Eli Sharabi
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
_(cropped).jpg)
Eliahu (Eli) Sharabi (Tel Aviv, Israel; nasido el 13 de Fevrero de 1972) es un morador del kibuts Be'eri ke fue arrevatado durante la masakre de Be'eri, komo parte del atako del 7 de Oktobre de 2023 kontro Israel por parte de terroristos de Hamas. Fue liberto el 8 de Fevrero de 2025 komo parte del akodro de arretamiento del huego de 2025 entre Israel i Hamas, dospues de kedar arrevatado por 491 diyas. En la masakre, su espoza Lian i sus ijas Noya i Yahel fueron amortadas. El su ermano, Yossi, tambien fue arrevatado i amortado 100 diyas dospues.
Biografiya
[trocar | trocar el manadero]Sharabi nasio en Tel Aviv, en una famiya de orijin temani i marokana[1]; kuando era de edad de 14 anyos, el i su ermano Yossi arivaron al kibutz Be'eri komo moradores djuveniles. Ambezo en el kibuts i lavoro en diferentes postos, komo el de trezorero i koordinadero ekonomiko. Endemas de su hermano Yossi, tiene otro ermano, Sharon, i una ermana, Osnat Matalon.[2]
En Avril de 1995, Eli konosio a Lian Brisley, [4] una voluntaria ingleza de 20 anyos en el kibuts. Se espozaron en Djulio de 2000 en una chika seremonia de espozamiento íntima en Bristol, Reyno Unido. Tuvieron dos ijas: Noya (nasida en 2007) i Yahel (nasida en 2010).[3]
Evenementos del 7 de Oktobre
[trocar | trocar el manadero]Amanyana del 7 de Oktobre de 2023, unos 10 terroristos de Hamas entraron en la kaza de la famiya Sharabi en el kibutz Be'eri. D'akodro kon varios testemunyos, Eli i Lian dechidieron no opozarse a los terroristos kon el buto de guadrar la vida de eyos i sus ijas. Lian tento varias vezes amostrar a los terroristos ke eya tenia un pasaporto britaniko, esperando no ser arrevatada. En entendiendo ke iva ser arrevatado, Eli dechidio no opozarse a las aksiyones de los terroristos, kon la esperansa de ke no le iva afitar dinguna koza a su espoza i sus ijas.[4]
Los terroristos de Hamas amortaron a Lian (48), Noya (16) i Yahel (13) en la kaza de la famiya. D'akodro kon algunos manaderos ke dospues fueron refutados, Yossi Sharabi fue arrevatado ese diya i dospues amortado. Las Huersas de Defensa de Israel determinaron, kon yerro, la posibilita ke Sharabi puedia ser amortado kon la destruksiyon de una fragua ke se topava al lado de una atakada por aviones israelianos.[5]
Arrevatamiento
[trocar | trocar el manadero]Eli Sharabi surbivio 491 días arrevatado. Los primeros 52 diyas se topo en una kaza guadrada en Gaza, kon una famiya de palestinianos kolavoraderos kon Hamas. Dospues de esto, fue metido en los tuneles kakavados por Hamas en la Banda de Gaza. Dospues de ser liberto, avlo de las kondisiones en las kualas bivio en los tuneles, komo por enshemplo kedarse ambierto por diyas, ayre sin ventilar, mankansa de sanedad, aharvamientos i tener sus manos i piernas atadas kon una kuedra i dospues kon una kadena de fierro el tiempo todo.[6]
Mientres ke kedo en los tuneles de la Banda de Gaza, Sharabi topo otros arrevatados komo Ori Danino, Almog Sarusi i Hersh Goldberg-Polin, los kualos fueron amortados por Hamas en un tunel. La majorita del tiempo se topava kon Alon Ohel. Endjunto kon Or Levy i Alon Ohel, Sharabi ambezo inglez a Eliya Cohen, kullaneando el uniko livro ke toparon, un romanso de de Leigh Bardugo.[7]
