Zigurat
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
El zigurat es un tipo de fragua relijozo de la Antikita, fraguado en la rejion de la Mesopotamia, ande oy se topan Irak, parte de Suria i Iran. Los zigurates eran kulas altas en forma de eskaleras, echas de munchas plataformas una enriva de la otra. Estas fraguas se ambezaron a fraguar en el empesijo del milenio tresero AEK, sovre todo por los sumerios, i mas tadre por los akadianos, babilonios i asirios.
La fonksion prinsipala del zigurat era relijoza. No era uzado komo templo para el puevlo, ama komo un lugar sagrado ande se pensava ke morava el dio protektor de la sivdad. En la plataforma mas alta se topava un santuaryo chiko, dedikado a dito dio. Los sazerdotes suviyan al zigurat kon el buto de azer rituales, ofrimyentos i orasyones, kon la idea de aserkarse al syelo i al mundo divino.
Los zigurat eran fraguados de ladriyo krudo, sekado al sol, i a vezes rehuersados kon ladriyo kocho. Por kavza del klima i del materyal, munchos de eyos se destruyeron kon el tyempo. Uno de los zigurates mas konosidos es el de Ur, dedikado al dio de la luna Nanna. Oy en dia, los zigurates son un manadero importante para entender la relijion, la arkitektura i la organizasyon sosyala de las sivdades antikas de la Mesopotamia. Zigurates komo el de Ur, konservado djeneralmente bueno, amostra klaramente la forma tipika de estas fraguas i es uno de los mijores enshemplos de la arkitektura mesopotamika.
Probavlemente, la Kula de Babel mensionada en la Tora era un zigurat. D'akodro kon la tradision, dita kula hue fraguada por los ombres ke kerian yegar al syelo, ama Dio los kastigo konfondindo las sus linguas i esparsyendolos por la tiera. Munchos savedores kreyen ke la Kula de Babel estava inspirada en un zigurat real de Babilonia, probablemente el Etemenanki, un grande zigurat dedikado al dio Marduk. Esta istorya se troko en un simbol de la sobervya del benadam i de la diversita de las linguas del mundo.