Mustafa Kemal Atatürk

Un artíkolo de la Vikipedya, la ansiklopedya líbera
(Redirijado de Atatürk)
Mustafa Kemal Atatürk

Mustafa Kemal Atatürk (nasyo 1881, Selanik; murio 10 de Novembre 1938, Estambol) era el fondador i el primer presidente de la Republika Turka. Se konta el padre del puevlo Turko.

Biografiya[trocar | trocar el manadero]

Atatürk nasyo en el anyo 1881, en una sivdad del Imperio Otomano nombrada Selanik. El padre senyor Ali Rıza i la madre senyora Zübeyde.

Dospues ke su padre muryo en su chika edad, el estudio en Selanik en la primera eskola nombrada Şemsi Efendi. Kontinuo su sigundo estudio en Rushtiye de la armada, i doespues en "Manastır Askerî İdarisi". Kontinuo suz estudios en el 1899 es Estambol en la eskola de la armada. En el anyo 1902 tomo el grado de piyade Teğmen, i en el anyo 1905 eskapo la fakulta de gerra kon el grado de Marshal.

El fue el primer presidente de governo turko ke kontinuo su posto en las munchas kadensias.

En el anyo 1919 empeso la bataya de salvar la patria fue kapachi de trokar la Turkiya i de adelantarla al modernizmo. El troko las vistimyentas i la eskriturya ke era en vyejo Turko, i ambezo la eskriturya Latina.

Mustafa Kemal Atatürk fondo el partido del puevlo (Cumhuriyet Halk Partisi) i el fue el primer presidente del partido.

El sirvyo en la armada Otomana i en la armada Turka. Dospues de la bataya de Sakarya en el anyo 1921 tomo nombradia de Gazi, porke fue firido del ojo, i tomo el grado de General. Fina el anyo ke muryo en el 1938 fue presidente del estado una detras de otro 4 vezez. Atatürk fue el primer i uniko presidente ke kontinuo el posto en maz largo tiempo.

En el anyo 1924 el 3 de Marso, en el Parlamento, todos los deputados kitaron una ley de alevantar todas las eskolas relijiosaz. I en el muevo governo todas las eskolas fueron debasho del komando del ministerio de edukasion. En la mezma data kitaron otra ley ke arondjaron afuera del pais a todos los miembros ke partisipavan en el governo Otomano.

En el tiempo de los reyes del governo Otomano aviya un dasio ke se yamava Aşar, en la data 17 de Febrero 1925 lo alevantaron este dasio para amijorar la situasyon de los fermeros, ke puedan ensembrar mas muncho trigo i zarzavat.

En la data 25 de Novembre 1925 kitaron una ley ke ovligaron a todos los miembros del Parlamento a vistir chapeyo i no vistir Fes komo era en el tiempo de los Otomanes. I el puevlo fue ovligado de kumplir esta ley.

En el 30 de Novembre 1925 ordenaron de serrar todos los templos i las meskitas ke orasyonavan. En el 13 de Disiembre 1925 trokaron la kalandaria para ke akonante a la kalandaria del mundo moderno. I aparte de esto las oras del diya es 24 oraz, i las mezuraz se izieron komo los paises de la Evropa para pueder komersiyar kon otros paises. Akseptaron la kalandaria ke el empesijo del anyo es 1 de Jenero 1926 i ke ay 12 mezes en el anyo. Tambien el pezo era Okka, en el tiempo de Atatürk se troko a kilo. La vida del puevlo empeso a enderecharse den diya en diya. Se trokaron los numeros ke todo era eskrito en el viejo Turko.

En el 20 de Septembre 1928, lo isyeron a Atatürk direktor de las todas las eskolas. I el ambezo al puevlo el muevo alefbet kon las letras latinas. En el 1935 troko el diya de repozo de la semana el lugar de viernez lo izo Shabbat dospues de midi i dia de alhad.

En 17 de Febrero 1926 metyo otruna ley para las famiyas ke los ombres se vana kazar solo kon una mujer, i no komo antes kon 3 o 4 mujeres. El kazamiento se iva kumplir en la munisipalidad.

En el 21 de Djunio 1934 ordeno ke kada famiya va tener un nombre komun aparte de kada uno su nombre.

En el 1937 empeso a kayer de salud, i en el empesijo del 1938 se deklaro ke teniya la hazinura en el ligado yamada Siroz. Munchos doktores de la sivdada i del etranjero no pudieron salvarlo. Atatürk muryo es Estambol en la data 10 de Novembre 1938 en la ora 9:05 dia de djuves en el palasyo de Dolmabahçe. Emprimero fue enterrado an Ankara en el Muzeo Etnografia, dospues de 15 anyos lo enterraron en El Mozoleo Anıtkabir ke se fraguo espesialmente para el.