Malika Ufkir
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
Malika Ufkir (en arabo, مليكة أوفقير), yamada algunas vezes Malika Oufkir, d'akodro kon la eskritura del su nombre en fransez, es una eskritora marokana, ija del djeneral Mohammed Ufkir, el kualo era endemas primer ministro del payis i ke organizo un coup en kontro del rey Hassan II.
Biografiya
[trocar | trocar el manadero]Malika Ufkir es la ija behora de Mohammed Ufkir i Fatéma. Nasio en una famiya bereber en 1953 i es ermana de Abdellatif, Myriam (Mimi), Maria, Soukaina i Raouf. El su padre, el djeneral Mohamed Ufkir era el Ministro del Interior, el Ministro de Defensa i el Shefe de las Huersas Armadas de Maroko; era muy presyado del Rey Hassan II (i el ombre mas puederozo del payis, diskues del Rey) en los anyos '60 i empesijos de los '70 en Maroko.
Eya era yevada al palasio real en la su chikez, kon el buto de akompanayar ala princhipesa Lalla Amina, biviendo una vida luksyoza.[1][2] Ma diskues de organisar un intento de matar al Rey ke aboltava de Fransia en un avion Boeing 727 en 1972, el djeneral Ufkir era metido en la prizion i poko tiempo diskues, matado. Malika Ufkir i la su famiya eran arrestados en kaza enel Sud de Maroko de 1973 fina 1977; diskues de esto, toda la famiya era metida en una prizion sekreta enel desyerto del Sahara, ande sufrieron 15 anyadas. Diskues de eskapar kon ayudo de opozados ala rejima de Hassan II, eran arrestados otruna vez en kaza en 1987. En 1991, eran echos libberos.[2] El 16 de Djudio de 1996, de edad de 43 anyos, Malika Ufkir tomo un bolo verso Paris, kon el su ermano Raouf i la su ermana Soukaina.
La su vida tiene inspirado muncha djente ke avoka por los diritos de los opozados politikos metidos en prizion, deke eyos eran mansevos ainda kuando el su padre organiso el coup ma eran kitados de libertad 20 anyadas. Eya i los sus ermanos son konvertidos ala Kilsia Katolika, i eskrive en su livro "La Prisonnière": "no achetamos el Islam, ke no nos tiene dado dinguna koza buena, i dechidimos tomar el katolizismo". [3][1]
Malika Ufkir también tiene eskrito ensima de la famiya real de Maroko i la vida arientro del harem de Hassan II.[4]
Ovras
[trocar | trocar el manadero]- La Prisonnière, kon Michèle Fitoussi, Ed. LGF, 2000. ISBN 2-253-14884-9. Tresladado al inglez komo Stolen Lives: Twenty Years in a Desert Jail en 2001 por Miramax Books ISBN 0-7868-6861-9.
- L'Étrangère, Ed. Grasset, 2006. ISBN 2-246-70901-6.
Referensias
[trocar | trocar el manadero]- ↑ a b Malika Oufkir: the American Making of a Moroccan Star. Wafin (en lingua inglesa)
- ↑ a b From Palace To Prison. BBC (en lingua inglesa)
- ↑ Stephen Smith. Oufkir un destin marocain. Ed. Calmann-Lévy, 1999(en lingua fransesa)
- ↑ El lavado de cara de la casa real marroquí, Afrol News (en lingua kastilyana)