La Kula de Galata
La kula de Galata fue fraguada en el anyo 528 i es el mas emportante sembol de Estambol. Es fraguada en el sentro de Galata. De la kula se puede ver el panorama del Haliç de el Bosforos i de Estambol entero.
La kula de Galata es una de las mas viejaz kulas ke existe en el mundo. Fue fraguada en el anyo 528 de parte del emparator de Bizans Anastasius. Se fraguo por kula de (fener) lampa. En la gerra kuatrena de Haçli seferi en el anyo 1204 fue gravamente derrokada. Mas dospues en el anyo 1348 se fraguo de parte de los Genovanos i se adjusto a las paredes de Galata kon el nombre de "la Kula de Isa". Kuando se fraguo de muevo era el monumento mas grande de la sivdad.
Entre los anyos 1445 – 1446 la kula fue ennaltesida. Dospues ke la kula paso alas manos de los Turkos kaji kada 100 anyos fue reparada. En el sieklo 16 fue usada por presion para los crisianos ke lavoravan en la tersana de Kasimpasha (Tersane es lugar ke se aze i se adova vapores).
Kon la otorizasion del rey Murat III se fondo aya un lugar de mirar las estreyas (rasathane) de parte del endevino Takiyuddin. Ma este lugar fue serrado en el anyo 1579.
En el prinsipio del sieklo 17, en el tiempo del rey Murat IV un sinyor Hezarfen Ahmet Çelebi kontrolo los ayres del Okmeydani, dospues de azer exersizioz de bolar, se izo unas alas de tavla, se las metyo a la espalda, i en el anyo 1638 se bolo de la kula de Galata fina Uskudar. Este volo fue arisivido kon muncho entereso en la Evropa. En la Ingilterre izieron monumentos amostrando el volo.
Dospues del anyo 1717 la kula fue uzada para ver el fuego. Para ke el puevlo sienta el fuego saliyan djente taniento davul i gritando ande aviya fuego.
En el tiempo del rey Selim III salyo otrun fuego i la grande parte de la kula se kemo. En el anyo 1831 salyo otrun fuego yene fue danyada i reparada. En el anyo 1875 en una fuerta furtuna le kayo el techo de la kula. En el anyo 1965 se empeso otro remparamiento ke se eskapo en el anyo 1967 i vino al estado ke esta agora.
