Siete maraviyas del mundo antiko
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
Las siete maraviyas del mundo antiko fueron un konjunto de ovras arkitektonikas i eskultorikas ke los otores gregos, espesialmente los del periodo elenistiko, konsideravan tan emportantes ke meresiyan ser vijitadas. La lista aktuala de las maraviyas no se krio en tiempos antikos, fina el sieklo XVI kuando el pintor olandez Maerten van Heemskrerck pinto siete kuadros apresentando a las siete maraviyas, las kualas eran: la Piramida Grande en Giza, las Guertas enkolgantes de Babilonia, el Templo de Artemisa en Efes, la Estatua de Zeus en Olimpia, el Mozoleo de Halikarnasus, el Koloso de Rodes i el Fener de Aleksandria. Estas maraviyas representan la mas alta reushita de la arkitektura, el arte i la teknika del mundo antiko, i ainda son un punto sentralo en la ambezadura de la istoria umana.[1]
La ekspresion «maraviyas del mundo» parese ser fruto de un yerro de tresladasion. Asegun Charles River, la idea non era la de ajustar ovras ekstraordinaryas ke despertaran admirasion, en grego thamata, ma una lista de «algo ke ver», theamata; una listado de monumentos o lugares ke kale vijitar.
Lista de maraviyas
[trocar | trocar el manadero]La Piramida Grande en Giza
[trocar | trocar el manadero]La Piramida Grande en Giza es la mas antika de las siete maraviyas del mundo antiko i la sola ke ainda egziste oy en diya. Fue fraguada en Ayifto sovre el anyo 2560 antes de la era komun komo tumba del faro Keops. Dita piramida fue echa kon grandes blokos de piedra i tiene una altesa orijinala de unos 146 metros. Su prezisyon arkitekturala amostra el alto nivel de konosenya teknika de la sivlizasion ajifsiana.
Las Guertas enkolgantes de Babilonia
[trocar | trocar el manadero]Las Guertas enkolgantes de Babilonia son una de las maraviyas mas misteriozas. D'akodro kon los tekstos antikos, se topavan en la sivdad de Babilonia, en Mesopotamia, i fueron fraguadas por el rey Nabuhadnezar II, en el sieklo VI antes de la era komun. Se kreye ke eran terrazas vedres kon arvoles i plantas, regadas por un sistem avansado de agua. No se tienen topadas provas arkeolojikas seguras de su egzistensia, lo ke aze de esta maraviya un tema de diskusion istorika.
La Estatua de Zeus en Olimpia
[trocar | trocar el manadero]La Estatua de Zeus en Olimpia fue una ovra grandioza del eskultor Fidias, echa en el sieklo V AEK. Se topava en el Templo de Zeus, en Olimpia, Gresia. La estatua representava al dio Zeus asentado en su trono i era echa de marfil i oro. Fue konsiderada una obra maestra del arte klasiko. Se kreye ke desaparesió probablamente por huegos o destruksion en el anyo 475.
El Templo de Artemisa en Efes
[trocar | trocar el manadero]El Templo de Artemisa en Efes fue uno de los mas grandes templos del mundo grego. Estava dedikado a la dioza Artemisa i fue fraguado en el sieklo VI AEK. El templo era famozo por sus kolonas de marmol i su grandeza. Fue destruido varias vezes por huegos i atakos, i rekonstruido repetadamente. Finalmente fue abandonado i desmantelado.
El Mozoleo de Halikarnasus
[trocar | trocar el manadero]El Mozoleo de Halikarnasus fue un aron monumentalo fraguado para el rey Mozolos, en el sieglo IV AEK, en la sivdad de Halikarnasus (oy Bodrum, Turkia). La fragua mesklo elementos de las arkitekturas grega i orientala, i era rikamente dekorado kon eskulturas. Del su nombre viene el biervo “mozoleo”. Fue destruyido por terremotos en la Edad Media.
El Fener de Aleksandria
[trocar | trocar el manadero]El Fener de Aleksandria, tambien yamado Faros, se topava en la isola de Faros, delantre del porto de Aleksandria, en Ayifto. Fue fraguado en el sieklo III AEK durante el reynado de Ptolomeo II. Servia komo giadera para los marineros i tenia una altura de mas de 100 metros. Fue danyado por varios terremotos i termino por derrumbarse completamente.
El Koloso de Rodes
[trocar | trocar el manadero]El Koloso de Rodes se topava en la isola del mizmo nombre, en la mar Ejea, i fue fecho en el sieklo tres AEK, para amostrar la huersa i la libertad del puevlo de Rodes. La grande estatua arepresentava al dio Helios, el dio del sol i protektor de la isola. Estava echa de bronze, kon una estruktura de piedra adientro, i se kreye ke tenia mas de trenta metros de altesa. Los marineros lo puedian mirar de leshos kuando se akerkavan al porto. Malorozamente, el Koloso no kedo muncho tiempo en pie. Un huerte terremoto lo derroto unos sesenta anyos dospues de su fraguamiento. Ainda roto i en el etaj, la djente veniya de munchas tierras para mirar sus pedasos.
Atamientos eksternos
[trocar | trocar el manadero]
- ↑ Tobin, Jennifer (June 23, 2011). Seven Wonders of the Ancient World. Recorded Books, LLC. ISBN 978-1-4498-3527-9 (en inglez)