Theodor Herzl

de Vikipedya, la ansiklopedya líbera
Saltar a: navigación, buxcar
Theodor Herzl

Theodor Herzl (en ivrit בנימין זאב הרצל, Binyamin Ze'ev Herzl; en ungario Herzl Tivadar), (Budapest, 2 de Mayo de 1860 - Edlach, 3 de Djulio de 1904), fue un djurnalista i eskritor ostro-ungario, fondador del zionismo polítiko moderno.

Biografiya[trocar | editar código]

Herzl nasió en 1860 enel Reyno de Madjaristan, en el kondado de Pest (oy endia, la parte oryentala de la sivdad de Budapest, la kuala antonses era dos sivdades separadas), endjunto a la Gran Esnoga de Budapest. Nasido en el seno de una famiya djudia sefardi almanófona orijinala de la sivdad de Zemun, ubikada en la "Frontiera Militara" (aktual Serbia), representativa de la burgesiya djudia emerjente enel Imperio Ostro-Ungario. Kresió en un ambiente konfortavel, liberalo i sekular.

Estudió en una eskola djudia asta los diez anyos, kuando fue enviado a una eskola sekulara, la kuala tinió ke deshar deké el antisemitizmo ke egzistia en la misma. De esta forma, fue enrejistrado en una eskola evanjélika, en la kuala no tuvo problemas con el antisemitizmo, pues la mayoría de los elevos eran djudios. Dempues de la muerte de la su ermanika Paulina en 1878, la su famiya se mudó a Viena, antonses kapitala del Imperio Ostro-Ungario, ande estudió i obtuvo un doktorado de Dirito de la Universita de Viena enel anyo 1884. Lavoró en esta profesión por un chiko tyempo en Viena i en Salzburgo, ma dempués de un anyo se dedikó kaji eksklusivamente a la literatura, al teatro i al djurnalismo.

Durante la su mansevés, pertenesió a una asosiasiyon yamada Burschenschaft, la kuala bushkava la unifikasiyon almana, basho el lema "Ehre, Freiheit, Vaterland" (Onor, Libbertá, Patria) i los sus primeros eskritos no se estavan relasionados kon la vida djudia. Herzl era un djudio asimilado. Los sus eskritos eran sobre tódu novelas por entregas, deskriptivas i no polítikas.

El su primer empiego era lavorando para las Kortes de Viena i Salzburgo, anke él aspiraba a ser un djuzgo, má la su kondision de djudio no lo azía posivel. Enel anyo 1891, se dedikó por kompleto al djurnalismo: empiesó a ser el korresponsal en Paris del enfluyente periódiko libberalo de Viena, Neue Freie Presse, un emportante djurnal de referensia enel Imperio Ostro-Ungario, konosido komola voz libberala Ostríaka.

Kavzo Dreyfus[trocar | editar código]

Theodor Herzl (1897)
Theodor Herzl, en sus anyos de djurnalista

En Paris estudio i analisó la kresyente atmosfera antisemita en Fransia, i empiesó a sentirse emosionalmente relasionado kon el «problema djudio», al kualo no avía prestado atension ántes. Al empesijo el tinía la idea de la asimilasiyon, ma el Kavzo Dreyfus (1894) fue para Herzl un ponto de troko asya el nasionalismo ya ke, en las sus propias palavras, ver el proseso Dreyfus en priméra persona i el odio antisemita jenerado por este kavzo fue lo kualo trokó a Herzl en un zionista.

Herzl, ya kualo era korresponsal del Neue Freie Presse, fue uno de los pokos djurnalistaas a los kualos se permitió estar en el akto de degradasiyon de Dreyfus. Dos semanas antes el avía estado en la kamareta de la Korte i eskuchó el anunsio del veredikto, el kualo azía kulpavel al kapitán Dreyfus. Dreyfus fue yevado a traverso del kortijo, gritando la su inosensia. La djente eskuchava los sus gritos i empiesaron a kantar. Al salir de la frágua de las Kortes, Herzl vio las manifestasiones en Paris dempues del djuzgo al kapitán Dreyfus en el kualo muncha djente gritava "¡Muerte a Dreyfus! ¡Muerte a los djudios!".

Esto izo ke Herzl trokara la su aktitud. Empiesó a deshar de lado las sus priméras ideas sovre la emansipasiyon djudia i la asimilasiyon para kreer que el Pueblo Djudio devia irse de Evropa i kriar el su própio paez.[1]

En Djunio del anyo 1895, eskrivió en el su diario:

"En Paris, komo ya e dicho, adkirí una aktitud má livre asia el antisemitismo ... Por ensima de todo, arikonosko el vazío i la inutilidad de tentar 'gerrear' en kontro del antisemitismo."

Líder zionista[trocar | editar código]

La su mueva visión zionista fue apresentada en el su livro yamado Der Judenstaat: Versuch einer modernen Lösung der Judenfrage («El Estado djudio: ensayo de una solusiyon modérna de la kestyón djudia»), el kualo se puvlikó en Fevrero de 1896, ande propuso ke la solusiyon al «problema djudio» es la kriasiyon de un Estado djudio endependiente i soverano para todos los djudios del mundo, ke esto sea un asunto de polítika internasionala i ke devía ser asumido komo tal. El teksto, má un manifiesto ke un eskrito doktrinal, propuso un plano polítiko i práktico ke ofresiya una vision modérna e ilusionante para el nasyente nasyonalismo djudio, el kualo kiría kriar un payis modérno para el Pueblo djudio.

