Provensiya Otonoma Ebrea

Provensiya Otonoma Ebrea

Еврейская автономная область
ייִדישע אווטאָנאָמע געגנט

Ubikasion de Provensiya Otonoma Ebrea
Kapital	Birobidjan
Lengua ofisial	Ruso, Idish
Superfisie  - total  - % del paez	36.000 km²  %
Povlasion  - Total (2002)  - % del paez  - Densidad	190.915  % 5,3 hab./km²
Governador	Nikolay Mikhaylovich Volkov
Deputados al parlamento nasional
Sitio Web Ofisial de la Provensiya Otonoma Ebrea

La Provensiya Otonoma Ebrea (en ruso Евре́йская автоно́мная о́бласть - Yevreyskaya avtonomnaya óblast, en idish ייִדישע אווטאָנאָמע געגנט -yidishe avtonome gegnt; antikamente Repuvlika Otonoma Ebrea) es un oblast ubikado en el distrito federal del Leshano Oryente de Rusia, en la frontiera kon Khina. Tyene una ekstension de 36.000 km² i una povlasion de 190.915 abitantes (2002), de los ke de 1.2% a 16% es djudio, el resto es prinsipalmente ruso i ukraino. La su kapital es Birobidjan. La ekonomia se baza en la mineria (oro, estanyo, ferro i grafito) madera, agrikultura limitada i manufaktura lijera (prinsipalmente textiles, i prosesamiento de alimentos).

Sona oraria

La Provensiya Otonoma Ebrea esta ubikada en la sona oraria de la sivdad de Vladivostok.

Klima

El clima en el territorio es monsoniko kontinental, kon enveranos kalidos i umedos déke la influensia de los monsones de Asia Oryental i kon invernos kon vento, sekos i fríyos, shukur al Sistema de Alta Presion Siberiano.

Istoria

La Repuvlika Otonoma Ebrea iva ser fondada enel anyo 1928 komo el Distríto Nasional Ebreo. Fue el resultado de la politika nasional de Vladimir Lenin, mediante la ke kada grupo nasional ke formaba la Union Sovietika iva resibir un territorio en el ke iva tener otonomiya kultural en un marko sosialista. En este sentido, fue tambien la repuesta a dos supuestas amenasas al estado Sovietico: El djudaismo, ke iba en kontro del ateismo ofisial; i Zionismo, el ke iva en kontro de la visyon sovietika sobre nasionalismo. La idea era krear una nueva Zion Sovietika, ánde una kultura ebrea proletaria podria kreser. El lashon ofisial seria el idish, en vez del ivrit i unas muevas arte i literatura sosialistas ivan trokar a la relijion komo maksima ekspresion de kultura.

La Teoria de Stalin sobre la Kuestion Nasional sostenia ke un grupo sólu podia ser nasion si tenian un territorio, i komo no abia territorio djudio, los djudios no eran una nasion i no tenian diritos de nasion. Komunistas djudios opninaban ke la manera de dar solusion a este problema de ideolojiya era kriando un territorio djudio, de ay la motivasion para formar un óblast otonomo djudio. Politikamente favlando, era konsiderado dezeable kriar una nasion sovietika djudia komo alternativa al Zionismo i a la teoria propuesta por los Zionistas Sosialistas komo Dov Ber Borojov ke la Kuestion Djudia se podia resolver kriando un territorio djudio en Palestina. Ansina, Birobidjan fue emportante para proposes de propaganda komo argumento en kontro del Zionismo, ke era una doktrina ke rivalizaba kon el Marksismo entre djudios syédreristas. El impakto de la propaganda fue tan efektivo, ke miles de djudios emigraron asya Birobidjan desde fuera de la Union Sovietika, inkluyendo varios zyentos desde Palestina ke se abian iluzionado kon la idea.

Al pasar el tiempo, se puede dizir ke el eksperimento estaba kondenado al frakaso desde el bereshit. Otra meta emportante del proyekto de Birobidjan, era augmentar el numero de asentamientos umanos en el Leshano Oryente Sovietiko, espesialmente a lo largo de la frontiera con Khina. En 1928, praktikamente no ivan aber asentamientos en el area, mentras ke los djudios tyenian raises profondas en la parte oksidental de la Union Sovietika, en Ukraina, Byelorrusia i la propria Rusia. De fákto, inisialmente abian propostas de krear una Repuvlika Sovietika Djudia en Krimea o en partes de la Ukraina, má estas fueron rechasadas por temor de provokar penserios entre los no djudios de esas rejiones.

La jeografiya y el klima de Birobidjan eran ekstremos, i los muevos povladores ivan tener ke refraguar las sus vidas desde el bereshit. Alkunos an disho ke Stalin estaba tambien motivado por antisemitismo al seleksionar Birobidjan: el keria mantener a los djudios tan leshos de los sentros de poder komo fuera posivle. De todas maneras, debe de rekonoserse al su favor ke los ukrainios i los kriméos estaban opuestos a ke se kriara un estado djudio tomando parte del su territorio, anke la mayoria de los djudios sovietikos bivia ayi i avia muy pokas alternativas para el proyekto.

