Manifesto del Partido Komunista
El Manifesto del Partido Komunista (Manifest der Kommunistischen Partei, por su títolo en almán), es una de las ovras polítikas kon mas enfluensa en la istorya, ansi komo el program de la klasa ovradera i de todos los Partidos Komunistas del mundo.
Esta ovra, de primera vez, rezume i impoza las bazas del Marksizmo-Leninizmo: el Materyalizmo Dialéktiko, el Materyalizmo Istóryko, el Sosyalizmo Syentista i la Ekonomya Marksista.
Fue un teksto demandado por la Liga de los Komunistas a Karl Marx i Friedrich Engels entre los anyos 1847 i 1848, puvlikada por primera vez en Londra el 21 de Fevrero de 1848.
El Manifesto, tyene syete prafasyos istórikos eskrividos por los otores (para las edisyonim almana de 1872, rusa de 1882, almana de 1883, ingleza de 1888, almana de 1890, lehistana de 1892 i italyana de 1893), i se diviza en una chika hakdamá,
- Manifesto del Partido Komunista (hakdamá).
I en kuatro kapítolos:
- Burgezes i proletaryos.
- Proletaryos i komunistas.
- Literatura sosyalista i komunista: I) El sosyalizmo riaksyonaryo: a - El sosyalizmo feudal, b - El sosyalizmo de los chikos burgezes, ch - El sosyalizmo alman o el verdadero sosyalizmo; II) El sosyalizmo konservator i burgéz; III) El sosyalizmo i el komunizmo kritiko-utópiko.
- Pozisyón de los komunistas delantre los diferentes partidos de la opozisyón.
Las ideas fundamentalas del Manifesto son:
- La istorya intelektuala i polítika de una sosyeté es determinada por el modo de produksiyon i la formasiyon sosyala i ekonómika ke mana de dito mezo;
- Desde el diya enel kualo aparesieron las klasas sosyalas kon baza en la proprieta privada i la eksplotasiyón, la istorya de las sosyetés tiene komo baza el Pleyto de klasas;
- En la sosyeté modérna de muestros diyas, el proletariato es la únika klaza sosyala ke kon la su emansipasyón puede eskapar la explotasyón i la mizerya de toda la umanidad a traverso de la Revolusiyon Komunista: el fin de la proprieta de la burgeziya, las klasas sosyalas i el Estado.[1]
Edisyonim Djudeo-espanyolas
[trocar | trokar el manadero].png)
El Manifesto fue trezladado de primera vez al djudeo-espanyol por Izak David Florentín i fue puvlikado en Salóniku en djenayo del 1914 komo la sigunda broshura de la koleksyón "Biblioteka Komunista" del djornal El Kombate (איל קומבאטי). Esta edisyón estampose en letra rashí kon el títolo: El Manifesto Komunista (איל מאניפ'יסטו קומוניסטה).[2] La edisyón la esta tuvo de baza la traduksyón franseza del Manifesto aparejada por Laura Lafargue (ija de Marx), kuala fue rivizada i korijada por Engels en 1895.
En el Méksiko, al empesijo del 5786 (2025), se bashladeo azer una mueva edisyón djudeo-espanyola del Manifesto. Esta mueva edisyón, indemás de tomar la traduksyón de Florentin (los kutro kapítolos de la ovra), adjusta los syete prefasyos istórikos de los otores, todas las notas de las edisyonim istórikas, el prefas de Florentin a la sus traduksyón i otros dukumentos emportantes. Tambyén esta edisyón se topa en letra rashí i kontyene un karar de estampas.
Referensias
[trocar | trokar el manadero]- ↑ "La idea sentrala ke inspira todo el Manifiesto, a saber: ke la rejima ekonómika de la produksiyon i el estrukturamyento sosyal derivado en kada epoka istorika konfrma la baza enriva de la kuala krese la istorya intelektuala i polítika de esta epoka, i por esto, toda la istorya de la sosyeté es una istorya de luchas de klasas, asta yegar a la epoka aktuala, en la kuala la klase oprezada -el proletariado- no puede ya azerse independyénte de la klasa oprezora -la burgeziya- sin azer a toda lasosyeté independiente; esta idea era la idea orijinala de Marx." - Friedrich Engels, Prolog a la edision alemana de 1888 del Manifesto del Partido Komunista
- ↑ Karl Marx i Friedrich Engels, El Manifesto Komunista (איל מאניפ'יסטו קומוניסטה), trezladado por Izak David Florentin, Salóniku (Grecha), El Kombate. Djornal Sosyalista/Estamparya de David B. Bezes, 1914, 63 pájinas, (Biblioteka Komunista N. 2).