Raquel Rastenni
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
,_Bestanddeelnr_909-4005.jpg)
Raquel Rastenni (Kopenhagen, 21 de Ogusto de 1915 - Skodsborg, Zeelandia, 17 de Ogusto de 1998), nasida kon el nombre de Anna Rachel Rastén, era una konosida kantadera de Danimarka.
Biografiya[trocar | trocar el manadero]
Raquel nasio en Kopenhagen en 1912 i bivio la su chikez en un apartamento chiko del sentro de la sivdad, en una maale prove. Los sus padres eran unos djudios rusos ke arivaron al payis enel anyo 1906. El su padre, Salomon Wolff Rastén (1889-1939) era shastre i la su madre, Elka Elkanowitz (1886-1972) era kuzendera. Tenia un ermano behor, Adolph, el kualo yego a ser djurnalisto, i la su ermana buchuka Lea.
Kariera[trocar | trocar el manadero]
Enel empesijo de la su kariera, lavoro komo bayladera en Elsinor en 1936 i komo kantante, prinsipio la su kariera enel anyo 1938, kuando kanto por la prima vez en la radio. Kanto kon diferentes orkestras enel empesijo del anyo 1940 i konformo el su trio de swing. Este mismo anyo, el su primer disko era publikado, i endemas se apresento en varias sivdades de Suesia. El 23 de Djunio de 1940, se espozo kon Harry Hirsch Rothstein, ijo del industrialisto Leib Rothstein i la su espoza Matel Liebe Salzmann.
Komo era djudia, desho Danimarka en Oktobre de 1943 kon la su famiya, kuando el payis era okupado por los Nazis, ansina komo azieron miles de djudios danezos, en la operasion yamada el salvado de los djudios danezos. Se kedo en Suesia fina 1945 ma en este payis kontinuo la su kariera kon reushita, kantando kon orkestras, era apresentada en chentros i en teatros de varietades. El su estil kuando kantava jazz era komparado kon el de Ella Fitzgerald.
En 1946, eya i Rothstein se divorsaron. La su kariera en Danimarka kresio i yego a ser la kantadera mas famoza del payis. Entre las sus kantikas kon mas reushita en la radio daneza se topan Vovsen i vinduet ("Kachoriko en la ventana") en 1953 i Heksedansen ("Bayle de brushas") en 1960. Ma la su kantika mas famoza era Hele ugen alene ("Siete diyas de solidumbre") en 1953, la kuala vendio mas de 120.000 kopias; esta kantika la izo la prima kantante daneza en aresivir un disko de oro. En las anyadas de 1970 prinsipio a ajustar kantikas djudias en sus diskos.
Durante la Gerra de Yom Kippur en 1973, kanto una kantika suportando Israel en ivrit i en idish. Vijito el payis varias vezes i en 1975 era enrejistrada enel yamado Livro de oro de Yerushalayim.
Dansk Melodi Grand Prix[trocar | trocar el manadero]
Kanto enel konkorso nasional de muzika enel anyo 1958, kedando enel primer lugar, i endemas enel anyo 1961, kantando kon Grethe Sønck la kantika Hjemme hos os (En la muestra kaza), kedando enel sinkeno lugar, i abolto enel anyo 1964, kuando kanto We speak the same language.
Evrovision 1958[trocar | trocar el manadero]
Diskues de ganar enel Dansk Melodi Grand Prix, era eskojida komo la representante de Danimarka enel Konkorso de Evrovision 1958 en los Payises Bashos, ande kanto Jeg rev et blad ud af min Dagbog (Aranki una oja del mi djurnal), kedando enel ocheno lugar.
Muerte[trocar | trocar el manadero]
En los anyos 1980 desho de kantar publikamente. Murio en Skodsborg, enel norte de Zeelandia, katro dias antes del su 83 aniversario. Desho una ija, Charlotte, la kuala nasio en 1963.
Referensias[trocar | trocar el manadero]
- Laursen, Carsten Michael (1999). ''Top-Pop: Navne i dansk pop 1950-2000"' ("Top-Pop: Names in Danish Pop 1950-2000"). L&R Fakta. ISBN 87-614-0086-6.