Izabela de Gutmann
Izabela de Gutmann (Viena, 6 de Jenero de 1875 - Vitznau, 28 de Sietembre de 1947) era princhipesa governante de Liechtenstein por el su espozamiento kon Franzisko I, princhipe de Liechtenstein.[1]
Biografiya
[trocar | trocar el manadero]Izabela nasio Elisabeth von Gutmann en Viena, Imperio Ostro-Ungario, ija de Wilhelm Isak, Ritter de Gutmann i de su sigunda espoza, Ida Wodianer.[2] El su padre era un komersante djudio de Moravia, kon una entreprisa ke merkava karvon. Era yamado por los Habsburgo Ritter en 1878, titolo aresivido del imperador Franzisko Yosef I. Entre 1891 i 1892 era presidente de la Komunita Israeliana de Viena.
Arientro de la su famiya, era yamada Elsa.
Kazamientos
[trocar | trocar el manadero]Izabela se espozo en Viena kon el Báró madjar Géza Erős de Bethlenfalva (1866-1908),[3] ma el murio mansevo, sin deshar ijos.
En 1914, lavorando en la sosyete de ayudo para los soldados imperialos, konosio al princhipe Franzisko de Liechtenstein (1853-1938). El su ermano, el entonces princhipe governante Joan II no akodrava kon esta lision entre eyos. El 11 de Fevrero de 1929, diskues de ke el princhipe Joan murio, el princhipe Franzisko se konvirtio enel muevo princhipe governante de Liechtenstein, tomando el nombre de Franzisko I, deke el su ermano murio sin deshar ijos. El 22 de Djulio de 1929, Izabela i Franzisko I se espozaron en en Viena. No yegaron a tener ijos. La mueva princhipesa de Liechtenstein, komo era una djudia rika de Viena, era yamada por las otoridades nazis de Ostria komo un "problema". Anke Liechtenstein no tinia partito nazi, egzistia un movimento pro-nazi arientro del partito konservador Union Nasyonala.
El mismo día del su espozamiento, el su espozo fondo la Orden de Onor del Princhipato de Liechtenstein.
Izabela i Franzisko I eran los primeros princhipes del payis ke viajaron por el payis i avlavan kon la djente en la kaleja. Izabela vititava hazinos enel espital, se apresentava en los buros del governo i avlava kon los proves en las viyas, bushkando el modo de dar ayudo. Era la prima vez ke la espoza de un princhipe azia esto.[4] La Fondasyon Franzisko i Izabela para la Manseves de Liechtenstein ainda egziste enel payis.
Al empesijo de 1938, diskues del Anschluss o union de Ostroa kon la Almania Nazi, de edad de 84 anyos, el princhipe Franzisko I desho la korona, yamando al su primo tresero, Franzisko Yosef, el muevo princhipe Franzisko Yosef II, de edad de 31 anyos.
Anyadas ultimas
[trocar | trocar el manadero]Diskues de la muerte del su espozo, Izabela bivio en Semmering Pass, i kuando la Almania Nazi tomo kontrolo de Ostria, bivio enel egzilio en Suisa, ande murio en Vitznau en 1947. Eya era la primera princhipesa de Liechstenstein ke no era enterrada en Wranau (Chekia) ma en la mueva turba de la famiya reala, serka de la Katedrala de San Florian, en la kapitala, Vaduz.
Titolos
[trocar | trocar el manadero]- Desde el su primer espozamiento fina el 7 de Ogusto de 1908: baroneza Izabela Erős de Bethlenfalva.
- 7 de Ogusto de 1908 - 22 de Djulio de 1929: baroneza almana Izabela Erős de Bethlenfalva.
- 22 de Djulio de 1929 - 25 de Djulio de 1938: Su Alteza Serenísima la Princhipesa konsorte de Liechtenstein.
- 25 de Djulio de 1938 - 28 de Sietembre de 1947:Su Alteza Serenísima la Princhipesa Izabela de Liechtenstein.