Izmir
|
||||||||||||||||||||||
Izmir[1] (en turkano İzmir, achikamyénto de el su antiko nombre grégo Σμύρνα, Smýrna) es el sigundo major porto de la Turkiya tras Estambol, i la treséra sivdad del paez en tamanyo (4.130.444 abitantes en 2009). Se ankontra endjunto a la beira de la Mar Ejeo, serka del Golfo de Izmir, entre las penínsulas de Foça i Klaksomenas, i a unos 450 km al sudoeste de Estambol. Es endemás la kapitala de la provensiya de Izmir.
Izmir ez sivdad de porto i de komersio, i ez el sentro de la exposición enternasional. En la parte oeste se topa la peninsula Çeşme ke tiene playas i sentros de termal. En el tiempo del imperio romano Efes era una de las sivdades mas grandes del mundo. Aya aviya toda la rikeza de la kultura i del arte. Por esto la sivdad fue yamada la ermoza Izmir, La perla de Iyonya, i La vieja Izmir. Dospuez de anyos estoz nombres fueron un titolo de la sivdad.
Izmir ez entornada de yahtas i vapores. El aver ez ermozo no muy kaynte. En el bodre de la mar ay kalejas anchas kon arvoles de palmera. Dozpuez del porto Mersin, Izmir ez el maz grande de Turkiya. I aparte de esto a kavza de las exposiciónes enternasionales i festivales de arte tiene un posto muy emportante en el mundo.
Contènidos |
[troca] Istorya
En las excavaciones arqueológicas ke izyeron se supo ke en el viejo Izmir biviyan los emigrantes ke salyeron de la Gresia los Ayoles i los Iyones. En el tiempo del fierro en Izmir aviya kazas chikas i grandes de una o doz kamaretas. La maz vieja kaza ez de entre los anyos 925-900 aEK. Esta kaza se topa konservada bueno ke fue fraguada de lodo i el techo de paja. Dospuez de 875 aEK fraguadon kazas de una kamareta en el entorno de un kortijo ke era komo nalcha.
En el anyo 850 aEK fraguaron paredes de lodo para protejar la sivdad. Dospuez de este periodo el viejo Izmir se konvertyo a una sivdad de governo.
Los emigrantes i los savyos eran el puevlo adelantado. En la sivdad el puevlo mas omenos era 1000 personas. En los 750-650 aEK el puevlo de la peninsula pujo fina 1500 persona. La major parte del puevlo biviyan en los kazales del entorno. En estoz kazales aviya arvoles de azituna, vinyas e echos de seramika. Eyos se manteniyan kon peshkar i agrikultura.
El lugar mas sentro de la sivdad era el templo de Atena.
[troca] El periodo briyante 650-545 aEK
El tiempo maz riko de Izmir fue entre loz anyos 650-545 aEK. Este periodo kontinuo 100 anyos. Kon la kavesera de Miletos izyeron munchas koloniyas en Ejypto, Surya i en Levanon. Los Helenistos del este izyeron konkorensya kon la Gresia i parvinyeron a adelantar en munchas kozas. En akel tiempo Izmir, aparte de agrikultura teniya komersio en la mar Mediterranea. Estuvyeron okupandosen kon biblos chikos i grandes salidos de Kibris i statuas de fayans de Asya del Mediterranea. Esto kedo fina agora.
La forma vieja de las kazas de munchas kamaretas se topa en Izmir en el sieklo 7 aEK. Laz kazas en Izmir se topavan una allado de otra ke se yamava Megaron. Laz kalejaz i las kayes eran fraguadas del este al oeste, i laz kazas miravan al sud.
[troca] El tiempo del Imperio Romano 133 aEK – 395 dEK
El grande Aleksander gano en la guerra al rey de Persia Daryus en el anyo 333 aEK. I dozpues ke se apatrono de todo el este el puevlo Heleniko empeso adelantar. Las sivdades empesaron a empuevlarsen. En akeya epoka en las sivdades Iskenderiya, Rodos, Bergama i Efes el puevlo arivo fina maz de 100,000 personas. En el viejo Izmir ke estava en un monte chikitiko, lo ke biviyan era solo unas kuantas mil personas. I dospuez de esto lo maz tadre en el anyo 300 aEK se fondo en Kadife Kale una sivdad mueva i grande.
En el tiempo de los Romanos entre las fraguas ke uvo en Izmir aviya un teatro stadyum, ma de esto kedo muy pokos rekuerdos. En lugar de esto Agora de Smyrna fue konservada bueno i se yamo Agora. La grandor ez 120 X 80 de largor, i tiene una ancha entrada. Por las doz partes teniya doz fraguas de doz etajes.
En el II syeklo aEK, Izmir paso a las manos de los Romanos, i por segunda vez estuvyeron bivyendo el tiempo de oro. En el anyo 88 aEK el rey de Pontus VI Mithridates, se apatrono de la sivdad. Dospuez de doz anyos la sivdad paso de muevo a las manos de los Romanos.
Asigun la Biblia una de las siyete Iglisiyas ke se topavan en Smyrna, fue my emportante para el adelantamyento del Cristianizmo. El primer obispo Aziz Polikarp i uno ke eskrivyo la Biblia St. John eran unoz de los primeros kreyedores. Este nasyo en el anyo 70 dEK en Anadol, i por modo ke kreyo al Crisianizmo fue matado de parte de loz Romanos en la data 23 Febrero 155. Lo kemaron en el stadyum de la sivdad Izmir. En el anyo 395 dEK el Imperio Romano se aparto en doz. Izmir fue parte del Imperio Bizansiano del este.
