Esnoga de Kochi
La Esnoga de Kochi o la Esnoga Paradesi es el kal mas antiko de la Commonwealth[1] i se ankontra en la sivdad de Kochi, enel estato de Kerala, en la India. El kal fue fraguádo enel anyo 1568 por la komunita djudia de la rejion de Malabar, ke antonses konformaba parte del Reyno de Kochi. Paradesi es un biervo uzado en munchas linguas de la India, la kuala sinyifika "ajenos", i se uzaba para el kal, dek era uzada por los "Djudios blankos", los kualos eran una meskla de djudios de Cranganore, del Medio Oryente i sefardim de Evropa. Es endemas konosida komo la "Esnoga de Mattancherry" i se ankontra en la máale djudia de Kochi i es la unika esnoga de las syete en la rejion ke ainda estan aktivas. El kondjunto esta konformado por katro fráguas i se ankontra serka del templo del Palasio de Mattancherry, en tyerra arregalada a la komunita djudia ("Malabari Yehuden") por el antonses Radjá de Kochi, Rama Varma. El palasio de Mattancherry i la esnoga komparten una pared.
Istorya
[trocar | trocar el manadero]Los djudios de Malabar eran una komunita prospera de komersantes de Kerala, i eyos kontrolavan una gran parte del merkato mundial del komersio de espesias. Enel anyo 1568, los djudios de Kerala fraguaron la Esnoga Paradesi en la sivdad de Kochi, ke endagora konforma parte de la sivdad de Ernakulam. la esnoga orijinala fue fraguada enel syéklo IV en Kodungallur (Cranganore) kuando los djudios eran los komersantes mas emportantes en la rejion de la beira de Malabar, endagora konosida komo Kerala. La esnoga fue dempues trokada a Kochi. La priméra esnoga de los djudios de Malabar en Kochi fue destruyida kuando los portugezes persigieron a los djudios de Malabar i a los Nasranis de Kerala en el syéklo XVI. La sigunda esnoga, fraguada basho la proteksiyon endjunta del Radjá de Kochi i los olandezes, es el kal ke oy egziste. Se yama "Kal Paradesi" o "Kal ajeno" deke fue fraguada kon adjuda olandeza kuando la sivdad fue basho la okupasiyon olandeza. Enel anyo 1968, el kal fyestó sus primeros 400 anyos, en una seremonia en la kuala se ankontrava la primera ministra de la India, Indira Ghandi.
Komposisyon sosyala
[trocar | trocar el manadero]La Esnoga Paradesi tinia tres klasas de myembros:
- LosDjudios blankos eran myembros kon todos los diritos. Estos, tambien yamados Djudios Paradesi, eran los desendyentes de sefaradim de Olanda i Espanya.
- Los Djudios pretos puedian meldar pero no tinian todos los diritos komo los blankos. Estos Djudios de Kochi eran los djudios orijinalos de la rejion.
- Los Meshuhrarim eran un grup de esklavos libberos, los kualos no tinian diritos en la komunita ni esnoga propia, se asentavan enel patin o en las eskalerikas ahuera del kal. Afilu a empesijos del syéklo XX, Abraham Barak Salem, un meshuhrar, izo eshuérsos kon reushitá en kontro de esta situasion.
Komo akontese en todas las esnogas ortodoksas, egziste una mehitsá ke aze la separasyon entre ombres i mujeres para meldar.
La Esnoga de Kochin es la unika esnoga de la sivdad kon un minyan, afilu este minyan se konforma kon djudios de ahuera de Kochi, deke no biven munchos djudios oy endiya en la sivdad. D'akodro kon las kostumbras i tradisiones Induistas, Nasranis i las Islamikas de Kerala, las personas kuando van meldar en la esnoga, entran sin los kalsados.[2]. Otros faktos unikos a la komunita de Kochi, los kualos son enfluensiados por la relijion Induista, son el uzo para kada hag de una kolor espesial para el diya, azer la milá en seremonias publikas i la distribusion de uvas perfumadas kon mirto en alkunos hagim. Endemas, los Djudios de Kochi to tienen hahamim i la komunita es giada por los mas aedados.
Objektos antikos
[trocar | trocar el manadero]La Esnoga Paradesi tiene Sifrei Tora, munchas koronas de oro, una tebá kon adornos de bronse i almenaras luksyozas de vidro belga. Endemas tiene platos de kovre ke fueron dados a Joseph Rabban, el primer Djudio de Kochi, enel syéklo X, eskritos en lingua tamil por el antonses radjá de Malabar. El patin de la esnoga esta echo kon zientos de tejas pintadas a mano echas en Kina enel syéklo XVIII, i kada una de eyas es unika. Endemas tiene un tapis oryental regalado por Haile Selassie, el ultimo Imperador de Etiopia[3] . Unas de las partes de la esnoga mas konosidas es la kulá, del syeklo XVIII, la kuala fue restorada entre los anyos 1998 and 1999.[4]
Ahuera del kal se topa una tableta ke era de la esnoga orijinala (fraguada enel anyo 1344) i la kuala dize ke la esnoga fue fraguada enel anyo 5105 del kalenderio djudio komo una kaza para meldar i arrogar a El Dio.
Esnoga de Thekkumbhagom
[trocar | trocar el manadero]Otra esnoga de la sivdad de Kochi, la esnoga de Thekkumbhagom, se ankontra en la kaleja "Jews Street" en Ernakulam i fue fraguáda enel anyo 1580 i dospues amijorada enel anyo 1939.[5]
Ver endemas
[trocar | trocar el manadero]Referensias
[trocar | trocar el manadero]- ↑ The Paradesi Synagogue, Cochin, India. Database of Jewish Communities, Museum of the Jewish People. Accessed online 13 February 2007.
- ↑ Cochin Jews, Overview Of World Religions, Philtar, St Martin's College (UK). Accessed online 13 February 2007.
- ↑ Photographs and Video Clips from South India, Easter 2003, Religious Education, Staffordshire Learning Net. Accessed online 13 February 2007.
- ↑ Repairs and Planning Begin for Paradesi Synagogue in Cochin, India, Jewish Heritage Report, Vol. II, Nos. 1-2 / Spring-Summer 1998. Accessed online 13 February 2007.
- ↑ Cochin battles to save its shul. Djurnal Jerusalem Post. Por Michael Freund
- The Paradesi Synagogue, Cochin, India. Database of Jewish Communities, Museum of the Jewish People.
- Photographs and Video Clips from South India, Easter 2003, Religious Education, Staffordshire Learning Net.
- Paradesi Synagogue, Frommer's Review, New York Times
- Cochin Jews, Overview Of World Religions, Philtar, St Martin's College (UK).
Enlasos ekxternos
[trocar | trocar el manadero]
- WMF - Paradesi Synagogue, Cochin archived February 14, 2005 on the Internet Archive
- Pictures of the Paradesi Synagogue, Cochin