La Djuderia de Hervas

Un artíkolo de la Vikipedya, la ansiklopedya líbera
Ir a la navegación Ir a la búsqueda
Kaleja ke se topa en la Djudería de Hervas.

La Djudería de Hervas era una máale djudia en Hervas (Kaseres) avitada por djudios desde el syéklo XII fina 1492, kuando fueron arrondjados de Espanya por modre del Edikto de Granada sinyaturado por los Reyes Katolikos. Oy endiya, ainda es yamada ansina.

La maále[trocar | trocar el manadero]

La máale esta echa de kalejas estrechas i kazas kon balkones, echas kon madera de arvole de kastanyo, granito i adobe. Se topa desde la Plaza verso el rio Ambroz. Ainda se topan los nombres (en kastilyano) de las kalejas Sinagoga, Rabilero o Cofradía; ma anke ainda no kedan sinyos de la esnoga, la tradision dize ke se topava en la kaleja Rabilero, num. 19. En esta frágua, egzistía una kamareta ke salia ala kaleja, ma fue kitada enel anyo 1949. Otras fráguas liasionadas kon la komunita djudia son la Kaza de la Cofradía, la kuala tiene lagar i almazara ariéntro, i el espital de Benefisensia, kudiado por ijos de anusim i ke se topa en la kaleja del Vado.

Diskués del Edikto de Granada en 1492, munchas famiyas djudias fueron a Portugal i otras se izieron kristianas, konformando la Cofradía Católica de San Gervasio y Protasio, la kuala diskués kriaría la Cofradía de Nuestra Señora de la Asunción de Aguas Vivas. Los djudios lavoravan prinsipalmente komo chapineros, kurtidores de piel, shastres, merkaderes de telas, eskrivanos i emprestadores de parás.

Enel anyo 1969, la djuderia fue dekalarada Bien de Entereso Kulturalo i desde 1989 la sivdad organisa lavoros de restorasion i amijoramiento de la djuderia. Enel anyo 1996, la sivdad promovio, endjuntamente kon otras sivdades de Espanya kon una istoria djudia emportante, la Red de Djuderias de Espanya.