Sidur

de Vikipedya, la ansiklopedya líbera
Saltar a: navigación, buxcar
Sidurim.

El sidur (en ivrit סידור‎) es el livro uzado por los djudios para meldar enel, kon el buto de azer orden (סדר, seder) al momento de arrogar i azer tefilá. Egzisten munchos tipos de sidurim, tanto para askhenazim komo para sefardim i las tefilot en eyos estan bazadas tanto en la Tora komo enel Talmud.

Enel sidur se topan todas las tefilot ke se dizen en shahrit, minha i arvit, ansina komo endemas otras tefilot espesialas para Shabbat i otras fyestas relijiozas. Para fyestas komo Rosh Ashana, Yom Kippur, Pesah, Shavuot i Sukkot es uzado otro tipo de livro yamado mahzor. Para otras fyestas komo Yom A'atzmaut, egzisten alkunos sidurim ke tienen las tefilot de este diya, ama egzisten otros livrikos espesiales.

Orijin[trocar | editar código]

Enel djudaismo, aparese el menester de meldar en la Tora (Vas servir a El Dio kon todo tu korasón i kon toda tu neshamá.[1]) i asigun la tradisyon, servir a El Dio "kon el korason" es la mitsva aktiva de meldar. En la Tora se topan tres formulas: las berahot de los kohanim,[2] dar shukur al ofreser las primisias[3] i la tefila ke es dicha kuando se da el segundo maaser.[4] Endemas puede bazarsen en lo ke se topa en Teilim[5] kuando David Ameleh kanta ke Por la tadre, demanyana i enel diya vo arrogar i El va eskuchar la mi boz.

Endemas de estas tefilot organisadas, el meldado es una aksiyon personal, asigun la Tora, ke era echa kuando la persona tenia menester de azerla, komo por enshemplo Moshe Rabenu[6] o David Ameleh.[7]

Enel Talmud se topa el menester i hobá de meldar, eskritos por Ezra Asofer i los integrantes de la Knesset Agedolá [8] los kualos reorganisaron la vida djudia dempues de tornar del egzilio de Babilonia.

Las tefilot estan eskritas en ivrit, anke egzisten sidurim kon el teksto tresladado a otras linguas para ser uzados por ken no melda ivrit.

Referensias[trocar | editar código]

  1. Dvarim 10:12.
  2. Bamidbar 6:24-26.
  3. Dvarim 26:5-10.
  4. Dvarim 26:13-15.
  5. Teilim VL, 18.
  6. Shemot 32.
  7. Divrei Ayamim 29.
  8. Beharot 33.