Its.hak Bengualid
Itsh.ak Bengualid, amijor konosido en haketia komo el Saddiq Rebbí Yish´haq Bengualid era un haham nasido en la sivdad de Tetuan enel anyo 1778 i muerto enel anyo 1871. Era konosido en Marroko i por munchas komunitas djudias en Tiberias, Izmir i afilu Bagdad, ande el gran haham Yosef Hayim, otor del Ben Ish Hai lo yamava "aRav aGadol mofet ador", o el gran haham de esta djenerasion[1]. Es konosido endemas por ser ken demandó le ka komunita marrokana ambezara kozas de Evropa i se iziera mas modérna, sin olvidar las tradisiones[2].
Enfluensia en la vida moderna djudia Tetuani
[trocar | trocar el manadero]Al empesijo de la okupasion espanyola en Fevrero de 1860, dio la su aprovasion para ambezar en la aljama el uzo de los vistidos i kostumbras evropeas por la komunita, kon el buto de aprontarla a un estil de vida evropeo. Endemas, kontaktó a emportantes djudios del mundo kon el buto de atraer atension ensima de las komunitas proves del payis. Kuando konosió al Baron de Rotschild enel anyo 1857, le amostró ke la komunita de Tetuan tenía menester de un rofé, por lo kualo el baron mando uno kon milizinas i todo lo ke kale uzarse para amijorar la salud de la komunita. Las eskolas de la Aliansa Yisraeliana Universala arrivaron a Tetuan enel anyo 1862 por modre de sus eshuérsos, en kontro de la opinion de munchos hahamim de Marroko, ke no dezeyavan ke sus ninyos ambezasen kon maestros yegados de Evropa kon ideas muevas.
Enel anyo 1863, una maladia de kolera amortó muncha djente en Marroko, espesialmente en Tetuan i Tanjer. El haham Bengualid organisó ke el i varios hahamim kurasen a los enfermos, sin emportar si eran djudios, kristyanos o musulmanos. Por este fakto ermozo i dedikado, el governo de Fransia dio una medalya de la Lejion de Onor Franseza a rebbí Bengualid i a rebbí Yosef Hachuel.
Piyyut
[trocar | trocar el manadero]Egziste un piyyut kantado por munchas komunitas del nord de Marroko en los kazamientos i hagim, dedikado al rebbí Bengualid, eskrito por el rebbí Abraham Yiluz.
Enel anyo 1862, el haham vijitó Eretz Yisrael, ande konosió munchos hahamim en Hevron, Tiberias, Safed i Yerushalayim. En la su hilulá, el 9 del mes de Adar, munchos djudios vijitan el betahayim de Tetuan kon el buto de zorear frente a la su tumba.
Esnoga
[trocar | trocar el manadero]Oy endiya, la Tefilá Bengualid es una unika esnoga ke se topa en la sivdad de tetuan[3]
Ovras
[trocar | trocar el manadero]Referensias
[trocar | trocar el manadero]- ↑ Moisés Garzón Serfaty. Tetuán. Retrato de una nostalgia. Sentro de Estudios Sefardis de Karakas, 2008. ISBN 978-980-6031-13-5
- ↑ El Saddíq Rebbí Yis'haq Bengualid: luz del occidente. Publikado en la revista Maguén-Escudo N° 122. Jenero-Marso de 2002.
- ↑ Tefilá Bengualid en Tetouan