A pesar de los penserios, un chiko grupo de djudios empeso a yegar. Para los anyos 30, el Distrito Nasional Djudio fue promovido al estatus de Rejion Otonoma i una munsha propaganda fue distribuida para estimular mas djudios a bivir en Birobidjan. Alkunos de estos avisos inkluian los elementos tipikos de la propaganda sovietika del momento, la ke era posters i novelas en idish deskrivendo la utopia sosial ayi. Otros metodos eran un póko egztravagante. Por egzemplo, volantes promoviendo Birobidjan se lansaron desde un avion sobre una máale djudia en Bielorrusia. En otra okasion, una pelikula en idish produsida por el governo yamada Bushkadores de la Felisidad, akontaba la istoria de una familia djudia ke avia eskapado de la Depresion en los Estados Unidos para irse a bivir en Birobidjan.

A medida ke la poblasion djudia kresia, tambien kresio el impakto de la kultura idish en la rejion. Un jurnal en idish fue establesido, se krio una kompanyia de teatro y kalejas en la mueva sivdad fueron konstruidas i nombradas en onor a autores idish, komo Sholom Aleichem i Y. L. Peretz. Al mismo tiempo, se isieron esforsos para adaptar la kultura rusa a la idish: el mas notable de estos fue el intento de trokar el alefbet ebreo por el siriliko.

El eksperimento de Birobidjan yego a un alto a mediados de los anyos 1930, durante la primera kampanya de ekspulsiones. Shefes djudios fueron arrestados i amortados i eskolas idish fueron fechadas. Poko tiempo dempues de este, la Dosen Gerra Mundial influensio grandes esforsos para eliminar a los djudios. Dempues de la gerra reaparesio la idea de Birobidjan komo posible paez para los refujiados djudios. Durante este tiempo, la poblasion djudia de la rejion yego a ser kaji la tresen parte del total. Ándjak, esforsos en este sentido terminaron kon la aparision de una supuesta konspirasion kontro del liderazgo en la Union Sovietika, el establesimiento de Yisrael komo un estado djudio independiente i la dosen ola de ekspulsiones poko antes de la morte de Stalin. De muevo, shefes djudios fueron arrestados i se trato de eliminar la kultura idish; asta una koleksion djudaika en la biblioteka lokal fue kemada. Durante los anyos ke sigieron, la idea de una komunita otonoma djudia fue olvidada del todo.

Algunos estudiosos del tema komo Louis Rapoport, Jonathan Brent y Vladimir Naumov opinan en ke Stalin iva disenyar un plan para deportar internamente a todos los djudios de la Union Sovyetika asia Birobidjan, ansina komo el avia deportado internamente a otras menoriyas de Krimea i Alemania, huersando a miles a deshar sus kazas i famiyas.

Dempues ke iva deshar de egzistir la Union Sovyetika i muevas politikas de emigrasion, la mayor parte de la poblasion djudia del paez se fie a bivir a Almania, Estatos Unitos o Yisrael. En 1991, la Provensiya Outonoma Ebrea fue elevada al estatus de Repuvlika Otonoma, pero kuando esto okurrio, la mayoria de los djudios se avian ido del territorio i representaban menos del 2% de la povlasion. Oy endia, el idish se ensenya de muevo en las eskolas, egziste una publikasion semanal en iddish i ay una estasion de radio en idish. Alkunos observadores políticos, partikularmente akeyos simpatisantes de la kausa Palestina en el Medio Oryente van proponer resurjir la Republika Otonoma Djudia tanto como alternativa a Yisrael komo patria djudia, ansina komo una solusion permanente a los provlemas entre arabos y djudios. Esta idea ainda tiene ke demostrar ke a ganado apoyo signifikativo en la opinion internasional.

Un filmo dokumental yamado L'Chayim, Comrade Stalin! sovre la kreasyon de la Provensiya Otonoma Ebrea i el asentamiento de una kantidad de djudios fue lansado enel anyo 2003. Endemas de ser una istoria de la kriasyon de la propuesta komo paez para los djudios, tambien rekrea esenas de la aktual Birobidjan i tiene entrevistas kon residentes djudios.

Division Administrativa

Distritos

La Provensiya Otonoma Ebrea esta formada por los siguintes distritos (en ruso: районы):

• Birobidzhansky (Биробиджанский)
• Leninsky (Ленинский)
• Obluchensky (Облученский)
• Oktyabrsky (Октябрьский)
• Smidovichsky (Смидовичский)

Demografia

Povlasion (2002): 190.915

Grupos Etnikos: Asigun el senso del anyo 2002, el grupo etniko ruso kon 171.697 (89.9%) es el mas grande grupo; sigido por ukrainios kon 8.403 (4.4%); djudios, 2.327 (1,22%); tartaros, 1.196 (0.63%); i byelorrusos, 1.182 (0,62%). Los residentes se identifikan a si mesmos komo pertenesientes a 95 grupos etnikos diferentes.

Ver endemas

• Birobidzhaner Shtern