Fatimata M'baye
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
Fatimata M'baye, (nasida en Kaedi, Mauritania, el 21 de Desiembre de 1955)[1] es una avokata mauritana, aktivista por los diritos de las mujeres i en kontro de la esklavedad. Espozada por la huersa kuando era de edad de 12 anyos, eya reushito ambezar en la eskola i el lise, yegando a ser en 1985, la primera mujer avokata del payis. En 1986 era aprezada i torturada por 5 anyadas. En 1991 izo parte de la fondasion de la Asosiasion Mauritana de Diritos Umanos, de la kuala es prezidenta desde Ogusto de 2003.[2] Tiene aresividos munchos onores internasionalos, entre eyos el Premio Internasional de los Diritos Umanos de Nuremberg en 1999[3], del kualo es la primera sitizena afrikana en aresivir este onor; en 2012 aresivio el premio Traffcking in persons report, del departamento de Estado de Estados Unidos, por los sus es.huersos en la gerra en kontro del trafik de seres umanos.[4]
Biografiya[trocar | trocar el manadero]
Fatimata nasio en una famiya Fulani, musulmana i preta del sud del payis.[5] Nasio en una viya del departamento de Kaedi i kresio en la sivdad de Nuakchott, en la kuala ainda bive. Era espozada por la huersa kuando era de edad de 12 anyadas, kon un ombre de edad de 45 anyadas, en una union akodrada entre las famiyas antes ke eya nasiera.[5] Kuando era de edad de 14 anyadas, pario la su primera ija. Kuando Fatimata kuenta ensima de la su vida, kuenta ke aresivio violasiones i era aharvada todo el tiempo. "Kada vez ke yo me eskultereava, los mis padres me azian aboltar ala kaza del mi espozo, deke ansina es la tradision. Ma un diya, le demandaron ke me deshara ambezar enel lise i la universita, i esto era lo ke me kito del mal."[6]
Desde los diyas de la eskola era siempre la eleva mijor de la klasa, i por eso, los sus padres le davan suporte para ke ambezara. Ambezo dirito en la Universita de Nuakchott entre 1981 i 1985, i diskues eskapo un Master en Dirito Partikolar,[6] aziendo kon eso de eya, la primera mujer avokata de la istorya de Mauritania. "Diskues de ser espozada por la huersa, i de ver munchas ninyas i mansevas por modre de la kortadura djenitala, no puedia eskojer otro kamino", tiene disho en munchas entrevistas kon los djurnales.[2] Prinsipio la su kariera lavorando komo avokata djeneralista, diskues ambezo diritos de las kreaturas i las mujeres. En 2013, anke otrunas mujeres ya eran avokatas, la unika ke lavorava en djuzgos era eya.[5]
Aktivismo[trocar | trocar el manadero]
En 1986, un grupo de intelektualos afrikanos publika la Deklarasion del Preto Mauritano aprezado. Esta deklarasion es diskutida en la konferensa de los payises no-alineados de Zimbabwe i el prezidente de Mauritania, Maaouiya Ould Sid'Ahmed Taya, demanda ke los otores del teksto seyan aprezados. Munchos profesores i elevos de universita eran aprezados, i la djente salio alas kalejas demandando la su libertad. Fatimata M'baye aprezada por 6 meses, por distribuyir notas en la prizion de mujeres de Beyla. Kuando salio de la prizion, avlo a los djurnales ke era aharvada.[2]
En 1991, izo parte de la fondasion de la Asosiasion Mauritana de Diritos Umanos, kon la kuala gerreya por los diritos de las mujeres i en kontro de la esklavitud: “Kuando eskuchamos de una mujer era violada, vamos todas las mujeres endjuntas a demandar enel djuzgo ”[6]
