Tanah de Servera
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
El Tanah de Servera es un manuskrito en ebreo dekorado del Tanah, konsiderado uno de los mas emportantes i mas ermozos manuskritos biblikos de la Edad Media. Fue kriado en el anyo 1299 en la sivdad de Servera, en Lerida (Katalunya), kuando la Peninsola Iberika estava ya basho el reynado kristyano.
Endagora, el manuskrito se topa guadrado en la Biblioteka Nasyonala de Portugal, en Lisboa.
Istorya
[trocar | trokar el manadero]El Tanah fue kopiado por el sofer Shlomó ben Abraham, i dekorado por el artista Yosef ha‑Tzarfati, artisto fransez ke morava i lavorava en Kastiya, asigun lo ke se melda en el kolofon del manuskrito. Fue aprontado para una komunita djudia sefardia, en un periodo de grande desvelopamiento kultural i relijiozo de los djudios en la Espanya.
La ovra se topava en el empesijo del syeklo XIX en los Paizes Bashos, para ande munchos djudios portugezos tenian emigrado durante el reynado de Dom Manuel I de Portugal, prinsipalmente dospues de la Masakre de Lisboa de 1506. Fue yevado verso Portugal por modre de António Ribeiro dos Santos (1745-1818), bibliotekario de la Real Biblioteka Publika de la Korte (fondada en 1796, oy endiya la Biblioteka Nasyonala de Portugal), la kuala lo merko en el anyo 1804 la por 240 mil reis.
Deskripsyon
[trocar | trokar el manadero]Kontiene el teksto kompleto del Tanah (Tora, Neviim i Ketuvim) i la Masora, endemas del masehet de filolojiya Sefer HaNikud, de David Kimhi, para ser uzado komo ayudo en meldando. Los sus desenes amostran la meskla de la tradisyon espanyola de estil andalusiano kon la enfluensya gotika franzesa. Las mikrografiyas, una teknika tipika djudia ande letras muy muncho chikas konforman figuras i desenes dekorativos, fueron echas por Yose Ben Gaon.
Emportansya kulturala i relijioza
[trocar | trokar el manadero]El Tanah de Servera es una prova emportante del alto nivel intelektual i artistiko de los djudíos sefardis avanti de la ekspulsion de los djudios de Espanya. Representa la kontinuita de la tradisiyon relijioza djudía i el dialog kultural entre djudíos i kristyanos en la Espanya medievala.
El Tanah oy endiya
[trocar | trokar el manadero]Oy endiya, el Tanah de Servera es konsiderado un trezoro nasyonalo i es ambezado por istoryadores, filologos i espesialistos en arte medieval. A vezes es amostrado en ekspozisyones espesyalizadas, i partes de el se topan dijitalizadas.
Ver endemas
[trocar | trokar el manadero]Atamientos eksternos
[trocar | trokar el manadero]- Lisbon's Hebrew Bible. Medieval Jewish Art in Context. November 22, 2011–January 16, 2012. Metropolitan Museum of Art (en inglez)