Sivan Rahav-Meir
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
Sivan Rahav-Meir, nasida el 2 de Djulio de 1981) es una djurnalista, eskritora, reportera, i apresentadora de televizyon i de radio israeliana.
Biografiya[trocar | trocar el manadero]
Sivan Rahav nasio en Ramat Asharon, i es ija de Arye i Ronit. De edad de 6 anyos, biviendo kon la su famiya en Herzliya, eskrivio los sus primeros artikolos para un djurnal para ninyos. De edad de 9 anyos, era yamada una ninya espesialmente intelijente, i ambezo en una eskola para ninyos kon intelijensia espesiala, la sivdad de Herzliya[1]. Kuando ainda era manseva, lavoro komo apresentadora de programas de televizyon enel kanal edukativo de Israel i endemas era la reportera de evenementos para mansevos en los haberes de la nochada, aziendo entrevistas kon el Primer Ministro israeliano Yitzhak Rabin, i el Ministro de Eksterior Shimon Peres.
De edad de 17 anyos, publika la su primera ovra: Gia para un djurnalisto mansevo. De edad de 18 anyos, eskapa la universita i aresive su BA en sensias politikas i administrasion de entreprisas en la Universita de Tel Aviv. Kuando ainda era eleva en la universita, nase el su entereso por la relijion i aze teshuva, por modre de la lektura de ovras de Yeshayahu Leibowitz, de Nehama Leibowitz, del haham Joseph B. Soloveitchik i de Rav Kook.
Eya izo su servisio militar en la radio de la armada Galei Tsahal. Diskues de eskapar su servisio en 2002, empeso a lavorar enel kanal de televizyon Arutz 2. En 2003, se espozo kon el djurnalisto relijiozo Yedidya Meir.
Karriera[trocar | trocar el manadero]
En 2005, publiko ימים כתומים (Dias de kolor Portokal), un livro de entrevistas kon personalitades infuentes. israelianas ensima de la ekspulsion de djudios de Gush Katif. Entre las personalitades ke aparesen enel livro, se topan Sara Netanyahou, Morris Talansky, el haham Ovadia Yosef, Anat Kam, el milyoner Arkadi Gaydamak,[2] Lev Leviev i Shula Zaken. Eya endemas era la djurnalista ke amostro ala sosyete israeliana el espozamyento de Yigal Amir kon Larisa Trembovler.
Es la apresentadora del programa semanal de haberes de la nochada endjuntamente kon el su espozo en Galei Tsahal, i eksrive un artikolo semanal enel djurnal Yediot Aharonot i en el djurnal elektroniko The Times of Israel.
Diskues de Sietembre de 2015, empeso a apresentar lisiones semanalas ensima de la Tora, en Yerushalayim i Tel Aviv. Estas lisiones son transmitidas por modre de la Internet i las de Yerushalayim son endemas transmitidas en la radio Galei Israel. Para el programa del primer aniversario, izo una entrevista kon el presidente israeliano Reuven Rivlin. En Fevrero de 2016, era yamada en una enkuesta nasionala komo la personalitad de Facebook preferada de los sionistas relijiozos en Israel; el su espozo kedo de doseno en la lista.[3]
En Marso de 2016, aresivio la lesensia del Ministerio de Edukasion de Israel para apresentar el programa Hidon Atanah, mas no aksepto diskues de konoser ke el apresentador anterior, Avshalom Kor, ainda keria apresentar el programa ma era kitado diskues de 28 ayos apresentando el konkorso. Esta anyada, asendio una de las lampas de Yom Aatzmaut enjuntamente kon el aktor Amos Tamam.[4]
En 2016, publiko endemas un livro, הסטטוס היהודי (El Status Djudio), eskriviendo komentarios ensima de la parasha, modernitad i aktualitad.
Aktualmente, bive en Yerushalayim kon el su espozo i sus sinko kreaturas.
Ovras[trocar | trocar el manadero]
- Amadrih leitonai atzair. 1998 (en ivrit)
- Atzman atzair, 2000. (en ivrit)
- Yamim katumim, 2005. ISBN 9654822563 (en ivrit)
- Astatus Ayeudi, 2016. Tresladado al inglez i publikado basho el nombre #Parasha, 2017