Janet Akyüz Mattei

Un artíkolo de la Vikipedya, la ansiklopedya líbera
Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

Janet Akyüz Mattei.

Janet Akyüz Mattei (2 de Djenero de 1943 – 22 de Marso de 2004) era una astronomista turko-amerikana ke yego a ser la direktora de la Asosiasion Amerikana de Miradores de Estreyas Variantes (AAVSO) desde 1973 fina 2004.

Biografiya[trocar | trocar el manadero]

Mattei nasio en Bodrum, Turkiya, ija de Bella i Baruk Akyüz, en una famiya de djudios turkos i ambezo enel American Collegiate Institute, en Izmir. [1]Diskues de eskapar el lise, se fue a bivir a los Estatos Unitos para ambezar en la Universita Brandeis[2] en Waltham, Massachusetts, por modre de una borsa. Diskues de eskapar los sus estudios, era konvidada para lavorar kon Dorrit Hoffleit enel Observatorio Maria Mitchell en Nantucket, Massachusetts.

Lavoro enel Observatorio Leander McCormick en Charlottesville, Virginia de 1970 fina 1972 i aresivio el su Maestrado en Astronomiya de la Universita de Virginia en 1972. Diskues de esto, se espozo kon Mike Mattei. Aresivio el su Ph.D. en Astronomiya en 1982, de la Universita de la Mar Egea en Izmir (Turkiya).

Karriera profesionala[trocar | trocar el manadero]

Durante la su karriera, publiko mas de 500 artikolos de sensia.[3] En las anyadas ke lavoro komo direktora del AAVSO, mas de 30 anyadas en total, arrekojio imajes de estreyas variantes echas por astronomos amatores de todo del mundo. Endemas, krio munchos programas de abediguasion entre astronomos amatores i profesionalos. Eya amostro muncho entereso en la edukasion, komo por enshemplo kon el prodjekto Hands-On Astrophysics (HOA),[4] enel kualo enkorajo el entereso en la astrofisika no solo en maestros mas tambien en elevos de lise, djenerando ansina munchos prodjektos de sensia. Basho la su giatura, la baza de datos de la asosiasion era echa de akseso libbero para maestros i endemas konsigio ke astronomos amatores aresivieran akseso al Teleskop Hubble.[5]

Akyüz Mattei aresivio munchos premios, komo la Medalya de los 100 Anyos de la Sosyete Astronomika de Fransia, en 1987; el Premio George Van Biesbroeck de la Sosyete Astronomika Amerikana, en 1993; el Premio Leslie Peltier de Astronomiya, en 1993; el primer Premio Giovanni Battista por el su apoyo a los astronomos amatores, el Premio de la Union de Astronomos Amatores Italianos, en 1995; y la Medalya Jackson-Gwilt de la Real Sosyete Astronomika, en 1995. El asteroit 11695 Mattei es yamado enel su onor. [6] Partisipo en varias konvensiones de la Liga Iberoamerikana de Astronomiya (LIADA)[7]

Muerte[trocar | trocar el manadero]

Murio de lusemia en Boston en Marso de 2004.

Referensias[trocar | trocar el manadero]