Esnoga de Amsterdam

La Esnoga de Amsterdam, tambien konosida komo la Esnoga o la Esnoga Portugueza (en djudeo-espanyol: אסנוגה), o Snoge en lingua olandesa, es una esnoga sefardi del syéklo XVII en Amsterdam.

Orijin

Los djudios hueron ekspulsados en masa desde Espanya enel anyo 1492 por el Edikto de Granada. Munchos de los kualos se fueron a Portugal se tinian ke konvertir por huérsa al Katolisizmo enel anyo 1496, mientras ke los otros djudios fueron ekspulsados de Portugal enel anyo 1497. Por sienes de anyadas, la Inkisizion iva sigir persigindo a los konversos i los sus ijos, kreyendo ke ainda eran djudios de manera sekreta (Marranos, Xuetas, Bnei Anusim).

Alkunos de akeyos djudios ke kirian poder serliberos de sigir la su relijion, fueron i ankontraron rifujio en Amsterdam. Durante una grande migrasiyon en el syéklo XVII, esos arifujiados djudios se Espanya i Portugal se izieron yamar Djudios Portugezos para evitar ser relasionados kon Espanya, la kuala en esos dias estaba en Gerra kon la Repuvlika Olandeza.

Fraguamyénto de la Esnoga

En Diziembro del anyo 1670, la komunita sefardi de Amsterdam merkó el tyerreno para fraguar una esnoga i el su fraguamiento empiesó en Abril de 1671, basho la direksiyon del arkitekto Elias Bouwman. La esnoga fue kompletada en Ogusto de 1675.

La entrada de la esnoga tyene eskrito un pasuk de Teilim 5:8: "En la abundansia de la Tu amorosa kerensya, yo vo yir a la Tu Kaza". Endemas, esta eskrito "1672", el anyo en el kualo la esnoga se esperaba kompletar, i "Aboab", la alkunya del haham ke tuvo la idea de fraguar la esnoga.

La esnoga esta fraguáda sobro de palos de madeira i las bazas de la misma se pueden ver desde kualker nave enel agua por debasho de la esnoga. Egzisten otras fráguas ke rodean a laesnoga, komo la esnoga de envierno, burós i arkivos, kazas de alkunos hahamim el rabinato, la hevrá kadishá i la konosida biblioteka Etz Haim.

Durante la remuevasiyon en los anyos 1955-1959, el antiko auditorio de Etz Haim fue redesinyado komo una esnoga para el envierno, kon ayre kadjente sentralo i luses elektrikas. Las bankas fueron tomadas de una esnoga fraguáda orijinalmente enel anyo 1639, i el Aron Akodesh es del anyo 1744.

El piso de la esnoga tiene arenikas finas, sigindo la antika tradisiyon Olandesa, para absorber umedad, suziedad de los kalsados i endemás para aminorar el bruido i el barulyo de la kaleja.