Djudeo-grégo

El Yevanitiko, Djudeo-grégo o Romaniota era el lashon de la lingua grega avlado por los Romaniotas, los djudios ke bivían en Gresia desde la epoka antika. Se kreye ke la lingua es derivada de la antika lingua gréga o Koiné (Ελληνική Κοινή) endemas de biervos ebreos. Esta lingua la entendian los kristyanos de Gresia, anke era eskrita kon el alefbet ebreo.

El nombre "Yevanitiko" viene del biervo ebreo Yāvān, el kualo es derivado del biervo Sanskrito Yavana, ke era uzado por munchas kulturas para azer referensia a los grégos i las rejiones ande bivían komunitas grégas. Este biervo es derivado del biervo grégo Ἰωνία (Ionia), ke aze referensia a la rejion al oryente de la antika Gresia ande oy se topa Izmir. Oy endiya, no egzisten kaji avlantes de este lashon, por varias razones:

1. La asmilasiyon de las chikas komunitas romaniotas por las muncho mas grandes komunitas sefardis ke avlan djudeo-espanyol;
2. El uzo de las linguas gréga, turkana i bulgariana;
3. La emigrasion romaniotas a Israel i a los Estados Unidos;
4. La ideolojiya del zionismo, la kuala bushka dar mas emportansia al ivrit komo lingua para todos los djudios, i
5. El amortamiento de kaji todos los romaniotas enel Olokósto.