Camila Giorgi

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

---

Camila Giorgi en la Turnuva de Wimbledon de 2017.

Camila Giorgi (Macerata, Italia, 30 de Disiembre de 1991) es una tenista profesionala italiana. El su lugar mas alto enel ranking de la WTA es el N° 26 del mundo. Tiene ganadas 3 turnuvas de la WTA en la su kariera profisionala.

Biografiya

Famiya

Camila Giorgi nasio en Macerata, Italia. El su padre, Sergio Giorgi , es orijinalo de La Plata, Arjentina i es de orijin italiano; la su madre, Claudia Gabriella Fullone, desenyadora de moda, es arjentina, ija de italianos. El su ermano bohor, Leandro, esta ambezando kon el buto de ser aktor, i el su ermano chiko, Amadeus es djugador de futbol i djuega en la Serie D de la Liga Italiana. El su padre era soldado en la Gerra de las Isolas Malvinas. Camila es treinada por el su padre, mientres ke la su madre le aze los vistidos ke eya uza en las turnuvas de tenis. Es djudia, i yego a konsiderar azer aliya en 2012, diskues ke el su padre avlara kon los shefes de la Asosiasion de Tenis de Israel ensima de las kondisiones ke el demandava para la aliya de la su ija. Desde Sietembre de 2013, la famiya Giorgi bive en la sivdad italiana de Pisa.

Kariera

Junior

Diskues de amostrar entereso en la djimnastika artistika kuando era chika, Giorgi dechidio djugar tenis diskues de estar konvidada a un treinamento del su ermano, kuando era de edad de 5 anyos. El su padre, Sergio, dechidio ser el su treinador. Dos anyadas diskues, el shampion de la Turnuva de Fransia de 1976, Adriano Panatta, disho ke eya: "Es la prima vez ke djuego en kontro de una kreatura ke djuega komo André Agassi". Enel anyo 2000, era deskuvrida por el treinador de tenis Nick Bollettieri, el kualo ofrio siete meses de de treinamento en la su akademia, kantidad de tiempo ke solo tenia ofrido antes a Maria Sharapova. En Novembre de 2005, yego ala finala del Nike Junior Tour, ma pedrio en kontro de Zuzana Luknárová de Eslovakia. Giorgi endemas yevo ala finala de la Sey Development Cup en la Republika Sheka, i los ochenos de finala enel Astrid Bowl en Beljika.

Profesional

La su primera reushita komo tenista profisionala era en la Turnuva de la ITF de Katowice de 2009, desfechando a Ksenia Pervak en la finala.

2014

En Avril de 2014 en la Turnuva de la WTA de Katowice, Giorgi desfechando ala shampeona del anyo d'alkavo Roberta Vinci, ala israeliana Shahar Pe'er i Carla Suárez Navarro: ansina arivo ala su prima finala de la WTA, la kuala pedrio en kontro de Alizé Cornet en tres sets, diskues de tener un set point de en 5-4 enel tresero set. En Roma, Giorgi desfecho ala djugadora numero 10 enel ranking, Dominika Cibulková en la prima ronda, ma pedrio kon Christina McHale diskues de ganar el primer set. Giorgi finalmente desfecho a Alizé Cornet, la kuala era la dosena asembrada en la Turnuva de Estrasburgo, diskues de pedrer dos djuegos importantes kon eya. En la Turnuva de Francia, Giorgi desfacho a Bojana Jovanovski en la prima ronda, ma pedrio kon la shampeona de 2009, Svetlana Kuznetsova, en la dosena.

2015

Giorgi aresivio el su primer titolo del WTA Tour en la Turnuva de 's-Hertogenbosch de 2015, desfachando a Irina Falconi, la wild card olandeza Michaëlla Krajicek, a Yaroslava Shvedova en los kuatrenos de final, ande Giorgi salvo tres set points en el tie-break del set d'alkavo, ala favorita Kiki Bertens en las semifinalas i Belinda Bencic en la finala. En la Tuneva de Wimbledon, Giorgi era la asembrada No. 31 i desfacho a Teliana Pereira i Lara Arruabarrena en la prima i dosena rondas, respektivamente, ma pedrio kontro de Caroline Wozniacki en la tresera ronda.

2018

Enel empesijo del plazo de yerva de esta anyada, Giorgi era la ochena asembrada en la Turnuva de Nottingham, ma pedrio en la prima ronda kon Dalila Jakupović. En la Birmingham Classic, pedrio en la dosena ronda kon Océane Dodin. En la Turnuva de Eastbourne, era desfachada en la dosena ronda la prima asembrada, finalista en 2017 i shampiona d'avenir de la turnuva, Caroline Wozniacki. En la Turnuva de Wimbledon, Giorgi yevo a los katrenos de finala por la prima vez en la su kariera, ande pedrio kon la 25ª asembrada, la eks No. 1 del mundo, 6 vezes shampiona de Wimbledon i finalista d'avenir Serena Williams. Esta anyada, Giorgi arivo al lugar 26 de la klasifikasion de la WTA.

2021

Aziendo parte de la taifa de Italia en los Djuegos Olimpikos de Tokio, desfacho ala sinkena asembrada, Karolína Plíšková por dosena vez esta anyada en la tresera ronda. Ama era desfachada en los katrenos de finala por la katrena asembrada, Elina Svitolina, la kuala aresivio la medalya de bronse.

En la turnuva Masters de Kanada en Montreal, reushito por la prima vez en la su kariera en una turnuva WTA 1000 sin estar asembrada i la finala mas importante de la su kariera, deke no tenia djugado mas adelantre de la katrena ronda en dinguna turnuva de este nivel. Elimino tres djugadoras ke se topan entre las 25 amijoradas del mundo, la asembrada No. 9, Elise Mertens en la prima ronda, la asembrada No. 7, Petra Kvitova en la ronda de 16, la asembrada No. 15 Coco Gauff en los katrenos de finala i Jessica Pegula en la semifinala. En la finala, desfacho ala No. 6 del mundo, Karolína Plíšková, i ansina aresivir el su primer titolo WTA 1000, yegando a ser la shampiona kon el ranking mas basho en la turneva desde kuando Serena Williams, la kuala era la No. 80 del ranking, gano el titolo en en 2011. Kon esta reushita, Giorgi abolto toparse entre las amijores 40 djugadoras en la klasifikasion de la WTA, suvindo kaji de 40 lugares en la klasifikasion, desde el No. 71 al No. 33 del mundo el 16 de Ogusto de 2021.

Atamientos eksternos

• Camila Giorgi en la WTA (en inglez)
• Camila Giorgi en la ITF (en inglez)
• Camila Giorgi en la ITF Junior (en inglez)