[troca] El periodo de la Imperia Romana del este
En el tiempo de la Imperia Romana del este lor Arabos, los Selchukes, los Genevizoz, i los Kruseros se kijeron apatronar de la sivdad i uvo peleaz entre eyoz. En primero en el anyo 672 loz araboz atakaron de parte de la mar i lo uzaron komo us en loz atakoz ke izieron a Estanbol. Loz turkoz en el anyo 1076 por primera vez lo tomaron Izmir de las manos de loz Selchukes,i kon tiempo kon la ayuda de Chaka Bey ke era el primer i grande marinero Turko se apatronaron de la sivdad. Kon loz atakoz ke izo de Izmir para laz izlaz de Ege i a loz Dardaneles izo teror a lo Bizantinos. Dospuez de su muerte loz Bizantinos en el anyo 1098 se apatronaron de la sivdad. En el anyo 1204 la parte de la mar de la sivdad paso alaz manos de loz Shevalyes de Rodos.
En el anyo 1310 Aydinoglu Umur Bey se apatrono de la sivdad entera . En el 1344 los Cenovezoz apanyaron la sivdad del sud. Se apatronaron de la kale St Peter. Loz Aydinogullari Beyligi tomaron la parte norte de la sivdad ke se yomo Kadifekale. De akeya epoka kedo la nombradiya de Gavur Izmir, i esto se uzo para ke se konoska la sivdad del sid ke kedo en laz manoz de los Cenovezoz.
[troca] La keila djudia de Izmir
La keila djudia de Izmir se topa en la kosta de la mar Aege de Turkiya. Era kla keila maz grande i adelantada en el tiempo de loz Otomanos. La keila empeso a emplumar en el 17 sieclo . Era el sentro para los djudios ke vinieron de la Espanya i era el sentro de komersio i endustriya. Uno de los moradores de la sivdad era el mintirozo mashiah Shabtay Zvi . El teniya munchos hasidim en la keila. En medio del 19 sieklo empeso a amenguar el puevlo en la keila. I esto fue a kavza ke uvo discusionez kon el puevlo Grego. La Emperia Otomana empeso a atrazar a kavza de la batalya kon los Gregos. Kuando se fondo el Governo Israel munchos djudioz moradorez en Izmir emigraron a Israel kaji 10.000 personaz. En los anyos 1950 -1960 en el 20 sieklo se serraron munchos mosdot. Agora en Izmir biven kaji 2000 personaz, la sigunda de grandor en la Turkiya. Entre Estanbol i Izmir ay muncha diferensia en la quantudad en el puevlo.
[troca] El empesijo del djudaismo en Izmir
La existensia de loz djudio en Izmir ez del tiempo de la biblia. Parese ke los djudioz tenian influensa en el puevlo ke kreyiya en loz idolos.unos kuantos de eyoz se konvertieron al djudaizmo. Pero los christianos parvinieron a amenguar la fuersa del puevlo djudio. En el tiempo de loz Bizantinos kaji no se nombrava djudioz en Zmirna. En los kazales del entorno kontinuaron a bivir djudioz.
En el anyo 1424 la sivdad ke era dainda un kazal chiko fue konkistada de parte de loz Otomanoz, ke estava en laz manoz de loz Bizantinos i fue parte de la Imperia Otomana. En el sieklo 16 ay dizientez de parte de loz djudios ke vinieron a Zmirna de la Espanya, i ke eran djudioz romantiotez. La mas parte de loz primeroz djudioz vinieron en el anyo 30 del sieklo 16. Ay provaz ke en el sieklo 16 uvo djudyoz en la sivdad en el anyo 1521 ke fueron aroncados de parte de los Otomanos de Belgrad i Serbia. I en el anyo 1524 fueron aroncados de Ungaria ibuda. Aviya tombas de los anyos 1540-1565 en Izmir i aviya enriva de las tombas sinyales djudyos. Maz despues se fondo keila sefaradit i portugezit ke emigraron de Asia ,Afrika i del norte de Venesia. Pero en las eskrituryas de los Otomanos no ay dinguna prova de la existensia de alguna keila organizada. La emigrasion de loz djudios de Sefarad ala Imperia Otomana paso por Izmir en el sieklo 16. Eyoz empesaron a bivir aya kuando Izmir se izo un porto santral de los Otomanos.
[troca] Sivdades ermanas
Esto ez una amigavle ke se aze entre la sivdad del paiz kon otras sivdades ajenas. Loz miembros de las minisipalidad konfirman ke la sivdad ermana kale ke akonante de parte Kulturala, Ekonomiya, Komersio, Turizmo, Estudio, Spor i Sanedad. I kale ke tengan relasyones de amigavle i de pas. Aparte de esto las doz sivdades ermanas paresen en la istoria, geografiya i kultura. Izmir tiene 31 sivdades ermanas:
|
|
[troca] Referensias
Este artikolo es endagora, solo un esbozo. Ampliandolo ayudaras a amijorar Wikipedia.
Puedes ayudarte kon las wikipedias en otras linguas.
