Sibel Siber

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

---

Sibel Siber.

Sibel Siber (nasida el de 13 Disiembre de 1960) es una politika de Kipre del Norte. Era la Primera Ministra de Kipre del Norte entre Djunio de 2013, diskues de la fin del governo de İrsen Küçük en un voto de no fiuzya, i Sietembre de 2013. Es la primera mujer en la istorya de este payis en ser Primera Ministra. Oy en diya, Siber es la prezidenta del parlamento de este payis, la Asamblea Repuvlikana de Kipre del Norte. Eya es la dosena mujer en ser yamada prezidenta del parlamento de este payis, diskues de Fatma Ekenoğlu.

Biografiya

Sibel Siber (nasida Adademir) nasio en Levkosia el 13 de Disiembre de 1960. El su padre, Altay Adademir, era un maestro de eskola de la viya de Melouseia enel Distrito de Larnaka; la su madre, Aysel Adademir, era una bulisa de la viya de Klavdia. Tiene un ermano. Durante la su chikez, bivio en munchas viyas i sivdades por modre del lavoro del su padre, ke era trokado de la eskola de una viya verso otra, i por esto bivio en Larnaka, Arsos i Klavdia, endemas de Tremetousia kuando era de edad de 7 anyos. Kuenta ke de chika tenia temor de viajar, deke munchos kipriyotas turkanos eran pedridos kuando viajavan, anke siempre avla de la interaksion trankila entre las dos komunitas en la viya de Tremetousia. Eskapo la Eskola Turkana de Tremetousia i diskues ambezo enel Lise para Mansevas Turkas de Nikosia.

Siber era akseptada en la Fakultad Medika de Cerrahpaşa de la Universita de Estambol kuando era de edad de 16 anyos. Eskapo la eskola medika i se aresivio komo doktora el 5 de Avril de 1983. Izo una espesializasion en medisina interna enel espital Şişli Etfal de Estambol. En 1987, abolto a Kipre del Norte i aperturo una klinika privada. En 1989, aresivio una beka para espesializarse en endokrinolojiya en la Universita de Virginia, i en 2000 aresivio una beka Fullbright para ambezar hazinuras reumatikas enel espital Chicago Rush.

El su primer artikolo publikado, una kritika del sistem de sanedad en Kipre del Norte, aparesio en la anyada de 1983, enel djurnal mas emportante del payis en ese momento.

Eleksiones prezidensialas de la RTNK de 2015

Siber tenia prometedo un programa de governo ke, si era elekta prezidenta del payis, konsigiria amatar el Konflikto de Kipre. Eya mirava la lavor del prezidente komo la mas emportante para rezolver las nuansas komunalas. Endemas avlo durante la kampanya del su rol komo Primera Ministra del payis, adjustando ke iva kontinuar kon la politika de avyertura, transparensia i fiuzya. Izo kampanya komo la kandidata del Partido Turko Repuvlikano (CTP), kon el suporte de shefes del partido komo el Primer Ministro Özkan Yorgancıoğlu, el anterior prezidente Mehmet Ali Talat i el anterior Primer Ministro Ferdi Sabit Soyer. En las eleksiones del 19 de Avril de 2015, kedo en treser lugar, kon 24.271 votos, un 22.53% del total de votos. El prezidente ke eskapava su termo, Derviş Eroğlu kedo en primer lugar kon 30,328 votos (28.15%), i el anterior Vize Primer Ministro Mustafa Akıncı aresivio 29,030 votos, un 26.94% del total. Siber era eliminada en la primera abolta, i Akıncı reushito ala final.

Famiya

Konosio al su espozo, el Dr. Rıfat Siber, un urolojisto, kuando lavorava komo voluntaria en el espital Doktor Burhan Nalbantoğlu, diskues de eskapar la universita. Se espozaron en 1984 i pario su primera ija, Sümer, en 1985.