Sharabi konto a los djurnalistos ke Alon Ohel i Eliya Cohen eran metidos en los tuneles mirando a os terroristos de Hamas komer mientres ke eyos no aresivian dinguna koza para komer. Sharabi reushito avlar kon algunos terroristos en arabo, lingua ke avla bueno por modre de sus orijin temani i marokano; en otros momentos, avlo kon algunos terroristos sovre las vidas personalas de eyos, ama tmabien los terroristos les amostraron filmikos de los amortamientos del 7 de Oktobre kon el buto de meterles espanto[8]
Liberasion
[trocar | trocar el manadero]El 8 de Fevrero de 2025, Sharabi fue echo liberto endjunto kon Ohad Ben Ami i Or Levy, komo parte del akodro de liberasion de arrevatados. Mientres ke los terroristos de Hamas enrejistravan el filmiko de su liberasion, partajaron kon el los haberes de la muerte del su ermano Yossi, ama no del amortamiento de su espoza i sus ijas fina arivar al punto de ankontro kon su ermano Sharon i su madre Hanna en el kibuts Reim. Pedrio mas de 30 kilos entre el dia ke era arrevatado por Hamas i su liberasion, arivando a Israel kon solamente 44 kilos.[9]
Dospues de la liberasion
[trocar | trocar el manadero]Dospues de ser echo liberto, Sharabi prinsipio las sezones de ayuda i sanamiento fisiko i psikolojiko. [16] Dospues de guadrar luto por su famiya, prinsipio una kampanya en suporte por la liberasion de los arrevatados ke ainda kedavan en los tuneles de la banda de Gaza i ke endemas, Hamas tornara los puerpos de los arrevatados ke amataron. En una entrevista kon el program de TBV israeliano Uvda, partajo las kozas ke bivio en los tuneles. Endjunto kon otros surbivientes, tuvo una seduta kon el prezidente Donald Trump em la Kaza Blanka i avlo en el Konsejo de Sekurita de las Nasiones Unidas.[9]
En May de 2025, la emprimeriya israeliana Sella Meir kito el su livro "Hostage" en el kualo partaja lo bivido arrevatado por Hamas. En la primera semana, vendio mas de 20.000 livrikos en Israel i aresivio la kategoria de "Livro de Oro".[10] El livro fue tresladado al inglez por Eylon Levy i kitado por Harper Influence (parte de HarperCollins) en Estados Unidos el 7 de Oktobre de 2025. La versiyon en inglez yego a la lista de los 10 livros mas merkados del New York Times y del Sunday Times el 20 de octubre de 2025.[11]
Ver endemas
[trocar | trocar el manadero]Referensias
[trocar | trocar el manadero]- ↑ ‘A light in the darkness’: Eli Sharabi shares his story of survival at first community event outside Israel. The Jewish Chronicle (en inglez)
- ↑ Eli Sharabi: Freed Israeli hostage describes 'impossible' hunger and painful conditions in Hamas captivity. Sky News (en inglez)
- ↑ Israeli hostage vowed to return to his family – only to find they had been killed. The Guardian (en inglez)
- ↑ Eli Sharabi: 'If I had known this would be the outcome, I would have fought in the shelter'. Israel Hayom (en inglez)
- ↑ Released From Hamas Captivity, a Hostage Finds His Family Gone. The New York Times (en inglez)
- ↑ אלי שרעבי "היה עמוק במנהרות", אחיו: "הוא עבר דברים שהעין והלב לא יכולים להכיל". YNet (en ebreo)
- ↑ Eli Sharabi breaks Israeli sales record with memoir penned after Hamas captivity. Jewish News (en inglez)
- ↑ What 491 days as a hostage taught me about Hamas. Washington Post (en inglez)
- 1 2 'I Have Come Back from Hell': Eli Sharabi Speaks to U.N. Security Council. CBN News (en inglez)
- ↑ Freed Hostage Eli Sharabi's Memoir Becomes Fastest-selling Book in Hebrew Literary History. Haaretz (en inglez)
- ↑ Eli Sharabi ‘Hostage’ memoir a bestseller in UK and USA Jewish News (en inglez)