Fortuna Calvo-Roth

Fortuna Calvo-Roth es una djurnalista i akademika amerikana nasida en la sivdad de Paris, Fransia, en una famiya sefaradi de la Turkiya

Eya se krio kon la su famiya en la sivdad de Lima, Peru i se fue a bivir a los Estados Unidos enel anyo 1952 para estudiar para ser djurnalista en la Universita de Missouri; dempues de esto, torno a Peru para empesijar la su karriera komo eskritora. Fue empiegada por el djurnal "La Prensa", el kualo fue kriado bazado enel New York Herald Tribune. má dempues de tres diyas el editor shefe del djurnal le disho ke no iva empiegar mujeres en la sala de prensa i en troko de este, la iva empiegar en la seksiyon de sosyeté. Eya no achetó.

Un anyo dempues eya fue empiegada por la revista Visión, lavorando komo la korresponsala en Mueva York para la edisiyon de Brasil. En una de las sus asinyaturas entrevistó al antonses Ministro de Finansas de Peru, el kualo era el mismo ke no la kijo empiegar en "La Prensa". El no se akodrava ken era eya, ma kuando el demando deke eya no lavorava en Peru, eya pishín le izo akodrar del fakto. Eya lavoró en la revista por 12 anyos, yegando a ser la editora shefa de la edisiyon en espanyol, ma deshó la revista enel anyo 1969 para kriar los sus ijos. Dempues eya estudio en la Eskola de Artes de la Universita de Mueva York, estudiando filmo, televizyón i radio; endemas estudio aktuasion kon Stella Adler i fue aktrisa en un episodio de la serie 'The Blacklist'. Tambien lavoró en la ambasada de Israel en las Nasiones Unidas durante la anyada de los 50, espesialmente por la Gerra del Sinai de 1956.

En la anyada de los 80 fue profesora de politika en NYU i Hofstra, endemas de asosiarse para kriar el kanal 2 de la televizyón peruana i "Vista", una revista para latinos en los Estados Unidos.

Referensias

• New York Daily News, "Big Town Big Dreams", p. 28, June 6, 2007.