Francisca de Carvajal
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
Francisca de Carvajal o Francisca Núñez de Carabajal (Reyno de Portugal, 1540 — Sivdad de Meksiko, 8 de desiembre de 1596) era una djudia konversa, ermana de Luis de Carvajal y de la Cueva[1] (governador del Muevo Reino de Leon) i ke apartenia a una famiya de anusim portugezos ke bivieron en Espanya i diskues arivaron en la Amerika en 1580, fondando la sivdad de Monterrey. Akuzada de djudaizar (los ke eran shubeleados de kontinuar kon la su relijion djudia eran yamados en kastilyano marranos), era metida en 1590, endjuntamente kon toda la su famiya, en un djuzgo de la Inkisizion, i la majorita de eyos eran amortados en un auto de fe.
Biografiya[trocar | trocar el manadero]
Francisca era la ija de Gaspar II de Carvajal de la Cueva i de Catalina de León, i espoza de Francisco Rodríguez de Matos (del kualo kedo embivdada antes del djuzgo) i la madre de Luis de Carvajal (el Mansevo), el primer eskritor djudio de Amerika. Los sus ijos, por orden de edad, eran: Isabel (bidva de Gabriel de Herrera), Catalina (espozada kon Antonio Díaz de Cáceres, merkader de la Sivdad de Meksiko kon entereso en las minas de Tasko), Mariana, Leonor (espozada kon Jorge de Almeida, negosiante kon Antonio Díaz de Cáceres), Baltasar (el kualo eskrivio poeziya relijioza djudia enduinto kon el su ermano Luis), Luis, Miguel i Anica. Otro ijo, Gaspar, el kualo se kreye desho el djudaismo kuano era mansevo, arivo en la Amerika antes ke su famiya, bivia enel konvento de Santo Domingo de la sivdad kapitala de la Mueva Espanya.
Auto de fe[trocar | trocar el manadero]
La konfesion de Isabel, la kuala le era kitada diskues del su inskendje,[2] metio a toda la famiya Carvajal en este hal. Eran echos atorgar i esvachearse publikamente enel auto de fe echo el shabbat 24 de Fevrero de 1590. Francisca de Carvajal, la kuala era iskendjada enel kavayo de kuedras sinko vezes fina ke atorgo,[2] i varios de los sus ijos (Luis el Mansevo i katro de las sus ermanas: Isabel, Catalina, Leonor i Mariana) eran kondenados kon prizion de por vida; Baltasar, el kualo se eskultereo, i Francisco Rodríguez, espozo de Francisca i padre de los sus ijos, el kualo murio antes del djuzgo, eran kemados en imej.
Reshuteo[trocar | trocar el manadero]
En Djenero de 1595, era avierto un muevo kavzo enel djuzgo de la Inkisizion, enel kualo eran akuzados de reshutear.[3] Estando en la przion, tentaron azer kontakto kon otros anusim, eskriviendo mesajes de huersa en la relijion djudia. Todos eyos eran kemados bivos enel auto de fe ke era echo en la Sivdad de Meksiko el 8 de Desiembre de 1596,[4] salvo Mariana, la kuala pedrio el meoyo i era echa esperar fina el 25 de Marzo de 1601. la ija mas chika, Anica, era konsilyada.[1]
Otras lekturas[trocar | trocar el manadero]
- Vicente Riva Palacio, El Libro Rojo, México, 1870.
- C.K. Landis, Carabajal the Jew, a Legend of Monterey, Vineland, N. J., 1894.
Referensias[trocar | trocar el manadero]
- ↑ a b CARABAJAL (variously spelled Carabal, Caraballo, Caravajal, Carbajal, and Cavajal, the name Carvalho being possibly identical):. Jewish Encyclopedia
- ↑ a b La persecución inquisitorial: el caso de la familia Carbajal. La Crónica de Hoy
- ↑ Women of the Carvajal Family. Jewish Women's Archive
- ↑ El inédito diario de Luis de Carvajal bajo la Inquisición