Edirne
| ||||||||||||||||||||||
Edirne (en lingua grega Αδριανούπολη, Adrianoopuli) es una sivdad en Trakya ke es la parte Evropea de la Turkiya. La sivdad se topa 250 Km de la parte oeste de Estambol i tiena bordo kon Gresia i Bulgaria. Es la kapitala del entorno de Edirne. En el anyo 2009 biviyan aya 141.570 moradores.
Istoria
[trocar | trocar el manadero]Asigun la mitologia grega esta sivdad fue fondada de parte de Orestes, el ijo de Agamemnon, i la yamo a su nombre Orestias. El cezar romano Adrianus fondo de muevo la sivdad en el empesijo del 2 sieklo, i le dyo su nombre Adrianopolis. La izo la kapitala de Trakya. Maz dospues la sivdad fue parte de la Imperia Latina.
Serka de la sivdad uvo batayas entre el Imperio Romano i otros puevlos.
En el anyo 1361 la konkisto Murat Bey I. I en 1365 troko la kapitala de Bursa a Edirne, komo la kapitala de la Imperia Otomana. Esto kontinuo fina el anyo 1453, kuando se konkisto Konstantinopoli. En tonses deisdio el Sultan Mehmet II, ke era nasido de Edirne, a pasar la kapitala a Konstantinopoli. Afilu ke no fue maz kapitala, fue sivdad muy emportante ke aziyan komersio de seda, tapetes i agrikultura.
En el sieklo 19 i en el empesijo del 20 sieklo, la sivdad fue konkistada unas kuantas vezes de parte de los Rusos, Gregos i Bulgaros. Al kavo kayo en las manos del governo turko, i fue konfirmado en el anyo 1923 kon el Kontrato de Luzan.
Se dize ke en esta sivdad uvo 15 batayas ke empesaron del anyo 323 aEK fina el anyo 1913.
Kon el kontrato de luzan se taksaron ke el treno de Estambol pasa por las tieras Gregas. En los anyos 1960 i 1970', profitaron de este kamino djente ke fuiyan de la ley, ke aziyan entrar drogas danjerozaz, suviyan al treno de noche ke seyamava "express de amedia noche" i saltavan kuando pasavan a las tieras grega. En el kavo del 1970' trokaron la direksion del kamino i el treno no paso mas por la tiera grega.
Turizmo
[trocar | trocar el manadero]Edirne ez nombrada por suz grandiozas mezkitas. La Selimiye se fondo en el anyo 1575 de parte de Mimar Sinan, uno de los arhitektos famozos te Turkiya. La minaretes son 70.9 metros, son laz maz altas en Turkiya. El techo es kaji el boy de Aya Sofia en Estambol. La mezkita Üçşerefeli, kere dizir 3 Galerias, se fraguo en el anyo 1447, Ez fomoza por suz minaretes de marmol, Aparte de esto ke son diferentes una de la otra. Esto ez el sembol del trokamiento de la arkitektura de los Selchukes a los Otomanos.
Kada anyo en el mez de Junio, se aze serka de Edirne un konkurso de lucha kon azete de azituna fregado en los puerpos de los luchadores. Esto se aza en Kırkpınar. Este konkurso ez el spor maz antiguo del mundo ke empeso en el anyo 1361.
El puevlo djudio
[trocar | trocar el manadero]
Ay dizyentes ke los djudios biviyan en Edirne del tiempo del sigundo Bet Amikdash. Pero los djudios empesaron a agunarsen en el sieklo 6, el tiempo ke el Sezar bizantino Yustinyanos el primer comandava en la sivdad. El puevlo djudio se okupava i se manteniya kon tekstil, kueros i vinos. El puevlo era Romano i el Kal se fraguo en el 11 sieklo. En el anyo 1361 konkistaron los Ottomanos la sivdad, i la izyeron suz primera kapitala. Dospuez ke Konstantinopoli fue konkistada del parte del rey Mehmet II, el puevlo ke biviya en el Balkanos fue transferado ala Turkiya para konvertirlos Muslumanos. I los djudios ke biviyan en Edirne aresivyeron djudios del Balkan i lo maz de la Gresia.
