Agadá de Sarajevo

Un artíkolo de la Vikipedya, la ansiklopedya líbera
Una kopia de la Agadá de Sarajevo enel Parlamento de Bosnia i Hersegovina

La Agadá de Sarajevo es una de las agadot mas viejas del mundo, impresada en Barselona en la anyada de 1350. Oy endiya, la Agadá de Sarajevo pertenese al Muzeyo Nasional de Bosnia i Hersegovina en Sarajevo; ande es amostrada permanentemente. No se konose su valor en parás, ma un muzeyo en Espanya demandó ke seya asegurada por 7 milyones de US$ antes de ser yevada a Espanya para una amostra enel muzeyo en 1992.[1]

La Agadá de Sarajevo esta eskrita a mano en pyél ablankada de vaka i esta adornada kon Kopre i oro. Tiene 34 ojas de ilustrasiones de la Tora, desde Bereshit asta la muerte de Moshe Rabenu. Las sus ojas tienen manchas de vino, lo ke amostra ke fue uzada en munchos sedarim.[2]

Istorya[trocar | trocar el manadero]

Una oja de la Agadá de Sarajevo, eskrita enel syéklo XIV en Katalunya, Espanya. Arriva, Moshe Rabenu i la zarza ardiente. Enbasho, el palo de Aaron se kome los de los ayifsianos

La Agadá de Sarajevo eskapó munchas veses de ser destruyida. Los istoriadores kreyen ke fue kitada de Espanya por sefardis dempues del Edikto de Granada en 1492. Egzisten notas en las ojas ke indikan ke aparesió en Italia enel syéklo XVI. El Muzeyo Nasional de Sarajevo merkó la Agadá enel anyo 1894 al sinyor Joseph Kohen.[3]

Durante la Sigunda Gerra Mondiala, la Agadá fue eskondida de los Nazis i Ustachas por el shef de la biblioteka del muzeyo, Dervis Korkut, el kualo, echando la su vida en perikolo, kitó la agadá de la sivdad, i se la dio a un sheih musulmano en Zenica, ande fue eskondida enbasho de piso de una mishkita o de una kaza musulmana. Enel anyo 1957, Sándor Scheiber, direktor de una yeshiva de Budapest publikó una copia echa en fax de la agadá. Durante la Gerra de Bosnia, en 1992, la Agadá fue topada por un inspektor de la Pulisiya, Fahrudin Cebo (dempués konosido komo "agaá"), endjunto kon otros objektos. Dempues fue yevada a una boveda basho el suelo kuando Sarajevo fue asediada por las huérsas Serbias (El Asalto a Sarajevo -- el asalto kon mayor durasion en la istorya modérna). Para kitar rumores ke el govyerno tenia vendida la Agadá para merkar armamento, el presidente de Bosnia i Hersegovina apresentó la Agadá en un Seder de la komunita djudia de Sarajevo enel anyo 1995.

Enel anyo 1995 se izo una reproduksiyon en Ljubljana de 5.000 kopias. Aktualmente, el muzeyo dio otoridad para publikarsen un numero chiko de kopias de la Agadá de Sarajevo. En Mayo de 2006, la editoriala Rabic Ltd. izo publiko ke iva publikar 613 kopias de la Agadá de Sarajevo echa a mano, ansina komo la orijinala.[4] Dempués, el manusktrito fue restorado, shukur a una kampanya espesiala finansiada por la ONU i la komunita djudia de Bosnia i Hersegovina enel anyo 2001, i yevado a una eksposizion permanente enel muzeyo en Disiembre del anyo 2002.

En los medios[trocar | trocar el manadero]

  • Enel filmo Welcome to Sarajevo es nombrada la Agadá de Sarajevo.
  • La novela People of the Book, eskrita por Geraldine Brooks enel anyo 2008 avla de la istorya de la Agadá, desde el su orijin en Espanya asta su arrivada al muzeyo en Sarajevo.
  • La edision de envierno del anyo 2002, del djurnal Brick publikó un artikolo de Ramona Koval enel kualo avla de las gerras relasionadas kon la amostra propozada por la UNESCO de la Agadá, dempues de los Akódros de Dayton en 1995.
  • La istorya de Dervis Korkut, el kualo eskapó de los Nazis ke kerían la Agadá, aparesió en la revista The New Yorker en Disiembre de 2007. Enel artikolo endemas es avlado de una manseva djudia, Mira Papo, ala kuala Korkut i su espoza eskondieron de los Nazis kuando tentavan salvar la Agadá. Kuriozamente, Mira Papo, ya una mujer aedada en Israel salvó la vida de la ija de los Korkut durante el Jenosidio Serbio en la anyada de 1990.

Referensias[trocar | trocar el manadero]

  1. The Sarajevo Haggadah (en lingua inglesa)
  2. A view into an artist’s connection with his people. SDNews.com
  3. The Book of Exodus. Por Geraldine Brooks. The New Yorker
  4. The Sarajevo Haggadah (en lingua inglesa)

Atamientos eksternos[trocar | trocar el manadero]


Commons Wikimedia Commons alberga kontenido multimedia sovre Agadá de Sarajevo