. Oy endia, sólu la sivdad khineza de Shanghai tiene una linea en uzo "Maglev" ke une el sentro de la sivdad kon el aeroporto. El Maglev de Shanghai komunika el Aeropuerto Internasional Shanghai-Pudong, a 60 kilometros de la sivdad, kon la gara de metro de Longyang Lu, en las afueras de Shanghai, en sólu 8 minutos.


Referensias[trocar | editar código]

  1. Railway Gazette International

Enlasos eksternos[trocar | editar código]