Del Ekspulsion de los djudios de Espanya fina agora
[trocar | trocar el manadero]En el 16 sieklo arivaron a Edirne djudios ke fueron ekspulsados de la Espanya i de la Italia, ke fueron envitados de parte del rey Beyazid II. Los djudios teniyan ofisiyos i saviyan munchas linguas, se aresentaron i adelantaron muy bien en la Imperia Ottomana. Entre los anyos 1520 - 1530 aviya en Edirne 210 famiyas djudiyas. En el empesijo del 17 sieklo se konto en la sivdad 5000 djudios, lo maz eran Sefaradis i avlavan Ladino.
El atrazamyento de la Imperia Ottomana fue difisil para el puevlo. En la sivdad uvo munchas batalyas, i Edirne fue konkistada unas kuantas vezes de parte de la Imperia Russa. En el mizmo tiempo el puevlo Krisyano se estava peleyando kon el puevlo djudio. En el anyo 1835 uvo un grande fuego ke danyo una grande parte de la sivdad. Munchos djudios se fuyeron de Edirne a Bulgaria i se aresentaron en una maale ke maz dospues se yamo Romalia del Este. En el anyo 1873 el puevlo en la sivdad era 100,000 personas, entre estos los 12,000 eran djudios. En 1905 uvo otruna vez un fuego muy grande, ke se kemaron 13 sinagogas, i entre estos una singaoga Romaniota ke fue fraguada en el sieklo 11.
En el tiemp de la Gerra Ottomana kon los Rusos (1877-1878), los djudios ke biviyan en la Bulgaria fueron atakados de parte del puevlo Bulgaro, de parte de los soldados rusos i de parte de los soldados Ottomanos ke fueron ovligados de travarsen del lugar. I kon esto los djudios desharon suz lugares i fuyeron kon la armada Ottomana a Estambol i a Edirne. EL puevlo ke arivo a Edirne era kaji 2000 personas. En 1906 en Edirene biviyan 23,879 djudios. La Armada bulgara estuvo unos kuantos mezes en Edirne. Sienes de djudios desharon la sivdad a kavza de las gerras, i se fueron a Sofia i a Plovdiv, ke avia i aya djudios. En esto les ayudo el puevlo antiguo para fasilidad la situasion de los emigrantes. Entre los anyos 1920 - 1922 la sivdad paso ala otorizasion del governo Grego. Despues de la primera gerra mondial, uvo muncho puevlo ke emigro a Estambol i a Salonika. Mas dospues emigraron maz djudios a los Estados Unidos i a Israel. En el anyo 1922 aviya en la sivdad 13,000 djudios, en 1927 kedo 5,712, i en el anyo 1943 kedo solo 2,000 djudios.
Dospues ke se fondo el governo moderno en la Turkiya, aforsaron al puevlo para aresivir el rejim muevo. I de maz komo Edirne se topava en la frontiera los djudios estavan pokos entre los Muslumanos, uvo peleyas kontra el puevlo i el governo. En 1934 vinyeron kontra el puevlo djudio en Trakia i en Edirne, izyeron muncho danyo a los djudios en las kazas i las botikas. El puevlo ke no pudo suportar esta situasion desharon la sivdad i emigraron a Estambol. Estas peleyas del any 1934 fueron la kavza de la fin de la keila djudia en la sivdad. En 1948 aviya 2,750 djudios, i esto abasho den ves envez fina ke en el anyo 1970 kedaron solo 100 djudios. En 1971 el simiterio antiguo fue tomado de los djudios, i no se esta uzando maz. En 1988 lo ke aviya en Edirne era solo tres djudios. La kehila ke biviya aya 1500 anyos no existe mas.
Meskitas, Eglisias i Sinagogas
[trocar | trocar el manadero]En Edirna existe Eglisias, Sinagoges i Meskitas ke son fraguadas de parte del famoso arhitekto MImar Sinan. Aparte de esto en Kaleiçi se topa la eglisiya Katolika-Italiana i otra gelisiya de los Bulgaros. En Kaleiçi se topa la grande sinagoga de Edirne, esta es la mas grande sinagoga en Turkiya i la sigunda de grandor en el mundo.
Sivdades ermanadas
[trocar | trocar el manadero]
Haskovo, Bulgaria- Yambol, Bulgaria
Aleksandroupoli, Gresia
Prizren, Kosovo
Izmit, Turkiya- Kars, Turkiya