En el empesijo de la su aktividad, kuando entendió la nesechitá de un estado djudio, tentó sin egzito en kaptar la atensiyon de los djudios má rikos i enfluyentes komo el Baron Hirsch i el Baron Rothschild. Al empesijo el teksto no fue muy bien resivido, en los grupos djudios libberalos i asimilasiyonistas de Evropa Sentrala i Evropa Oksidentala,. Ni fue de agrado en las esnoga, ande se le tomó por un inimigo de las ensinyansas relijiozas. Ma afilú las sus ideas fueron muy bien resividas por las masas, las kualas lo konsideravan un modérno Moshe Rabenu.

En Der Judenstaat eskrivió:

"La kestyón djudia sige ande biven djudios en kantidad konsiderável. Ande no egzista, es yevado endjunto kon los inmigrantes djudios. Nós, naturalmente, somos yevados a lares ande no somos persegidos, i la muestra aparisiyon jenera la persekusiyon. Este es el kavzo, i va sigir siendo ansina, en todas partes, asta en payises altamente modérnos -komo por egzempio, Fransia- siempre ke la kestyón djudia no se resuelva en el plano polítiko. El dor del pueblo djudio endagora se está transportando i sembrando la simiya del antisemitismo en Inglaterra, y ya lo an introduzido en Amérika.[2]

Kuando en Avril de 1896 fue publikada la traduksiyon al inglez de Der Judenstaat, Herzl pasó a ser el vozero prinsipalo del zionismo. Herzl empiesó antonses en una kampanya diplomátika para ganar apóyo para la kavza zionista en el mundo.

Vijitó Estambol en Avril de 1896, tentando de konsigir del Sultán de la Turkiya una parte de la provensiya de la Siria Otomana, para krear un Estado Djudio a troko de apóyo finansiero. Fue resivido en Sofia, Bulgaria, por un grupo djudia. En Londra, lo resivieron fríamente, ma se le konsedió el mandato de liderazgo de los zionistas de Londra. A los sesh meses de este mandato fue aprobado en toda la komunidad djudia zionista, i Herzl viajó por toda Evropa para yamar la atensiyon sovre la su kavza. Los sus partidarios, al empesijo eran pokos, má lavoravan diya i noche inspirados por el egzempio de Herzl.

Aperturó un buró en Viena, desde ande organisó la su aktividad entre la komunita djudia, la kuala empiesó a ver a Herzl komo un lider modérno el kualo iva poder giar el nasionalismo djudio.

Enel anyo 1897, aperturó en Viena Die Welt («El Mundo»), el primer periódiko zionista ofisial. Este mismo anyo organisó el Primer Kongreso Zionista en Basilea, Suisa. Ayí fue elejido presidente i en 1898 empiesó otras aksiyones diplomátikas destinadas a konsiguir apoyo para un paez djudio. Fue resivido por el kaiser almán en varias okasiyones, fue muevamente resivido en audiensia por el sultán ottomano en Yerushalayim i asistió a la Konferensa de Paz de 1899 en La Aya, disfrutando de un kálido resivimyénto por munchos otros estadistas.

En 1902-03 Herzl fue kunvidado a testifikar ante la Real Komisiyon Britanika sovre la inmigrasiyon ekstranjera. El asunto lo puso en kontakto con los myembros del govyerno britániko, en partikular, kon Joseph Chamberlain, antonses Sekretario de Estado para las Kolonias, por medio del kualo negosió con el govyerno Ejipsio para estableser los estatutos de la solusiyon de los djudios en Al 'Arish, en la Peninsola del Sinai.

Enel anyo 1902 publikó el su livro Altneuland (La Vieja Mueva Tyerra) ande presentaría al futuro Estado djudio komo una utopia de nasion modérna, demokrátika i próspera.

Muerte[trocar | editar código]

Guardia de onor endjunto al ataúd de Herzl en Israel

Herzl murió en Edlach, Basha Ostria en 1904 por ensufisiensya del korasón kuando tinía 44 años. La su voluntad demandava kualo devía tener un entyerro simple, sin diskorsos o flores i endemas pidió, "Kiero ser entyerrado en el panteón endjunto al mi padre, i deskansar ayí asta ke el Pueblo Djudio me yeve a Eretz Yisrael". Enel anyo 1949 los sus restos fueron yevados desde Viena asta Har Herzl en Yerushalayim.

Herzl es el prinsipal símbolo del zionismo i el padre del modérno Estado de Israel. La su imajen está presente en los burós ofisiales yisraelis i la su memoria se mantiene en sivdades, eskolas i kalejas (kaji kada siudad yisraeli tiene una kaleja Herzl).

Referensias[trocar | editar código]

  1. Rubenstein, Richard L., and Roth, John K. (2003). Approaches to Auschwitz: The Holocaust and Its Legacy, p. 94. Louisville, KY: Westminster John Knox Press. ISBN 0-664-22353-2.
  2. Herzl, Der Judenstaat, cited by C.D. Smith, Palestine and the Arab-Israeli Conflict, 2001, 4th ed., p. 53