Octopolis i Octlantis

Octopolis i Octlantis son dos asentamientos no umanos morados por los pulpos (Octopus tetricus) en la baia de Jervis, en la Mueva Gales del Sud, Ostralya. El primo lugar, yamado "Octopolis" por los biologos, hue deskubierto en 2009.

Octopolis es un lecho de kaskas — prensipalmente de las vieiras — kon forma eliptika, de 2 a 3 metros de diametro en el su ekshe major, kon un solo artefakto antropogeniko, ke se kreye ke es pedaso de fierro viejo, adientro del sitio.

Los pulpos fraguan las sus kazas eskavando en el lecho de kaskas. Estas paresen dar un material de konstruksion muncho mijor para los pulpos ke el sedimento fino ke arrodea el lugar. Se yegaron a ver asta 14 pulpos en Octopolis al mizmo tiempo.

En 2016, se deskubrio un doseno asentamiento serka, yamado "Octlantis", ke no tiene objetos fechos por el ombre i puede abrigar un numero paresido de pulpos.

Ambos lugares se topan adientro del Parko Nasional Booderee. Algunos medios de komunikasion deskribieron estos lugares komo "sivdades" de pulpos, ma los investigadores ke lavoraron ayi konsideran ke esta komparasion es enganyoza.