Fortuna yelada enel Oryente Medio de Deziembre de 2013

Un artíkolo de la Vikipedya, la ansiklopedya líbera
Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

La Fortuna yelada enel Oryente Medio de Deziembre de 2013 aze referensia ala fortuna yelada ke kavzo munchos danyos en la rejion del Medio Oryente en Disiembre de 2013, en Djordania, Turkiya, Kipre, Surya, Libanon, Israel, los territorios palestinos i Ayifto. La fortuna esta nombrada Alexa[1][2] por los djurnalistos i desho al su paso muncha destruksiyon i afekto a milyones de personas, espesialmente a los arifujiados de la gerra en Surya.[3][4][5]

Evenementos por payis[trocar | trocar el manadero]

Ayifto[trocar | trocar el manadero]

La sivdad kapitala de Ayifto, El Kairo, aresivio una nyevada (en la su majorita granizo blando) el viernes 13 de disiembre, la kuala, asigun los jurnales del payis, era la primera nyevada en 112 anyadas,[6] i se kreye ke la temperatura en la nochada basho fina 2° C (36° F). El Monasterio de Santa Katalina, enel Har Sinai, endemas era kuvijado por una kapa de nyeve.[7]

Djordania[trocar | trocar el manadero]

En Djordania, Ghazi Sarhan, portaboz de la administrasiyon djordana de los kampamentos de arefujiados de Surya, deklaro el 13 de deziembre ke "durante las ultimas 48 oras, 10.000 kuvijas i 1.500 kuzinas se entregaron a los arefujiados". En la sivdad kapitala del payis, Amman, kayo muncha nyeve,[8] i ainda el rey Abdulla II de Djordania dio el su ayudo para pushar un otomobil atrapado en la nyeve.

Israel[trocar | trocar el manadero]

La kapitala, Yerushalayim, kedo kon todas las sus kalejas blokadas por modre de la mas huerte fortuna de nyeve en anyadas; el su alkalde, Nir Barkat, demando de las Huersas de Defensa de Israel ayudo para la djente atrapada en los sus otomobiles blokados por la nyeve, mientres ke el governo demandava de los sitizenos ke kedasen en las sus kazas. El primer ministro yisraeliano Netanyahu la yamo una fortuna "unika enel syeklo".[9]

Una kaleja en Yerushalayim diskues de la fortuna.

Munchos kaminos kedaron blokados por la nyeve en las rejiones altas del payis, i muncha luvya kayo en las rejiones mas bashas. La fortuna kavzo ke el ayroporto Ben Gurion no aresiviese volos por unas oras, aziendo ke el Sekretario de Estado de Estados Unidos, John Kerry, deshase la su reunion kon el presidente de la Otoridad Nasyonala Palestina, Mahmud Abbas, en Ramala, para pueder aboltar a Israel antes de ke los kaminos i los ayroportos kedasen todos blokados or la nyeve. La sivdad de Yerushalayim kedo kitada del resto del payis por unas 48 por modre de unos 60 sm de nyeve ke kayo en la sivdad, endemas de los otomobiles ke kedaron parados en los kaminos, blokados por la nyeve.

Diskues de un primer diya kon poka nyeve, una huerte fortuna el 13 de Deziembre de 2013 yeno kon unos 40 i 60 cm (16-24 pulgadas) de nyeve en Yerushalayim, entre 60 i 100 cm (24 i 39 pulgadas) en las Alturas del Golan, i afilu 1 metro (3 pies 3 pulgadas) en la rejion de Gush Etzion. La nyeve kayo en Haifa por la prima vez en 22 anyadas. En rejiones mas bashas del payis se toparon luvyas muy fuertes ke kavzaron ke los rios i los wadis se yenasen i las sus aguas yenasen las otopistas i kalejas. La linea de treno Yerushalayim-Bei Shemesh-Tel Aviv lavoro en Shabbat (en Israel el transporto publiko es defendido en Shabat) por orden del govyerno para pueder kitar las personas ke kedaron sin pueder salir de la sivdad kon los sus otomobiles. El nivel del Kinneret, el prinsipal manadero de agua freska para el payis, kresio en 10 sm diskues de la fortuna.[10]

Kipre[trocar | trocar el manadero]

Para el 14 de Disiembre], Alexa kuvijo la kordiyera de Troodos de la isola kon nyeve. Las nyevadas empesijaron unos diyas antes, kon la nyeve yegando a unos 70 sm en las partes altas de la kordiyera de Troodos. Endemas de unos 40 kortes de enerjiya, Alexa desho isoladas varias viyas, entre eyas Armenohori, Farmakas, Kampi i Sina Oros, pedriendo estas el akseso a la elektrisitad por tiempo lungo.

