Tawakkul Karman

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

---

Tawakkul Karman, enel anyo 2011

Tawakkul Karman (en arabo: توكل كرمان Tawakul Karmān), nasida el 7 de Fevrero de 1979 en Ta'izz, Teman, es una djurnalista, politika i aktivista temani de los diritos umanos, fondadora en 2005 del grup Mujeres sin kadenas i una personalitad politika del partito islámico, Kongregasion Temani por la Reforma. Yego a ser la kara internasionala de las protestas en Teman enel anyo 2011, los kualos eran parte de la yamada Primaera Araba. Es konosida komo la "Mujer de Fierro" i la "Madre de la Revolusion" por los temanis.

Endjuntamente kon Leymah Gbowee i Ellen Johnson Sirleaf, aresivio el Premio Nobel de la Paz enel anyo 2011, por ser una personalitad emportante en la Primaera Araba yegando a ser la primera mujer araba, la primera sitizena de Teman, la dosena mujer musulmana i la dosena mas djoven en aresivir un Premio Nobel. El viernes 7 de Oktubre del anyo 2011 aresivio Premio Nobel de la Paz endjunto alas liberianas Leymah Roberta Gbowee i Ellen Johnson Sirleaf "por gerreyar de manera no violenta por la seguritad de las mujeres i sus diritos de azer parte enel fraguamiento de la paz".

Biografiya

Tawakkul Karman nasio el 7 de Fevrero de 1979 en Mekhlaf, provinsia de Taiz, en Teman. Kresio serka de la sivdad de Taiz, la kuala es la tresera sivdad mas grande del payis, i es konosida komo una sivdad buena para ambezar en un payis relijiozamente konservador. Ambezo en Taiz. Es la ija de Abdel Salam Karman, un avokato i politiko ke lavoro komo Ministro de Sujetos de Ley enel governo de Ali Abdullah Saleh fina la su renunsia. Es endemas ermana del poeta Tarik Karman, i Safa Karman, djurnalista de Al-Jazeera. Esta espozada kon Mohammed al-Nahmi i es madre de tres ijos. . Tiene un doktorado onorario en Dirito Internasional de la Universta de Alberta en Kanada.

En una protesta en 2010, una mujer kijo amatarla kon una djambiya ma la djente ke estava kon eya guadraron la su vida.

D'akodro kon Tarik Karman, "un ofisial de la armada Temani" le disho le la iva matar en una yamada de telefono el 26 de Djenerp de 2011, si kontinuava kon las sus aksiones en la kaleja. D'akodro kon Dexter Filkins, djurnalista del The New Yorker, ese ofisial era el prezidente Saleh.

Karman dize ke la su famiya era orijinala de un lugar yamado Karaman, Anatolia, ke se topa oy endiya en la Turkiya. El governo de este payis le oferio ser sitizena turkana, la kuala acheto del Ministro de Relasiones Ekstranjeras el 11 de Oktobre del 2012.

Mujeres Djurnalistas sin Kadenas

Tawakkul Karman apartiene al partito politiko Kolektividad Temani por la Reforma (al-Tajammuʿ al-Yamanī li-l-Iṣlāḥ, - ﺍلتجمعاليمني للإصلا). Era endemas una de las fondadoras del grup de diritos umanos Women Journalists Without Chains (WJWC) o Mujeres Djurnalistas sin Kadenas, endjunto a otras siete djurnalistas en 2005, kon el buto de kudiar los diritos umanos "espesialmente el dirito de la opinion libbera, eskpresion i diritos demokratikos". Anke el nombre orijinalo era "Female Reporters Without Borders", (Mujeres Djurnalistas sin Frontieras", trokaron el nombre kon el buto de pueder aresivir una lesensia del governo temani. Karman disho ke tiene aresividas munchas amenasas de las otoridades de Teman, tiene sido telefonada munchas vezes amenasando kon matarla, endemas de por letras, deke no acheto la reposta negativa del Ministerio de Informasion kuando demando lesensia para fondar una estasion de radio i un djurnal. El grup demando los sus diritos uzando SMS, los kualos eran kontrolados por el governo, d'akodro kon la Ley de Djurnales de 1990. Diskues de una ivestigasion del governo, el uniko sin lesensia es Bilakoyood, ke apartenia a WJWC i ya tenia un anyo aktivo. En 2007, WJWC izo publiko un reporte ande amostravan los abuzos en kontro de la prensa libbera desde 2005. En 2009, izo una kritika grande al governo por eskojer a los djurnalistas para sus atakos. Del 2007 al 2010, Karman azia "sit-ins" i protestava en la Plasa de Tahrir, en Sana'a.

Tawakkol Karman lavorava para el djurnal Al-Thawrah kuando fondo WJWC (Marso de 2005). Endemas, apartiene a la Union de Djurnalistas de Teman. Endemas, es diputada del Konsejo de la Shura de Teman i no acheto uzar el nikab en la Konferensa de Diritos Umanos de 2004 i desde esta konferansa demanda ke las otras mujeres del payis arretar el uzo de este vistido preto.

Las protestas de 2011

Protesta en el "Diya de la Ravia" ke organiso Karman en Sana'a, Teman, el 3 de Fevrero de 2011.

