Doladizo de Kadiz
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
El Doladizo de Kadiz, yamado endemas Koloso de Kadiz, hue un monumento antigo oy pedrido ke, asigun manaderos klasikos i medyevalas, se topava en la sivdad de Gadir/Gades (oy Kadiz) o en la rejion de la mar seka de eya. Djeneralmente es identifikado komo una grande estatua dedikada al dio fenisyano Melkart, ke dospues hue konosido komo Herkules en el mundo romano. El monumento hue destruido en tyempo almoravide, en el syeklo XII.
Orijon i estado istoriko
[trocar | trocar el manadero]Kadiz hue fondada por kolonos fenisyanos de Tiro a la fin del syeklo IX AEK. Desde su empesijo, la sivdad kedo atada relijiozamente a Melkart, dio de guarda de Tiro, lisionado kon la navigasion, el charshi i la proteksyon del su puevlo. En tiempo romano, Melkart hue identifikado kon Erkul, i ansina se formo el famozo kulto del Erkul Gaditano, mensionado por munchos eskritores klasikos.
El Doladizo o Koloso de Kadiz se mete en este konteksto relijozo i simboliko, komo un monumento ke se mirava desde la mar, ligada al ekstremo oksidental del mundo konosido en la Antikita.
Manaderos antikos
[trocar | trocar el manadero]Eskritores greko-romanos komo Estrabon, Filostrato i Silio Italiko avlavan del kulto a Erkul en Kadiz i de ovras monumentalas atadas a el, ama no dan detalyos teknikos klaros de la estatua. Las favladas mas largas vyenen de manaderos de la Andaluziya medievala, en espesyal:
- Al-Idriso (syeklo XII), en su livro Nuzhat al-Mushtāq, ande mensiona una grande estatua antika en Kadiz, uzada komo amulet.
- Ibn Abi Zar (syeklo XIV) i al-Himyárí (syeklo XV), ke agrandan el kuento kon leyendas, komo la kreyensia ke el monumento tenia guadrados arientro trezoros del rey Shelomo Ameleh (Sulayman).
Estos manaderos mesklan djeografiya kon leyendas, komo se avlaba muncho en la eskritura islamika medievala.
Deskripsyon del monumento
[trocar | trocar el manadero]Asigun los istoriadores, el monumento no era solamente una estatua, ama un kondjunto kon una kula de tres puerpos eskapado por una piramida kon la estatua enriva de eya. La altesa se kalkula entre 50 i 55 metros, d'akodro kon las medidas ke se topan en los manaderos arabos. La kula era de planta kuadrada de piedra ostionera, i vazia adientro. La estatua amostrava a Melkart en estil ayifsiano i era fraguada en bronze. Todo el kondjunto era kullaneado para evenementos relijiozos, de simbol i de la mar, dunke era un sinyo klaro para los navegadores ke entravan verso la baia de Kadiz.
Lugar
[trocar | trocar el manadero]
El lugar egzakto del Doladizo de Kadiz no es konosido kon seguransa. Es uzo lisionarlo kon el templo de Melkart/Erkul, ke munchos istoriadores kreyen ke se topava en la isola de Sancti Petri, a la entrada de la Baia de Kadiz, ama no se topan provas.
Destruyimiento
[trocar | trocar el manadero]Los manaderos de Andaluziya dizen ke el monumento hue destruyido en tyempo almoravide, serka del anyo 1145, por mando del governador de Kadiz Alí ibn ʿĪsà ibn Maymún. Las kavzas ke se dan es la leyenda de ke el doladizo tenia el trezoro de Bet Amikdash i pagar kon el al su armada kontro los amohades. Dospues de su destruksion, no se topo dingun trezoro i Kadiz hue konkistada por los almohades.
Estudios d'alkavo
[trocar | trocar el manadero]El investigador de la Universita de Malaga Manuel Álvarez tiene propozado ke la estatua no seriya Melkart, ama otruna ke estariya dedikada al rey Juba I de Numidia[1]