Kuando el Rey Nimrod

Kuando el Rey Nimrod es una kantika trasidionala djudia. Se piensa ke se orijinó en Espanya durante la Edad Midia. Dempues del Edikto de Granada i la Ekspulsion de Espanya, se izo konosida en las komunitas sefardis en Marroko, la Turkiya, Yavan i en todas las komunitas serkanas a la Mar Mediterraneo. Es kantada en lingua djudeo-espanyola i kuenta la istorya del nasimyénto de Avraam Avinu, el nasi konsiderado el padre del puevlo djudio.

Letra (Adaptasiyon)

Kuando el Rey Nimrod al kampo salía

mirava en el syelo i en la estreyería

vido una luz santa en la Djudería

ke avía de naser Avraam Avinu.

koro:

Avraam Avinu, Padre kerido

Padre bendicho, luz de Yisrael

Avraam Avinu, Padre kerido

Padre bendicho, luz de Yisrael.

Luego a las komadres les enkomendava

ke toda mujer ke prenyada kedara

si pariera un ijo, al punto lo matara

ke avía de naser Avraam Avinu.

(koro)

La mujer de Terah kedó prenyada

i de diya en diya el le demandava

¿De ké tenesh la kara tan demudada?

eya ya savía el bien ke tinía.

(koro)

En fin de mueve mezes parir kería

iva kaminando por kampos i vinyas,

a su marido tal ni le dishkuvría

topó una meará i ayí lo pariría

(koro)

En akeya ora el nasido avlava

"Andávos mi madre, de la meará

yo ya topo a ken me alejara

mandará del syelo ken me akompanyará

porke só kriado de El Dio Baruh."

(koro)

Saludemos agora al kompadre

i tambien al mohel

ke por su Zehut nos venga

el Goel i Rihma a todo Yisrael,

sierto loaremos al Vedradero, al vedradero de Yisrael.

(koro)

Interpretasiones

En la kantika, Avraam — el kualo en la Tora es el primer djudio i el ansestro de todos los ke sigieron, la kuala es la razon por la es yamado "Avinu" (del biervo ebreo אבינו, sinyifikando "el muestro padre") — ya está nasido en la djudería. Esto aze ke Terah i la su mujer bivan komo djudios, ansina komo los padres de otros ninyos matados por Nimrod. Avraam en la Tora es el primer ombre al kualo se aze la milá i el primero en azerla a otro, el su ijo Its·hak.

En esensia, de manera distinta a la istorya de la Tora, la kantika es aserka de una komunita djudia akosada por un rey malo i la kuala ve el nasimyento de un salvador, un nasi; esto es un tema enteresante para los djudios ke bivieron en Espanya antes del Edikto de Granada enel anyo 1492. La kantika endemás, trae elementos relasionados kon el nasimyénto de Moshe Rabenu (el rey malo matando ninyos inosentes, kon las komadres mandadas a matarlos) i de las vidas de Hananiya, Mishael, i Azariya (Shadrak, Meshak, i Abednego), los kualos eskaparon del fuego al kual fueron echados. Nimrod entonses es echo misturar los roles i atributos de dos reyes konosidos komo yenos de negregúra— Nabukodonosor i Paró.

Endemas se dize ke la kantika toma elementos del Natal de los kristyános. Por egzempio, la luz "santa" avista en la estreyería ke sinyaló el nasimyénto, el naser Avraam Avinu en una meará i la matada de los ninyos mandada por el Rey Erodes. La referensia a Avraam komo "el amigo" viene del nombre en arabo de Avraam.

Versiyones

Egzisten varias versiyones de la letra de la kantika, la kuala depende del lashon djudeo-espanyol avlado por la komunita; es por eyo ke la versiyon kantada en Marroko i Meliya es diferente de la de la Turkiya i la de Gresia. Munchos kantaderos sefardis, otros kantaderos djudios ashkenazim i afilu alkunos kantaderos no djudios tienen gravada versiones de esta kantika, la kual konforma parte de la yamada world music, komo Fortuna, Françoise Atlan, Doris Benmaman, Mappamundi, Psalteria, Lampa Ladino, Emil Skobeloff i Nani. El grup turkano Sefarad tiene una versiyon en lingua turkana yamada "Bodrum", anke la letra no está relasionada kon la kantika orijinala.