YIVO

de Vikipedya, la ansiklopedya líbera
Saltar a: navigación, buxcar
Este artikolo uza la grafiya de Aki Yerushalayim para la lingua judeo-espanyola. Mersi muncho por mantener el artikolo uzando este estil.

Burós de YIVO en Manhattan, Mueva York

YIVO (en idish ייִוואָ), establesido enel anyo 1925 en Wilno, Polonia (oy Vilna, Lituania) komo el Yidisher Visnshaftlekher Institut (en idish ייִדישער װיסנשאַפֿטלעכער אינסטיטוט), o Instituto Sientifiko Djudio[1] (ייִדישער yidisher = Djudio o Idish, dependyendo del konteksto), es un instituto el kualo tiene el buto de servir de giador para la ortografiya, leksikografiya i otros estudios relasionados al idish. Anke diskues fue trokado el su nombre a Institute for Jewish Research, es konosido por las sus letras inisialas orijinalas en idish, las kualas konforman "YI-V-O".

Aktivitades[trocar | editar código]

YIVO konserva manuskritos, livros antikos i jurnales, ansina komo otros manaderos en idish. La su biblioteka en la sivdad de Mueva York tiene ma de 385.000 egzemplares,[1] los kualos alkunos son del syéklo XVI[2][3]. Los arkivos del YIVO guádran má de 24.000.000 de dokumentos, fotografiyas, gravasiyones, posters, filmos, i otros dokumentos en idish.[1] Endjuntos, eyos azen la má grande kolseksiyon de informasion relasionada a la kultura de los Djudios de Evropa Sentrala i Oryentala, endemas de los emigrantes verso la Amerika[1] Los arkivos endemas kontienen dokumentos en otras doze linguas, [4] komo inglez, fransez, alman, ivrit, djudeo-espanyol, polonez, i ruso [4].

YIVO endemas publika livros i revistas en idish komo YIVO Bleter [5] (fondado en 1931), Yedies Fun YIVO (fondado en 1929), i Yidishe Shprakh (fondado en 1941). Es endemas el ente kualo publika el YIVO Annual of Jewish Social Studies (fondado en 1946).

Istorya[trocar | editar código]

YIVO fue inisialmente propozado por el linguisto i eskritor Nochum Shtif (1879 – 1933). El konsiderava ke la su idea de uzar má el idish era ma praktika ke la visionaria de los "ebraistas" i la "asimiladora" de los djudios ke adoptaron el polonez o el ruso. Otros fondados emportantes fueron el filologo i direktor Max Weinreich (1894 – 1969) i el istoriador Elias Tcherikover (1881–1943).[6]

Fondado en una konferansa en Berlin, má kon las sus burós en Wilno—una sivdad en la Polonia Oyentala kon una grande komunita djudia, YIVO yegó a tener burós en Berlin, Varsovia i Mueva York. En la siginte anyada, alkunos grupos aparesieron en otras sivdades ande egzistian komunitas ashkenazis.

En las primeras anyadas de YIVO, el sinyor Tcherikover gió la seksiyon de piskisa istorika, en la kual endemas lavoraron Shimon Dubnow, Saul Ginsburg, Abraham Menes i Jacob Shatzky; Leibush Lehrer (1887–1964) dirijió una seksiyon la kuala iva inkluir los psikologos i maestros Abraham Golomb, H. S. Kasdan i A. A. Roback; Jacob Leshchinsky (1876–1966) gió la seksiyon de los ekonomistas i demografos Ben-Adir, Liebman Hersh i Moshe Shalit [7]; la seksiyon de lingua i literatura de Weinreich inkluía a J. L. Cahan, Alexander Harkavy, Judah A. Joffe, Selig Kalmanovitch, Shmuel Niger, Noah Prilutzky i Zalman Reisen. [8]

El avanse Nazi en Evropa Oryentala kavzó ke YIVO trokara las sus operasiones a la sivdad de Mueva York, kon un sigondo sentro establesido komo la "Fundación IWO" en Buenos Ayres, Arjentina. Un tresér sentro de aktivitades oy endiya es The Chicago YIVO Society. Parte de los arkivos i de los direktores de YIVO sovrebivieron a la Gerra. Por las sus propias razones, los Nazis se yevaron los arkivos de YIVO a Berlin, ande los dokumentos pasaron toda la Gerra i eventualmente yegaron a Mueva York diskues de eya, i todos los direktores de peskisa de YIVO ya bivian en Estatos Unitos d'Amerika kuando la Gerra empiesó o pudieron fuyir. [9]

Publikasiones[trocar | editar código]

YIVO tiene kriados o suportados munchos prodjektos de peskisa akademika, el mas resiente de eyos es The YIVO Encyclopedia of Jews in Eastern Europe, publikada en Marso del anyo 2008 endjuntamente kon la Yale University Press [1]. Basho la giada del editor shefe Gershon David Hundert, profesor de Istorya i de Estudios Djudios en la Universita McGill en Montreal, este es.huérso apresenta la istorya i kultura de los Djudios de Evropa Oryentala desde la su arivada ala rejion fina los muestros diyas, kon má de 1.800 artikolos los kualos amostran la relijion, folklor, politika, arte, muzika, teatro, lingua i literatura, lugares, organisasiyones, movimentos intelektualos i personajes emportantes, endemas de má de 1.000 imejes i mapas. Kon el lavoro endjunto de ma de 450 akademikos, la ansiklopedia kuvija la rejion entre Almania i los Montes Urales, desde ande 2.5 milyones de djudios emigraron verso la Amerika del Nord entre 1870 i 1920.

Endemas, YIVO apoyo la ma resiente edision del livro de Max Weinreich History of the Yiddish Language, editado por el Dr. Paul (Hershl) Glasser, endjuntamente kon la Yale University Press [2] i las edisiones del Groyser Verterbukh Fun Der Yidisher Shprakh (Gran Diksyoner de la Lingua Idish) desde el anyo 1961, kuando fue publikada la suprimera edision, asta la la katrena en 1980. El prodjekto, fondado en Mueva York, fue ofisialmente mudado a Yerushalayim, anke parese no sigir má aktivo.[10]

Referensias[trocar | editar código]

  1. 1,0 1,1 1,2 1,3 yivo
  2. YIVO Institute for Jewish Research | Brief Introduction
  3. YIVO Institute for Jewish Research | Overview of Library Collections
  4. 4,0 4,1 YIVO Institute for Jewish Research | Overview
  5. YIVO Institute for Jewish Research | YIVO in the United States
  6. Xablón:Cite book
  7. http://fr.wikipedia.org/wiki/moshe_Shalit
  8. Liptzin, 1972, 130, 133
  9. Liptzin, 1972, 3, 133
  10. http://shakti.trincoll.edu/~mendele/vol06/vol06.277


Ver endemas[trocar | editar código]

Commons-logo.svg
Klika akí para ver las imajes de Commons ensima de YIVO.

Atamientos eksternos[trocar | editar código]