AMOS (satelit)
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
AMOS (en ivrit עמוס) es el nombre de una serie de satelits de komunikasiones yisraelianos. Los satelits AMOS son dezvelopados i konstruyidos por Israel Aircraft Industries i operados por la entreprisa privada yisraeliana Spacecom.
- AMOS 1 fue el primér satelit de komunikasiones yisraeliano. El su dezvelopamiento esta bazado en la eksperiensia aresivida kon los satelits de rekonosimyento Ofek, en kondjunto kon DASA i Alcatel Espace. Fue lansado el 16 de Mayo del anyo 1996 desde el Sentro Espasial Guayanez en Kourou, Guayana Fransesa por una raketa Ariane. Se topa aktualmente en servis para transmisiones de televizyón de tipo DBS/DTH por la entreprisa Yes i por HBO i otras en Evropa. Space Communications Ltd. (Spacecom) tuvo una gran reushita komersiala al kompletar la kapachitá de transmision de AMOS 1 pishín i endemás akumular dimandas adisyonalas, lo kualo motivó a la kompanyia a ampliar las sus aktividades i empiesar la kriasiyon de AMOS 2, del kualo es la únika propietaria.
- AMOS 2 fue lansado el 28 de Disiembre del anyo 2003 desde Baikonur, Kazakistan i da servisio a klientes en tres diferentes rejiones: el Medio Oryente (inkluyendo Yisrael), Evropa i la beira Este de los Estatos Unitos d'Amerika. Los servisios ke ofrese AMOS 2 son: Distribusiyon direkta de traduksiyones de TV i radio; traduksiyones de TV i radio a sentros de komunikasiones; distribusion de servis de internet i transmision de datos a redes de komunikasiones.
Amos 1 i Amos 2 se topan en el espasio el uno serka del otro, para kriar una ubikasiyon en komún, lo kualo permite a los uzuarios de ambos satelits aumentar las sus opsiones de komunikasion sin tener ke merkar o instalar chanakas adisionalas.
- AMOS 3 fue lansado el 24 de Avril del anyo 2008,[1] logrando empiesar la su operasiyon kon reushitá. El satelit, kon un kosto de 170 milyones de dolares, está disenyado para ofreser mayor kapachitá, kovertura i enlasos amijorados entre Evropa, el Medio Oryente i la Beira Este de los Estados Unidos. Va permaneser aktivo por los sigintes 18 anyos. AMOS 3 va sustituir al satelite AMOS 1. Está ubikado a 4°O en el Ekuador, al igual ke los sus ermanos Amos 1 i Amos 2.
- AMOS 5 fue lansado el 11 de Disiembre de 2011[3] i kuvija kon la su sinyal Afrika, ansina komo Evropa i Medio Oryente. Se topa en la lonjitud 17°E.
- AMOS 6 va ser yevado al espasio en 2016 i va trokar al satelit AMOS 2;[4] va ser fabrikado por Israel Aerospace Industries.