Muzeyo Djudio de la Turkiya
El Muzeyo Djudio de la Turkiya (ofisialmente Fondasiyon Sinkentenaria Muzeyo de los Djudios Turkanos, en lingua turkana 500. Yıl Vakfı Türk Musevileri Müzesi) es un sentro kultural establesido por la Fondasiyon Sinkentenaria kon el buto de informar ala sosyete de las tradisiyones i la storya de los djudios turkanos. El muzeyo era aperturado el 25 de Noviembre de 2001. La Fondasiyon Sinkentenaria fue establesida enel anyo 1989 por 113 sitizenos turkanos, djudios i musulmanos, kon el buto de fyestar el sinkeno sentenario de la arrivada de los djudios sefardis al Imperio Otomano[1]. La idea de un muzeyo fue propozada por Naim Güleryüz, el kualo es su aktual kurador i la fondasion fue finansiada kon paras ke dio la famiya Kamhi.
La fragua
[trocar | trocar el manadero]La fragua del muzeyo, antes konosida komo la Esnoga Zülfaris, era restorada i redesinyada kon el buto de azerla un muzeyo. Egziste evidensias de ke la esnoga egzistiya enel anyo 1671, i se kreye ke era fraguada enriva de otra fragua echa durante la kolonia de la Repuvlika Djenovesa[2]. Se ankontrava enrejistrada komo "Holy Sinavi en Galata" o "Kal Kadoş Galata", ma era yamada "Zulfaris", derivado del biervo farsi "Zülf-ü Arus", ke sinyifika "la kuédra de una kalá". Afilu la frágua aktuala fue echa se kreye enel anyo 1823 [3]
Datas istorikas
[trocar | trocar el manadero]- 1882 - El marko de marmol alderedor del Ehal fue donado por el sinyor Samuel Malki.
- 1890 - La famiya Camondo ayudó kon parás para restorar la frágua.
- 1904 - La komunita djudia de Galata ayudó kon parás para restorar la esnoga, basho la presidensia de Jak Bey de Leon.
- 1968 - La esnoga fue restorada grandemente.
- 1979 - La esnoga fue destinada para ke los djudios de Trasya puedesen meldar..
- 1983 - El ultimo kazamyénto es echo en Zülfaris.
- 1985 - Deshó de fonksionar deke no se tinía minyán i entregada a la Fondasion Sinkentenaria por la Fondasion Neve Shalom.
- 2001 - Kon parás de la famiya Kamhi i espesialmente de Jak Kamhi, fue aperturada agora komo muzeyo.
Desinyo del muzeyo
[trocar | trocar el manadero]
El Muzeyo tiene seksiyones ke avlan de la meskla i la interaksiyon de las kulturas de los djudios i musulmanos de la Turkiya iartikolos etnografikos ke amostran las tradisiones de los djudios turkanos, ansina komo la odisea de Espanya a la Turkiya. La entrada a la frágua es a traverso de una puerta de ferro i un gan, enel kual se topa una skultura de Nadia Arditti, yamada "La statua del huego ke se alevanta", en onor a los djudios turkanos ke eran amortados en las gerras de los Balkanes, Damlasya, Kavkazika, del Sinai, Italo-Turkana, de los Dardanelos, de Korea i de LibberasionTturkana. La kamareta a la entrada tiene informasion ensima de la esnoga Zülfaris, la institusion del Hahambaşı, la vida diaria de los djudios de Estambol i Anatolia, ansina komo artefaktos komo posta, mapas, talitot i dekreos imperialos yamados fermanos.
Se topa endemas kon una kopia del Akodro de Lausana, el kualo akseptava la egzistensia de la Repuvlika de Turkiya modérna i enel kualo los djudios turkanos se kitavan los privilejios de dhimni o de minoriya defendida. El ehal tiene dos Sifrei Tora ke pueden ser meldados, i endemas informasion de akademikos ke fuyeron a la Turkiya desde Evropa durante la Sigunda Gerra Mondiala i ambasadores turkanos ke ayudaron a munchos djudios a eskapar del Olokósto; algunos de eyos son Djustos entre las Nasiones.
El balkon, el kualo era uzado para pa seksiyon de mujeres del kal, tiene pinturas ke amostran la vida diaria de la komunita. Tambien se topan mostras kon fotos, pinturas i objektos relasionados kon el nasimyento, la milá, los kazamyentos, la ropa i las djoyas.
Ver endemas
[trocar | trocar el manadero]Referensias
[trocar | trocar el manadero]- ↑ Rabinato de la Turkiya (Türkiye Hahambaşılığı)
- ↑ Naim Güleryüz. The Quincentennial Foundation Museum of Turkish Jews. Revista Beyoğlu. Djunio de 2006
- ↑ History of Zulfaris Synagogue
Atamientos eksternos
[trocar | trocar el manadero]- Muzeyo Djudio de la Turkiya
- Rabinato de la Turkiya
- Şalom, el prinsipal djurnal djudio en la Turkiya