En 1989, un konflikto entre los guertelanos de Mauritania i Senegal, ke kaji se aze una gerra entre los dos payises, aze ke Mauritania kite a los sus sitizenos del otro payis. M'baye suporta a los mauritanos i la fondasion del "Komite de Bivdas" fondado por mujeres de militares i sitizenos matados entre 1989 y 1994. Es endemas la fondadora de la ONG SOS-Esklavas, i la kuala apresenta en Fransia un filmo dokumentario ensima de la esklavitud enel payis. [2] Es aprezada por 13 meses i kale pagar una djeza de 30.000 ouguiyas por kriar una ONG sin lesensia. Organizasiones internasionalas demandaron la su libertad.[7]
En 2005, la ONG de la kuala es presidenta, es rekonosida por el governo.[2] Diskues de esto, eya vijita kada dia mujeres i mansevos en las priziones del payis, suportando akeyos sin avokato,[8] ansi komo tiene organisada una kampanya en kontro del estupro dentro del kasamiento, el kualo no es un delikto en Mauritania.[5]
El 10 de Desiembre de 2015, el Konsejo Nasional de Avokatos de Fransia, i el Konsejo de Avokatos de Italia, dechiden fondar el "Observatorio Internasional de los Avokatos en Perikolo", del kualo los prezidentes son Fatimata M'baye i Robert Badinter.[9]
Eskapaduras[trocar | trocar el manadero]
Eskapo la primera kondena por eksplotasion de kreaturas, el primer juisio por esklavitud i el primer aprezamyento bazado en la Ley en kontro de la Esklavitud de 2007.[10]
Vida privada[trocar | trocar el manadero]
Era espozada por huersa kuando era de edad de 12 anyos, kon un ombre de edad de 45 anyos, por modre de un akodro entre las sus famiyas kuando eya ainda no nasia. Tiene tres ijos Salimata, Baba i Tidjan. A los 14 anyos pario la su primera ija, Salimata; kuando era de 16 anyos, pario a Baba, i a Tidjan lo pario kuando eya era de edad de 18 anyos.[5] A esta edad de 18 anyadas, reushito divorsarse, kon el suporte de la su madre.[5] En 2016, ya tenia sinko inyetos.[6]
Onores[trocar | trocar el manadero]
- Es la primera sitizena afrikana ke aresivio el Premio Internasional de los Diritos Umanos de Nuremberg.[3]
- Premio Traffcking in persons report, del Departamento de Estado de los Estados Unidos, por el su lavoro en kontro del trafik de seres umanos.[4]. 2012
- Medalya de oro de la sivdad de Grenoble.[3]. 2015
- El djurnal semanal Jeune Afrique la amostro en la lista de "Las 50 mujeres mas puederozas de Afrika"[11]. 2015
- Premio "Mujer korajoza" del Departamento de Estado de EEUU.[10]. 2016
- Premio "Koraje" del Consell de l’Advocacia Catalana[6]. 2016
Referensias[trocar | trocar el manadero]
- ↑ Resistencias: Fatimata Mbaye. “No comprendieron nada, nació una rebelde” (en lingua kastilyana)
- ↑ a b c d e Fatimata Mbaye. Jeune Afrique(en lingua fransesa)
- ↑ a b c Fatimata Mbaye médaillée d'or de la ville de Grenoble. Le Calame (en lingua fransesa)
- ↑ a b Me Fatimata Mbaye lauréate du prix Trafficking in Persons Report. Réseau Mauritanien d'Informations| (en lingua fransesa)
- ↑ a b c d e f Chaînes brisées. La Croix (en lingua fransesa)
- ↑ a b c d e “Se casan con niñas para moldearlas a base de palos”. La Vanguardia (en lingua kastilyana)
- ↑ Fatimata M'Baye - Human Rights Office of the City of Nuremberg (en lingua alemana)
- ↑ [http://www.mozaikrim.com/2015/01/maitre-fatimata-mbaye-la-tres-grande-dame-des-droits-mauritaniens.html Maître Fatimata Mbaye : La très grande dame des droits mauritaniens (en lingua fransesa)
- ↑ Un Observatoire international pour les avocats. Le Figaro (en lingua fransesa)
- ↑ a b Fatimata Mbaye, lauréate du Prix américain Femmes de Courage. (en lingua fransesa)
- ↑ Top 50 : les femmes les plus puissantes d'Afrique. Jeune Afrique (en lingua fransesa)
Atamientos eksternos[trocar | trocar el manadero]
- Fatimata Mbaye. "No comprendieron nada, nació una rebelde". Resistentes. 2015 (en lingua kastilyana)