Mezuzá

Un artíkolo de la Vikipedya, la ansiklopedya líbera

Mezuzá (en ivrit מְזוּזָה, plural mezuzot) es una kashika la kuala va afiksada al marko de las puertas de las kazas i burós djudios, las kualas guádran ariéntro un pergamino arolyado kon pesukim de la Tora. Es la manera mas kolay de identifikar si la kaza es de un djudio.

Mezuza echa kon seramika ermeni topada en una kaza sefardi.

Orijin[trocar | trocar el manadero]

La mitsvá de fiksar una mezuzá a las puertas de las kazas djudías, es una de las mas antikas i konosidas del djudaísmo, i esta bazada enel livro de Devarim: Deuteronomio 6:9 i 11:20.

La mezuzá[trocar | trocar el manadero]

El pergamino interno de la mezuzá, kon el teksto de los pesukim de Devarim.

La mezuzá es una kashika vazia i alungada, de unos 10 sm. de lungeza, en la kuala se guádra un pergamino arolyado, el kualo tiene dos tefilot: la más emportante del djudaismo, «Shema Israel» (hebreo, "שְׁמַע יִשְׂרָאֵל", "Eskucha, Israel" (Devarim 6:4-9) i «Ve'ayá im shamo'a» ("וְהָיָה אִם שָׁמֹעַ", "En kavzo ke me eskuchen" (Devarim 11:13-21). La eskritura de estas tefilot es echa por un haham espesialisado yamado Sofer Stam, el kualo endemas eskrive a mano los Sifré Torá . Por ahuéra, la mezuzá yeva eskrita la letra del alefbet ש o el biervo "שַׁדַּי", "Shaday", el kualo es uno de los nombres de El Dio, el kualo sinyifika «El ke kudia las puertas de Israel».

La mezuzá se afiksa en la baza del tersio superior del marko dirito de la puerta prinsipala de la kaza, inklinada, komo akódro entre las posiziones ankontradas de Rashi, asigún el kualo la mezuzá kale ponerse vertikala i la de Rabbenu Tam, asigun el kualo la mezuzá kale afiksarse de lado. Endemas muncha djente fiksa mezuzot en las puertas internas de la kaza, eksepto kosinas i el banyo; egzisten mezuzot echas kon muncho lavoro i detalyo, kon materiales kostozos, i las mas simples, echas afilu de plastiko, ya ke la parte mas emportante de la mezuzá es el pergamino interno, el kualo kale ser echo de la amijor kalidá i guadrárse sin perikolo de danyo.

La mezuzá es kaji el siman mas konosido del djudaismo, kon el kualo se aze diferensia entre las kazas djudias de las de los sus vizinos, komo akontesió en Ayifto, kuando El Dio pasó sin detenerse en las kazas de los djudios i kitó de la muerte a sus ijos, aziendo diferensia de las otras kon markas de sangre de kodréro en los markos de sus puertas (Shemot 12:12-13). La mezuzá aze ke el djudio se akódre kada vez ke entra i sale de un lugar, de la egzistensia de El Dio, el kualo es uno solo i uniko. Los djudios relijiozos akostumbran dar un bezo a la mezuzá kon su mano kuando pasan frente a eya tanto a la entrada komo a la salida.

Ver endemas[trocar | trocar el manadero]

Referensias[trocar | trocar el manadero]

  • Shai Haussmann, Shalom Seri, Desde la base: Léxico ilustrado de judaísmo y sionismo, Ed. Carta, Israel, 1987. (hebreo, "לכסיקון מן המסד ליהדות ולציונות") ISBN 965-220-103-0

Atamientos eksternos[trocar | trocar el manadero]

Commons Wikimedia Commons alberga kontenido multimedia sovre Mezuzá