Instituto Ma'ale Adumim

Un artíkolo de la Vikipedya, la ansiklopedya líbera
Ir a la navegación Ir a la búsqueda

El Instituto Ma'ale Adumim para la Dokumentasion del Ladino i su Kultura (en ivrit: מכון מעלה אדומים לתיעוד השפה הספניולית ותרבותה) es un instituto para la investigasion i konservasion[1] de la lingua djudeo-espanyola i la kultura sefaradi fondado en el anyo 1992 kon la inisiativa de la asosiasion "Sefarad" i de la munisipalidad de Ma'ale Adumim. Su direktor es el eskritor Avner Perez.

Entre los butos del Instituto se topan:

  • Arekojer toda la dokumentasion eskrita de la Kultura Sefaradi i de la Lingua Djudeo-espanyola, komo por egzempio material istoriko (livros i manuskritos)[2] i puvlikasiones sientifikas i populares en otras linguas ensima del Ladino i la kultura sefaradi.
  • Aprontar katalogos informatizados de los diversos aspektos de la kultura Djudeo-espanyola.
  • Puvlikar livros i otras puvlikasiones del kampo de la kultura Djudeo-espanyola, komo muevas edisiones de ovras literarias en Djudeo-espanyol, puvlikasiones sientifikas i populares, kasetes i otros materiales de estudio.
  • Ovrar para la difuzion de la erensia kulturala Djudeo-espanyola en las eskolas i ansi ke del publiko en djeneral por medio de diyas de estudio i kongresos en su raiz en Ma'ale Adumim i ayudando a elevos a prezentar tezes sovre temas atados a esta erensia.
  • Enkorajar la investigasion i el lavoro sientifiko kon la dokumentasion arekojida, metiendola a la dispozision de investigadores de Israel i del etranjero.

Ademas, el Instituto Ma'ale Adumim tiene una biblioteka kon livros en Ladino, eskritos kon letras rashi i puvlikados en los ultimos syeklos en los prinsipales sentros kulturales de las komunidades sefaradis, endemas de manuskritos, livros de literatura populara Djudeo-espanyola kontemporanea, livros en otras linguas ke tratan del Ladino i de la su literatura, i otros livros ke tratan de la istorya de las komunidades sefaradis, dempues de la ekspulsion i otros ramos de la kultura sefaradi. Esta biblioteka ya tiene unos 900 livros en la lingua Djudeo-espanyola, una de las koleksiones mas grandes del mundo de livros en esta lingua.

Puvlikasiones[trocar | trocar el manadero]

El Instituto Maalé Adumim tiene puvlikados[3] los livros:

Proyektos[trocar | trocar el manadero]

Oy endiya, el prodjekto mas emportante del Instituto es aprontar un katalog enformatik de la koleksion de kantikas Djudeo-espanyolas de Kol Israel ke va deshar a obtener kolay kolay toda la enformasion dezeyada ensima de estos kantes, inkluzo sus tekstos i sus enrejistramientos de boka de los enformantes ke los kantaron. Otro prodjekto es el de informatizar la grande koleksion de refranes Djudeo-espanyoles ke se topa en los arshivos del instituto.

Referensias[trocar | trocar el manadero]

  1. Will Ladino Rise Again?. Por Lorne Rozovsky, Chabad.org
  2. Ladino Today. Por Aviva Kushner. MyJewishLearning.com
  3. Aki Yerushalayim: Instituto Maale Adumim para la dokumentasion del ladino i su kultura

Enlasos eksternos[trocar | trocar el manadero]