Relasiones entre Israel i Espanya

Un artíkolo de la Vikipedya, la ansiklopedya líbera
Ir a la navegación Ir a la búsqueda
Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

Israel i Espanya.

Las relasiones entre Israel i Espanya azen referensia alas liasiones diplomatikas, kulturalas i komersialas entre los dos payises. Israel i Espanya tienen relasiones diplomatikas desde la anyada de 1986. Israel tiene ambasada en Madrid, mientres ke Espanya tiene su amnasada en Tel Aviv, un konsulato de onor en Haifa i otro en Yerushalayim; el kualo es konsiderado komo la mizyon diplomatika para la sivdad de Yerushalayim (tanto Yerushalayim Oryentala komo la parte oksidentala) , la Banda de Gaza i los territorios de la Beira Oksidentala.[1]

Istorya[trocar | trocar el manadero]

La Espanya de Francisco Franco no rekonosia la de Israel, deke asigun el governo espanyol, era una konspirasion internasionala de los djudios i los masones en kontro de Espanya, el yamado en lingua kastilyana "contubernio judeo-masónico". Enel anyo 1949, el Estado de Israel voto en kontro de kitar los kastigos a Espanya en la Asamblea Jenerala de las Nasyones Unidas, por modre del apoyo ke dava el governo Frankisto a los payises del Axo. Ma anke no egzistian relasiones diplomatikas, el governo de Franco dio ayudo ala emigrasion djudia de Marroko en los anyos 1960 i durante la Gerra de los Sesh Diyas de 1967, dio dokumentos de laissez-passer a los djudios ayifsianos, lo kualo izo ke eyos pudiesen fuyir del payis.

Diskues del amatamiento de la diktadura en Espanya, las liasiones amijoraron, ama no pishin, por modre del apoyo de los governos a la kavza palestiniana. Ma el 17 de Jenero de 1986, enel governo de Felipe González, los dos payises establesieron relasiones. . Samuel Hadas fue yamado Ambasador de Israel en Madrid. Poko tiempo diskues, un buro de apresentasion de la OLP aperturo sus portas en Madrid "komo amostra de la politika de Esanya tradisionala de amistad kon el puevlo palstiniano i komo instrumento para dezvelopar una salida duradera, kon djustisia i jenerala al konflikto arabo-israeliano". [2]

Enel anyo 2000, Espanya kito el su veto al ingreso de Israel al Bloko de Payises de la Evropa Oksidentala de la ONU, bazada en el remuevamyento de los miembros, amatando ansina el limbo ande se topava Israel, deke los payises musulmanos de Asya se opozavan ala partisipasion de Israel enel bloko de Asya.[3]

Endemas de esto, los dos payises apartienen ala Union por la Mediterranea, endemas de otros akodros i programas de la Union Evropea i de Evrovision.

Atamientos kulturalos i relijiozos[trocar | trocar el manadero]

Munchos yisraelianos son sefardim, djudos liasionados etnika i kulturalmente kon la Peninsola Iberika i espesialmente Espanya desde el arrondjamiento de los djudios de Espanya ala fin del sueklo XV. Muchos yisraelianos aktualos nasieron endemas en Espanya; espesialmente en las sivdades de Seuta i Meliya. Munchos israelianos biven oy endiya en Espanya i egzisten komunitas djudias en las sivdades de Seuta, Meliya, Barselona, Mursia, Palma de Mayorka, Madrid i Marbella, entre otras. Munchos otros espanyoles, komo por enshemplo los Xuetas, son de orijin marrano se kreye ke oy endiya un 20% de los espanyoles tienen este orijin. [4]. El djurnal israeliano Maariv konto ke, asigun el mismo José Manuel Rodríguez Zapatero, la su famiya es de orijin djudio, de una famiya de anusim.[5]

En onor del 25 aniversario de las liasiones diplomatikas i kulturalas entre Israel i Espanya, el Muzeyo del Prado de Madrid empresto una pintura de El Greko al Muzeyo de Israel en Yerushalayim. Una nochada espesiala se izo kon Its.hak Navon, sinkeno presidente de la Medina de Israel i Álvaro Iranzo Gutiérrez, ambasador de Espanya en Israel. [6]

Referensias[trocar | trocar el manadero]

  1. Consulado de España en Jerusalén, Ministerio de Asuntos Exteriores y de Cooperación de España (en lingua kastilyana)
  2. Ministro Espanyol de Liasiones Ajenas (en lingua kastilyana)
  3. España admite a Israel en el grupo europeo de la ONU tras ser presionada por EE UU. Jurnal El País. (en lingua kastilyana)
  4. Sefardíes y moriscos siguen aquí. El 30% de los españoles tiene huella genética de su origen judío o magrebí. Jurnal El País. (en lingua kastilyana)
  5. Zapatero, a un diario israelí: 'Antisemitismo había con Franco'. Jurnal El Mundo. (en lingua kastilyana)
  6. Visiting Masterpiece from the Prado Museum, Madrid (en lingua inglesa)

Ver endemas[trocar | trocar el manadero]