Templo de Erkul gaditano
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
El Templo de Erkul gaditano o de Melkart hue uno de los santuaryos mas emportantes del mundo fenisyano i romano. Apartenia a la sivdad de Gadir/Gades (oy Kadiz) i dedikado konsagrado al dio fenisio Melkart, ke mas tadre hue identifikado kon Erkul por los gregos i romanos. El templo hue famozo en toda la Antikita i fina la Edad Media.
Melkart
[trocar | trocar el manadero]Melkart era el dio de la sivdad de Tiro, en Fenisia. Su nombre kere dizir “rey de la sivdad”. Era dio del poder real, del charshi i la rikeza, del navigar i los kaminos de la mar, i del renaser lisionado kon el fuego i el siklo de la vida. Kuando los fenisianos fondaron Gadir, trusheron kon eyos la adorasyon a Melkart, ke se torno el dio prinsipal del lugar. En tiempos de grekos i romanos, Melkart hue identifikado kon Erkul, i ansi nasio el kulto del Erkul gaditano.
Orijin i fundasyon
[trocar | trocar el manadero]El templo hue fraguado por kolonos fenisianos de Tiro, probavlemente en el syeklo IX AEK, poko tiempo dospues de la fondasyon de Gadir. Era visto komo una ekstensyon del gran templo de Melkart en Tiro i, por modre de esto, tenia muncha emportansia relijoza i politika. Para los fenisianos, el templo de Gadir era uno de los lugares mas santos de todo el oksidente de la Mar Mediterranea.
Lugar
[trocar | trocar el manadero]La majorita de los istoriadores kreyen ke el templo se topava en la isola de Sancti Petri, a la entrada de la Baia de Kadiz. Este lugar era ideal para ser visto desde la mar, kon el buto de kontrolar el paso de los navegadores i para markar simbolikamente el fin del mundo konosido. Anke no se topan restos arkeolojikos, la tradisyon antiga i medievala lisiona klaramente el templo kon este punto.
Deskripsyon del templo
[trocar | trocar el manadero]Los otores klasikos dizen ke el templo era muy muncho diferente de los templos gregos:
- La su estruktura era muy muncho paresida al Templo de Yerusalayim.
- No teniya estatuas del dio adientro.
- En lugar de estatuas, se topavan dos grandes kolumnas a la entrada, ke munchos lisionaron kon Las Kolumnas de Erkul.
- Las puertas eran dekoradas kon los echos de Erkul.
- El fuego santo de Melkart no se arrematava.
- Los evementos relijiozos eran echos sin imajes, d'akodro kon los uzos fenisianos.
- El templo aresivia munchas rikezas de reyes i navegadores ke ofrian dones antes de salir a la mar.
El templo en los manaderos klasikos
[trocar | trocar el manadero]Munchos otores antikos mensyonan el templo:
- Estrabon lo deskrive komo uno de los santuaryos mas emportantes del oksidente.
- Filostratos favla de su antikita i del kulto sin imajes.
- Silius Italikus lo lisiona kon los viajes mitikos de Herkoles.
- Endemas, djenerales romanos, komo Aníbal, hueron al templo para fazer sakrifisios.
El templo en tyempos romanos
[trocar | trocar el manadero]Basho el Imperio Romano, el templo kontuneo fonksionando, ama trokando el kulto del dio fenisiano Melkart por el de Erkul. Ansina, el templo de Erkul Gaditano hue respektado, i el santuario konservo el su prestij. Gades se torno una sivdad rika, i el templo era una parte sentrala de su identita. Es muy muncho conosida la anekdota de Julius Sezar vijitando el templo i yorando avanti la estatua de Aleksandro Magno. Endemas, egzsistia la kreyensia de ke el templo guadrava la tumba del dio Erkul.
Dekayda i fin
[trocar | trocar el manadero]Kon la ekspansion del kristianizmo, el kulto pagano hue pedriendo huersa. No se save kuando egzaktamente el templo desho de fonksionar, ama en tyempo islamiko ya era visto komo una ruina antika. Solo kedo del konosido Doladizo de Kadiz una kula koronada por una estatua de Melkart, la kuala survivyo fina el syeklo XII DEK.