Istorya de los djudios en Estonia

Un artíkolo de la Vikipedya, la ansiklopedya líbera

Oy endiya, unos 3.000 djudios biven en Estonia. Muchos de eyos avlan endemas de estonio, ruso i algunos avlan idish. La istorya de los djudios en Estonia es diferente de la de las komunitas en Letonia i Lituania deke la komunita fue chika i el payis de poko entereso para los djudios.

La arrivada de djudios a Tallinn, Tartu i otras rejiones del payis tuvo su empesijo solu kuando el zar Aleksandro II de Rusia firmó una ley enel anyo 1865, la kuala permetía ke ke soldados i artesanos djudios bivieran en la antonses provensiya rusa. Este afito koinsidava kon los diyas en los kualos los estonianos empiesaron a dezvelopar un senso de unidad nasionala, dempues de munchos syéklos basho el kontrolo de almanes, danezes, suekos, polakos i endagora rusos. La komunita djudia se unio a esta brega de los estonianos. Muchos mansevos djudios gerreyaron endjuntamente kon los estonianos kon el buto de azer al payis independiente. Por modre de esto, enel anyo 1925, el joven payis dechidió dar otonomiya kulturala para las minoriyas, entre eyas la djudia.

La Sigunda Gerra Mondiala i basho el Komunizmo[trocar | trocar el manadero]

Esta otonomiya yegó a su fin durante la Sigunda Gerra Mondiala, kuando el payis fue invadido por la Armada Kolorada al empesijo de la gerra, i dempues las huérsas de la Wehrmacht kitaron a los rusos. Poko tyempo dempues, Estonia se trokó enel primer payis Judenfrei, dempues de ke la komunita fue destruyida por los nazis i los sovyetikos yevaran kaji toda la komunita al egzilio en kampos en Siberia. Munchos djudios tentaron tornar al payis dempues de la gerra, ma la politika de rusifikasiyon izo muy zor rekonstruyir la komunita. La situasion amijoró un poko en los diyas de la perestroika, kuando anke munchos djudios estonianos desharon el payis para irsen verso Almania, los Estados Unidos o Israel, egzistía una esnoga chika en la sivdad kapitala, Tallinn; una kaza chika echa de madera, emprestada por una kilisia de la sivdad.

La Independensia, muevamente[trocar | trocar el manadero]

Dempues de la restorasion de la independensia del payis enel anyo 1991, el mas chiko payis de la antika Union Sovyetika izo riformas ke permetieron la membresiya en la Union Evropea, la OTAN i la Organizasion de Kooperasion y Dezvelopamyénto Ekonómiko, a la kuala el payis fue akseptado, endjuntamente kon Israel enel anyo 2010. La vida de los djudios del payis amijoró grandemente dempues de la independensia, situasion ke fue koronada kon la apertura enel anyo 2007 de una esnoga enel sentro de Tallinn, la Esnoga Beit Bella, en la maále restorada de Rottermani. La mueva esnoga afilu sinyifika berahá para la komunita de Helsinki, ke uza la mikve de la komunita estoniana kuando la de la sivdad finlandeza se remuevó. En la komunita endemas egziste una eskola djudia, al lado de la esnoga, kon 270 elevos, un klub de espor, el Makkabi i un restoran[1]. Enel anyo 2011, la sivdad de Tallinn es kapitala evropea de la kultura, endjuntamente kon la sivdad finlandeza de Turku; el festival kultural djudio Ariel va ser apresentado en Tallinn, komo parte de las aktividades kulturalas propozadas.

Referensias[trocar | trocar el manadero]

  1. Tallinna sünagoog on avatud


 
Istorya de los djudios

Chile | Espanya | Estonia | Harbin | Libya | Makedonia | Malasia | Meksiko | Rumania | Selanik | Shanghai | Tunesia | Venezuela