Libanon[trocar | trocar el manadero]

Se aresivieron haberes de ke la Armada Libanesa era yamada para espartir ayudo de emerjensia a los arifujiados de Surya ke estan biviendo enel payis; asigun el Alto Komisionado de las Nasyones Unitas para los Arifujiados, se dono neft, kuvijas, kozinas i komida a unos 125.000 arifujiados.[11] D'akodro kon las deklarasyones de Abou Faour, echo publiko enel jurnal Al Nahar el 12 de Disiembre: "Tenemos unos 1.600 arefujiados de los kampamentos improvisados, endemas de 431 kampos no ofisyales, lo ke aze zor ayegar a estos lugares. Es por esto ke el govyerno libanezo demando el ayudo de la armada para azer ke la major kantidad posible de ayudo ayegase a los arifujiados".

Territorios Palestinos[trocar | trocar el manadero]

Ramala, Beit Lehem, Hevron i munchas otras viyas i sivdades kedaron kuvijadas kon nyeve; alkunas rejiones mas bashas sofriron kon la luvya huerte. La nyeve en Nablus i Hevron yego desde 60 a 145 sm, i en Beit Lehem entre 20 i 55 sm. La imej de la Plasa del Pesevre, la plasa ke se topa endjunto ala Kilisia de Noel, era la de un Noel blanko kon la plasa endiamantada i kuvijada kon una grande kapa de nyeve.

La Banda de Gaza fue azotada por las luvyas por tres diyas kontinuados, i sus goviernantes de Hamas disheron que unas 500 famiyas kedaron kitadas de las sus kazas inchadas de agua,[12] deke la fortuna atako la rejion kostera desde el 11 de Disiembre.

Surya[trocar | trocar el manadero]

El Alto Komisionado de las, las Nasyones Unitas para los Arifujiados (AKNUR) krio planos para el transporto de 40 toneladas de alimentos para 50.000-60.000 personas en la provinsia nord-oryentala de Hasakha desde Irak. El ayro-ponte de alimentos de emerjensia para diesenas de miles de personas en el nord-oryente de Surya, planifikado orijinalmente para el 12 de Disiembre; afilu, la nyeve kavzo ke el ayudo yegase tadre.

D'akodro kon Matthew Hollingworth, direktor para Surya del Programa Mundial de Alimentos de las Nasyones Unitas, los surios kitados de las sus kazas eskaparon de eyas kon pokas kozas, por lo kualo no tenian afilu la ropa o kuvijas para defenderse de las temperaturas bashas,[13] kon la nesesitad de neft para djenerar kalor i kozinar las komidas ke aresiven komo parte del ayudo umanitario. Asegun haberes aresividos, un ninyo i una kreatura chika fueron amortados a kavza del friyo el 12 de Disiembre, i un aktivista en la sivdad de Hara eskrivio para las adjensias de haberes ke los kazalinos azin un grande es.huerso para estar kalientes sin elektrisidad i sin pueder aresivir komida o neft..

Turkiya[trocar | trocar el manadero]

Dos diyas de nyevadas en la Turkiya kavzaron ke 240 volos internasyonales i endemas nasyonales el djueves 12 de Disiembre en los ayroportos de todo el payis, kon atrasos de varias oras, eskrivio la ayrolinea Turkish Airlines en su pajina web.[14]

Referensias[trocar | trocar el manadero]

  1. Tormenta “Alexa” crea caos en el Cercano Oriente. Deutsche Welle (en lingua kastilyana).
  2. Temporal «Alexa» paraliza Jerusalén y Oriente Medio (en lingua kastilyana)
  3. Ola de frío congela principales ciudades de Medio Oriente. Teleamazonas (en lingua kastilyana)
  4. Afectan nevadas y lluvias a países del Medio Oriente; dos muertos. La Jornada (en lingua kastilyana)
  5. El frío y la nieve acentúan el sufrimiento en Siria. Euronews. (en lingua kastilyana)
  6. Four fatalities and Jerusalem still sealed off, but Israel’s worst storm in decades over. Times of Israel. (en lingua inglesa)
  7. Cairo receives first snow in over 100 years, Jerusalem receives most in 50 years. San Francisco Examiner (en lingua inglesa)
  8. TORMENTA DE INVIERNO ALEXA CUBRE DE NIEVE ORIENTE MEDIO. TRT (en lingua kastilyana)
  9. ‘Once-in-a-century storm’ turns Gaza, Israel into ‘disaster area’. RT (en lingua inglesa)
  10. The Good News: Kinneret Rises by Ten Centimeters After Storm. Arutz Sheva(en lingua inglesa)
  11. ACNUR reparte ayuda a 125.000 refugiados sirios en Líbano ante tormenta Alexa. Terra. (en lingua kastilyana)
  12. A Winter Storm Brings Misery, Rare Snow To Mideast. NPR (en lingua inglesa)
  13. Winter Storm 'Alexa' Chills Middle East. VOA (en lingua inglesa)
  14. Winter storm "Alexa" chills the Middle East. New Straits Times. (en lingua inglesa)

Atamientos eksternos[trocar | trocar el manadero]