Durante las protestas en Teman, Karman organizava protestas de elevos de universita en Sana'a en kontro del governo de Saleh. El 22 de Djenero era metida en prizion mientres konduzia la araba kon el su espozo ande kedo 36 oras, fina el 24 de Djenero. El 9 de Avril eskrivio enel djurnal inglez The Guardian, ande eskrivio:

Diskues de una semana de protestas, me yevaron ala prizion en la nochada. Ma esto se torno en un evenemento emportante en la revolusion de Teman: los djurnales avlaron de esto i muchiguaron las protestas en munchas provinsias del payis, organisadas por elevos de universita, aktivistas de la sosyete sitizena i politikos. La presion enriva del governo era muy grande i diskues de 36 oras ande me tenian enkadenada, so libbera otruna vez.

Diskues de esto, organiso una protesta el 29 de Djenero, la kuala era yamada "El Diya de la Ravia" i ke era echa el 3 de Fevrero, la kuala era paresida a evenementos organisados en Ayifto en 2011, los kualos eran inspirados por la revolusion en Tunesia. El 17 de Maso era metida otruna vez en la prizion. Ensima de las protestas, eya disho: "Vo kontinuar fina la kaida de la rejima de Ali Abdullah Saleh...tenemos el movimento enel Sud del payis, los Huthis enel Nord, i la oposizion enel parlamento, pero lo mas emportante endagora es la revolusion de los jasmines".

El 18 de Djunio eskrivio un artikolo yamado "La revolusion si eskapar de Teman" enel djurnal New York Times, enel kualo tiene disho ke Estados Unidos i Saudia dan suporte al governo de Saleh en Teman, "uzando su pueder para ke los miembros de la antika rejima keden enel pueder, kudiando kon el status quo". Tiene disho ke los atakos de Estados Unidos eran bazados en la gerra kontro el terrorizmo i no por entereso en desvelopar los diritos umanos enel payis; endemas eskrivio ke los organisadores de las protestas bushkan trankilitad, desvelopamiento ekonomiko i shalom enel payis. En una entrevista kon Democracy Now!, Karman disho: "En las muestras protestas semanalas ala entrada del palasio de governo,demandamos ke el governo permeta libertad de opinion i de ekspresion i ke la djente tenga lesensia de aperturar los sus propios djurnales. Es konosido ke la libertad de opinion i de ekspresion son la porta de la demokrasia i la djustisia, por esto demandamos endemas libertad de movimento, la kultura de libertad i protestas esta kresiendo por todo Teman. Kada vez ke estamos en la kaleja demandando los muestros diritos, el governo da komo repuesta la violensia o kita los muestros diritos..." Avlava endemas de Tunesia, por inspirar a los payises del Oryente Medio enel empesijo de la Primavera Araba.

Durante las protestas, mas del 30% de las protestantes eran mujeres ke demandavan trokamientos en Teman. El 16 de Oktobre, ombres armados del governo mataron a Aziza Othman Kaleb, CNN disho ke eya era la primera mujer matada en las protestas, ma esto ainda no esta verifikado. Unos dias diskues, las mujeres protestaron en Sana'a en kontro del uzo de la hersa kon las mujeres; kemaron un makrama komo sinyal de la su protesta. En este momento, Karman se topava en Washington, ande disho ke las mujers ke kemavan el su makrama "no achetavan el tratamiento de la rejima de Saleh, i ke las mujeres de Tema no se ivan kedar trankilas ni eskondidas kon temor detras de sus makramas".

Lisionando alas organisaziones internasionalas

Diskues deke era echo publiko ke iva aresivir el Premio Nobel, Karman amostro entereso en demandar ala komunita internasionala i espesialmente al Konsejo de Sekuritad de las Nasyones Unidas para kitar a Saleh del governo i yevarlo a un djuzgo internasional. Ella bushko ke las Nasyones Unidas no tentaran pedronar a Saleh. El Konsejo de Sekuritad voto 15-0 el 21 de Oktobre en la resoluzion 2014 ke "kondena kon huersa" la violensia del governo en las protestas, ma endemas apoyava la idea del Konsejo de Kooperasion del Golfo ke iva a deshar a Saleh libbero si renunsiava. Karman kestiono la dechizion, propozando ke seya yevago a un djuzgo en el Djuzgo Internasional.

Karman avlo kon la Sekretaria de Estado de los Estados Unidos, Hillary Rodham Clinton el 28 de Oktobre, i Clinton disho ke "Estados Unidos apoya la transizion demokratika en Teman i los diritos umanos de ombres i mujeres para eskojer los sus lideres i avenires" Karman dio una repuesta en los djurnales de Teman, diziendo ke "en Teman, diskues de mueve mezes de protestas, ainda no vemos ke Obama tenga entereso en la djente ke buska demokrasia en Teman, ma da alternativas a Saleh".

Saleh asinyo el plan del Konsejo de Kooperasion del Golfo el 23 de Novembre de 2001 en Riyadh, Saudia. Saleh dava los sus puederes al vise-prezidente Abd al-Rab Mansur al-Hadi para el empesijo de una transizion politika.

Ver endemas

• Primavera Araba